44. पतरस अर यूहन्ना एक भिखारी नै चंगो करै है।

एक दिन, पतरस अर यूहन्ना मंदिर मैं गेया। एक अपंग आदमी भीख माँगण खातिर फाटक पर बैठेयौ हो।

पतरस बिं लंगड़ै आदमी कानी देखेयौ अर केयौ, "मैरै कनै तनै देण खातिर पिसा तो कोनी है। पर झिकौ मेरै कनै है बौ मैं तनै देऊँ हूँ। यीशु गै नाम मै, उठ अर चल-फिर!"

तुरन्त ही, परमेश्वर बिं लंगड़ै आदमी नै चंगौ कर दियो।बणै ईनै बिनै चालणौ अर कूदणौ, अर परमेश्वर गी स्तुति करनी शुरु कर दि। मंदिर गै आँगन मै झिका लोग हा अचम्भित हा।

जलदी ही लोगां गी एक भीड़ बिं आदमी नै देखण खातिर आई झिकौ चंगौ हो गेयौ हौ। पतरस बानै केयौ, "औ आदमी ठीक है, पर ईं बात पर अचम्भित ना होईयो। मैहँ ईनै आपगी शक्ति मुँ चंगौ कोनी करेयौ है, या ईंखातिर नहीं के मैह परमेश्वर गो आदर करां हाँ। बल्कि, बो यीशु है झिकै ईं आदमी नै आपणी शक्ति मुँ चंगो करेयौ है, क्योंकि मैंह यीशु पर भरोसौ करु हां।"

"बे थे ही हो झिकां बिं रोमी राज्यपाल यीशु नै मारण खातिर केयौ हो। थे बिनै मार दियौ झिकौ सारां नै जीवन देवै है। पर परमेश्वर बिनै मरेयां होयाँ मुँ जीवित करेयौ। थे कोनी समझेया कै थे के करै आयो हो, पर जद थे बां कामां नै करै आवै हा, तो झिकौ भविष्यद्वक्‍तां केयौ हो बो पुरौ होयौ। बां केयौ हो मसीह दुःख उठावगौ अर मर जावगौ। परमेश्वर इनै ईं तरीकै मुँ होण दियो। ईंखातिर अब, पश्चाताप करो अर परमेश्वर कानी फिरो, ताके बो थारै पापां नै धोगै साफ कर देऐ।"

जद मंदिर गां अगुवां पतरस अर यूहन्ना नै सुणेयौ, तो बे बहोत घबरा गेया। ईंखातिर बां बानै गिरफ्तार करगे जेल मै घाल दियो। पर झिकौ पतरस केयौ हो बिंगै ऊपर बहोत सारां लोगा विश्वास किरेयौ। यीशु पर विश्वास करणै आलां गी गिणती बध गे लगभग 5,000 हो गी।

अगलै दिन, बे यहूदी अगुवा पतरस अर यूहन्ना नै महायाजक अर अन्य धार्मिक अगुवां गै सामण लेगे आया। बे बिं आदमी नै भी लेगै आया झिकौ अपंग हो। बां पतरस अर यूहन्ना नै पुछेयौ, "किं अधिकार मुं थे बिं अपंग आदमी नै चंगौ करेयौ?"

पतरस जवाब दियो, "औ आदमी झिको थारै सामणै खड़ेयौ है बिनै यीशु मसीह गी सामर्थ गै द्वारा चंगौ करेयो गेयौ है।थे यीशु नै क्रूस पर चढ़ा दियो, पर परमेश्वर बिनै फैर जीवित कर दियौ! थे बिनै अस्वीकार कर दियौ, पर यीशु गै सामर्थ गै माध्यम गै अलावा उद्धार पाणै गो कोई दूसरो मार्ग कोनी है!"

बे अगुवा हैराण हा के पतरस अर यूहन्ना बहोत साहसी रूप मुं बात करी। बां देखेयौ के ऐ साधारण आदमी हा झिका अनपढ़ है। पर फैर बानै याद आयौ के ऐ यीशु गै सागै रेया है। ईंखातिर बां बानै केयौ, "मैंह थानै बहोत ज्‍यादा दंड देवांगां जे थे ईं आदमी यीशु गै बारै मै लोगां नै कोई और संदेश देऔ हो।" हीसि बहोत सी बातां केण गै बाद,बां पतरस अर यूहन्ना नै जाण दियौ।