45. स्तिफनुस अर फिलिप्पुस

पेहलो मसीही अगुवां गै बिच स्तिफनुस नाम गो एक आदमी हो। सारा लोग बिंगो आदर करता हा। पवित्र आत्मा बिनै बहोत सामर्थ अर बुद्धि प्रदान करी ही। स्तिफनुस बहोत सा चमत्कार करेया हा। जद बणै यीशु पर भरोसौ करणै गै बारै मै बानै शिक्षा देई तो बहोत सा लोगां बिंगै ऊपर विश्वास किरेयो।

एक दिन, स्तिफनुस यीशु गै बारै मैं शिक्षा देऐ आवै हो, अर कुछ हिसा यहूदी आया झिकां यीशु पर विश्वास कोनी करेयौ अर बिंगै सागै वाद-विवाद करनो शुरु कर दियो। बे बहोत क्रोधित हो गेया, ईंखातिर बे धार्मिक अगुवां कनै गेया अर बिंगै बारै मै झूठ बोलेयौ। बां केयौ, "मैह स्तिफनुस नै मूसा अर परमेश्वर गै बारै मै बुरी बातां बोलतां सुणेयौ है! "ईंखातिर धार्मिक अगुवां स्तिफनुस नै गिरफ्तार कर लियौ अर बिनै महायाजक अर यहूदियां गै अन्य अगुवां गै सामणै लेगै आया। और भी झूठा गवाह आया अर बां स्तिफनुस गै बारै मै झूठ बोलेयौ।

महायाजक स्तिफनुस नै पुछेयौ, "के ऐ लोग तेरै बारै मैं सच केऐ आवै हैं?" स्तिफनुस महायाजक नै जवाब देण खातिर बहोत सी बातां बोलणी शुरु कर दि। बणै केयौ अब्राहम गै समय मुं यीशु गै समय तक परमेश्वर इस्राएल गै लोगां खातिर बहोत सा अनोखा काम किरेया हैं। पर लोगां हमेशा परमेश्वर गी अनाज्ञाकारिता करी। स्तिफनुस केयौ, "थे सारा लोग परमेश्वर गै विरुद्ध हठीला अर बलवा करण आला हो। थे हमेशा पवित्र आत्मा नै अस्वीकार करेयो है,जियं माहरा पूर्वजां हमेशा पवित्र आत्मा नै अस्वीकार करेयो हो अर हमेशा बिंगै भविष्यद्वक्‍तां नै मार दियौ हो। पर झिकौ बां करेयौ हो बिंगी तुलना मै थै और भी बुरो करेयौ है! थे मसीह नै मार दियो!"

जद बां धार्मिक अगुवां ओ सुणेयो, तो बे ईता क्रोधित हो गेया के बां आपणै कानां नै बंद कर लियो अर ऊँची आवाज मै चिल्लाया। बे स्तिफनुस नै घसीट गै गाँव मुं बारै ले गेया अर बिनै मारण खातिर पत्थर मारेया।

जद स्तिफनुस मरै आवै हो, बो पुकार उठेयौ, "हे यीशु, मेरी आत्मा ग्रहण कर! "फैर बो आपणै घुटणां पर गिर पड़ेयो अर पुकार उठेयौ, "हे प्रभु, औ पाप बांगै ऊपर नां लगाईं। "फैर बो मर गेयौ।

बिं दिन, यरूशलेम मै रेण आलां बहोत सा लोगां यीशु गै अनुयायियां नै सताणौ शुरु कर दियो, ईंखातिर विश्वासी लोग अन्य स्थानां नै भाग गेया। पर ईंगै बावजूद भी, झठै ही बे गेया बां यीशु गै बारै मै प्रचार करेयौ।

फिलिप्पुस नाम गो आदमी यीशु गो एक विश्वासी हो। जियं अन्य बहोत सां विश्वासियां करेयौ हो बो भी यरूशलेम मुँ भाग गेयौ। बो सामरिया गै क्षेत्र मै चलेयौ गेयौ। भठै बणै लोगां मै यीशु गै बारै मै प्रचार करेयौ। बहोत सां लोगां बिंगै ऊपर विश्वास करेयो अर उद्धार पायौ। एक दिन, फिलिप्पुस कनै परमेश्वर कानिऊं एक स्वर्गदूत आयो अर बिनै जंगल मैं जाण खातिर, अर एक सड़क पर चालणै खातिर केयौ। फिलिप्पुस भठै चलेयो गेयौ। जद बो बिं सड़क पर चालै आवै हो, तो बणै एक आदमी नै रथ मैं जांतां देखेयौ। ओ आदमी कूश देश गो एक महत्वपूर्ण अधिकारी हो। पवित्र आत्मा फिलिप्पुस नै केयौ के जागै बिं आदमी गै सागै-सागै चाल ।

ईंखातिर फिलिप्पुस रथ गै कनै गेयौ। बणै सुणेयौ के बौ कूशी परमेश्वर गो वचन पढ़ै आवै हो। झिकौ यशायाह भविष्यद्वक्ता लिखेयो हो बिनै पढ़े आवै हो। बो पढ़े आवै हो, "बे बिनै वध करणै आली भेड़ गै समान ले गेया, अर जियं एक मेमणौ शान्त होवै है, बणै भी एक शब्द कोनी केयौ।बां बिंगै सागै अनुचित व्यवहार करेयो अर बिंगौ आदर कोनी करेयौ।बां बिंगौ प्राण ले लियौ।"

फिलिप्पुस बिं कूशी नै पूछेयौ, "झिकौ तू पढ़े आवै है के तू बिनै समझै भी है?" बिं कूशी जवाब दियौ, "नहीं। जद तांईं कोई मनै ना समझावै, जद तांईं मैं ईनै कोनी समझ सकुं। कृपा करगे मेरै कनै आगे बैठ। यशायाह ओ आपणै बारै मै लिखे आवै हो या किं और गै?"

फिलिप्पुस रथ पर चढ़ गै बैठ गेयौ। फैर बणै बिं कूशी आदमी नै बतायौ झिकौ यशायाह यीशु गै बारै मै लिखेयौ हो। फिलिप्पुस परमेश्वर गै वचन मुँ बहोत सा अन्य भागां गी भी चर्चा करी। ईं तरियां, बणै बिं आदमी नै यीशु गै बारै मै शुभ संदेश सुणायौ।

फिलिप्पुस अर बो कूशी चालतै पाणी गै कनै आया। बिं कूशी केयौ, "देख! हठै पाणी है! के मैं बपतिस्‍मौ ले सकुं हूँ? "अर बणै सारथी नै रथ रोकण खातिर केयौ।

अतः बे पाणी मै चलेया गेया, अर फिलिप्पुस बिं कूशी नै बपतिस्‍मो दियौ। जद बे पाणी मुं बारै आया, तो पवित्र आत्मा अचानक ही फिलिप्पुस नै ऊठा गै किं अन्य स्थान पर ले गेयौ। भठै फिलिप्पुस लोगां नै यीशु गै बारै मै बताणो जारी राखेयो।

बो कूशी आपणै घर गी यात्रा पर आगै बढ़ गेयौ। बो खुश हो के बो अब यीशु नै जाणै है।