42. यीशु स्वर्ग लोट जावै है

झिकै दिन परमेश्वर यीशु नै मरेयाँ मुं जीवित करेयो हो,बिंगा दो चेला कनै हि गाँव मैं जाऐ आवै हा। चालता होया बे यीशु गै सागै झिको होयौ हो। बिंगै बारै बातां करे आवै हा, बनै ऊमिद हि कै बौ मसीह हो, पर फेर भी बो मारेयो गेयौ। अब बे स्त्रियाँ केवै हैं के बौ फेर जीवित हो गेयौ है। बे कोनी जाणता हा के बां किं बात पर विश्वास करनो है।

यीशु बांगै कनै आगै बांगै सागै चालणो शुरु करेयो, पर बे बिन पहचान कोनी सकेया। बणै पुछेयो के बे किं बारै मै बात करै आवै है। बां बिनै पिछलै दिनां मै यीशु सागै होई सारी घटना गै बारै बतायो। बां सोचेयौ के बे किं परदेशी सगै बातां करै आवै है झिको कोनी जाणै के यरूशलेम मै के होयौ है।

फैर यीशु बानै समझायो के परमेश्वर गो वचन मसीह गै बारै मै के केवै है।बहोत पैहलां, भविष्यद्वक्‍तां केयौ हो के बुरा लोग मसीह नै पीड़ित करैगा अर मार दैयगा। पर भविष्यद्वक्‍तां ओ भि केयौ हो के बौ तीसरै दिन जी उठगो।

जद बे बिं गाँव मै पहोंचेया झठै बे दो जन ठहरनो चाहंता हा, तब ताईं लगभग शाम हो गि ही।बाँ यीशु नै बांगै सागै ठहरणै खातिर आमंत्रित करेयो, अतः बौ बांगै सागै एक घर मैं गेयौ।आपणौ शाम गो भोजन खाणै खातिर बै बैठ गेया। यीशु एक रोटी लैगे बिंगै खातिर परमेश्वर गो धन्यवाद दियौ, अर फैर बिनै तोड़ेयौ। अचानक हि, बां जाण लियो के बौ यीशु हौ। पर बिं समय, बौ बांगी आँखां सामणु ओझल हो गेयौ।

बां दो जणां एक दूसरै नै केयौ, "बौ यीशु हो! ईंखातिर जद बणै मानै परमेश्वर गो वचन समझायो हो तो मैं बहोत उत्साहित हा!" जद ही, बे निकल गै वापिस यरूशलेम गेया। जद बै पहोंचेया तो बां चेलां नै बतायो, "यीशु जीवित है! मै बिनै देखेयो है!"

जद चेला बात करै आवै हा तो, यीशु अचानक बिं कमरै मै बांगै सगै प्रकट होयौ। बणै केयौ, "थानै शान्ति मिलै!" चेलां सोचेयौ के बौ कोई भूत है, पर यीशु केयौ, "थै क्यों डरो हो? थे ओ क्यों कोनी सोचो के सचमुच मैं, यीशु हूँ? मेरै हाथां अर पेरां नै देखो। भूतां कनै हिसो शरीर कोनी होवै झिकौ मेरै कनै है।" ओ दिखाण खातिर के बौ कोई भूत कोनी, बणै खाणै खातिर कुछ माँगेयौ। बां बिनै मछली गो एक टुकड़ो दियो, अर बणै बिनै खा लियौ।

यीशु केयौ, "मेरै बारै मैं परमेश्वर गो वचन झिको कुछ भी केवै है वह घटित होवगो। मैं थानै बता दियो हो के ईंगो होणौ अवश्य है।" फैर यीशु बानै परमेश्वर गो वचन आच्‍छि तरियाँ समझायो। बणै, "बहोत पैहलां भविष्यद्वक्‍तां लिखेयो हो के, मसीह नै दुःख उठाणो होवगो, मरनो होवगौ अर तीसरै दिन मृतकां मुं जी उठणौ होवगो।"

"बाँ भविष्यद्वक्‍तां ओ भी लिखेयौ हो के मेरा चेला परमेश्वर गै वचन गी घोषणा करगा।बे हर एक नै पश्चाताप करण खातिर बतावगा। जे बे ईंयां करै हैं तो परमेश्वर बांगा पाप क्षमा करगो। मेरा चेला ईं सन्देश गो प्रचार करनो यरूशलेम मुँ शुरु करैगा। फैर बे सारी जगह सारी जातियाँ मैं जावगा।थे लोग मेरी हर एक बात अर काम गा गवाह हो झिकौ मैं केयौ अर करेयौ है, अर बिं सब गो भी झिको मेरै सागै होयौ।"

अगलै चालीस दिनां गै दौरान, यीशु आपणै चेलां पर कई बार प्रकट होयौ। एक बारी तो बौ एक ही समय पर 500 मुं ज्‍यादा लोगां पर प्रकट होयौ! बणै आपणै चेलां पर कई तरीकां मुं साबित करेयौ के बौ जीवित है, अर बणै बानै परमेश्वर गै राज्य गै बारै मै शिक्षा देई।

यीशु आपणां चेलां नै केयौ, "परमेश्वर मनै स्वर्ग अर पृथ्वी गै हर एक जन पर राज करणै गौ अधिकार दियौ है। ईंखातिर अब मैं थानै केऊं हूँ: जागै सारी जातियां गै लोगां नै चेलौ बणाओ। ईंयां करणै खातिर, थे बानै पिता, पुत्र, अर पवित्र आत्मा गै नाम मुं बपतिस्‍मौ देणौ है। झिकी कुछ भी मैं थानै आज्ञा देई है सारी बातां नै मानणौ भी थे बानै सिखाणौ है। याद राखियौ, मैं सदा थारै सागै रेऊँगा।"

यीशु मरेयाँ होयाँ मुँ जी उठणै गै चालीस दिनां बाद, बणै आपगै चेलां नै केयौ, "जद तांईं मेरौ पिता थानै सामर्थ ना देवै तब तांईं यरूशलेम मै ठहरेया रेऔ।बो थारै ऊपर पवित्र आत्मा भेजण गै द्वारा ईंयाँ करगो।" फैर यीशु स्वर्ग मै चलेयौ गेयौ, अर एक बादल बिनै बांगी दृष्टि मुं छिपा लियौ। स्वर्ग मै यीशु सारी चीजां पर राज करणै परमेश्वर गी दाहिनी ओर बैठ गेयौ।