43. कलीसिया गी शुरुवात होवै है।

यीशु गै स्वर्ग लौट जाणै बाद, चेला यरूशलेम मैं ही रुकेया जिंयाँ यीशु बानै करणै गो आदेश दियो हो। भठै गा विश्वासी लोग लगातार एक सागै प्रार्थना करणै खातिर इकठा होऐ करता।

हरेक साल, फसह गै त्‍योहार गै 50 दिनां बाद, यहूदी लोग पिन्तेकुस्त नाम गै एक खास दिन मनाऐ करता। पिन्तेकुस्त बौ समय हो जद यहूदी लोग गेहूँ गी कटाई नै मनाऐ करता हा। सारै संसार मै यहूदी लोग पिन्तेकुस्त गै दिन एक सागै मनाण खातिर यरूशलेम आया। ईं साल, पिन्तेकुस्त मनाण गो समय यीशु गै स्वर्ग गै लगभग एक हफ्‍तै बाद आयौ हौ।

जिं समय सारा विश्वासी लोग एक सागै इकट्ठा हा, तो झिकै घर मैं बे हा अचानक बौ तेज हवा गी आवाज मुं भर गेयौ।फैर आग गी लपटां झिसौ दिखणै आलौ कुछ सारै विश्वासियां गै सिरां गै ऊपर प्रकट होयौ। बे सरा पवित्र आत्मा मुँ भर गेया अर बां अन्य भाषावां मै परमेश्वर गी स्तुति करी। बै ऐ भाषावाँ हिं झिकी बोलणै खातिर बानै पवित्र आत्मा सक्षम करेयौ।

जद यरूशलेम मै रेण आलै लोगां शोर सुणेयौ, तो बे भीड़ गै रूप मै ओ देखणै खातिर एक सागै आया के भठै के होऐ आवै। बां विश्वासियां नै परमेश्वर द्वारा करेया गेया बड़ै-बड़ै कामां गी घोषणा करतां होयां सुणेओ। बै हराण हा क्योंकि बे बाँ कामां नै आपणी ही भाषा मै सुणै आवै हा।

बांमुँ कुछ लोगां केयौ के बे चेला नशै मै है। पर पतरस खड़ो होयौ अर बानै बोलेयौ, "मेरी बात सुणौ!ऐ लोग नशै मै कोनी! ईंग बजाए,झिकौ थे देखौ हो ओही है झिकौ योएल भविष्यद्वक्ता केयौ हो के होवगौ: परमेश्वर केयौ, 'अंत गै दिनां, मैं आपणौ आत्मा उंडेलूँगो।'"

"हे इस्राएली आदमियौ, यीशु एक हिसौ आदमी हो झिकै ओ दिखाणै खातिर के बौ कुण हो बहोत सारा अनोखा काम करेया हा। बणै परमेश्वर गी सामर्थ मुँ बहोत सा अद्भुत कामां नै करेयौ हो। थे ओ जाणौ हो, क्योंके थे आँ कामां नै देखेयौ है। पर थे बिनै क्रूस पर चढ़ा दियौ!"

"यीशु मर गेयौ पर परमेश्वर बिनै मरेयाँ होयाँ मुं जीवित कर दियौ। अणै बिं बात नै पूरो कर दियौ झिकौ एक भविष्यद्वक्ता लिखेयो है: 'तू आपणै पवित्र जन नै कब्र मैं सड़णै ना दैऐगौ। 'मेंह गवाह हां के परमेश्वर यीशु नै फैर जीवित कर दियौ।"

"परमेश्वर पिता अब यीशु नै आपणी दाहिनी ओर बैठा गै बिनै आदर दियो है। अर यीशु माहरै खातिर पवित्र आत्मा भेजेयौ है जियं बणै प्रतिज्ञा करी ही के बौ भेजगौ। पवित्र आत्मा ही बां कामां नै होण देऐ आवै है झिकां नै थे देखै अर सुणै आयौ हो।"

"थे बिं आदमी, यीशु नै क्रूस पर चढ़ा दियो। पर सच मै जाणै लेयौ के परमेश्वर यीशु नै सारी चीजां पर प्रभु अर मसीह दोनुं ठहरायौ है!"

पतरस गी सुणन आला लोग बिंगै द्वारा केंईं गई बातां मुं अंदर तांईं हिल गेया। ईंखातिर पतरस अर चेलां नै पूछेयौ, "हे भाइयो,मानै के करनौ चाहिऐ?"

पतरस बानै जवाब दियौ, "थारै मुँ हर एक आपणै पापां खातिर पश्चाताप करो ताके परमेश्वर थारै पापां नै क्षमा करै, अर यीशु मसीह गै नाम मै बपतिस्‍मौ लेयौ। फैर बौ थानै वरदान रूप पवित्र आत्मा भी देवगौ।"

पतरस झिकौ केयौ बिं पर लगभग 3,000 लोगां विश्वास करेयौ अर यीशु गा चेला बणै गेया। बां बपतिस्‍मौ लियौ अर यरूशलेम गी कलीसिया गो हिस्‍सौ बणै गेया।

जद प्रेरितां बानै शिक्षा देईं तो विश्वासियां लगातार सुणयौ। बे अक्सर मिलै करता हा अर एक सागै भोजन करै करता हा, अर बां अक्सर एक दूसरै खातिर प्रार्थना करी।बां मिल गे परमेश्वर गी स्तुति करी अर झिकौ कुछ भी बांगै कनै हो बां एक दूसरै सागै साझौ करेयौ। गाँव गो हर एक आदमी बांगै खातिर आच्‍छा विचार राखता हा। प्रतिदिन, ज्‍यादा मुं ज्‍यादा लोग विश्वासी बणता गेया।