46. पौलुस मसीही विश्वासी बण जावै है।

शाऊल नाम गो एक आदमी हो झिकै यीशु पर विश्वास कोनी करेयौ। जद बो जवान हो, बणै स्तिफनुस नै मारणै आलां लोगां गां कपड़ा गी निगरानी करी ही। बाद मै, बणै विश्वासियां नै सताया हो। बणै यरूशलेम मैं घर-घर जागै आदमी अर स्त्री दोनां नै गिरफ्तार करगै जेलखानै मै डाल दियो हो। फैर महायाजक शाऊल नै दमिश्क गाँव जाणै गी अनुमति दी। बणै भठै गा मसीहियां नै गिरफ्तार करणै अर बानै वापिस यरूशलेम लेगै आणै खातिर शाऊल नै केयौ।

अतः शाऊल दमिश्क जाण गी यात्रा शुरु करी।बिं गाँव पहोँचणै मुं थोड़ो ही पेहलां, बिंगै चारां पासै आकाश मुं एक उज्जवल प्रकाश चमकेयौ, अर बो जमिन पर गिर पड़ेयौ। शाऊल किणै केंतां सुणेयौ, "हे शाऊल! हे शाऊल! तू मनै क्यों सताऐ आवै है?" शाऊल पुछेयौ, "हे प्रभु, तू कुण है?" यीशु बिनै जवाब दियौ, "मैं यीशु हूँ। तू मनै सताऐ आवै है!"

जद शाऊल उठेयौ तो बो देख कोनी सकतौ हो। बिंगा मित्र बिनै दमिश्क मै लेगै गेया। शाऊल तीन दिन तक कुछ भी खायो या पियौ कोनी हो।

दमिश्क मै हनन्याह नाम गो एक चेलो हो। परमेश्वर बिनै केयौ, "बिं घर कानी जा झठै शाऊल ठहरेयौ होयौ है।आपणै हाथां नै बिंगै ऊपर रख ताके बो फैर देखणै लागजै।" पर हनन्याह केयौ, "हे प्रभु, मैं सुणेयौ है के ईं आदमी विश्वासियां नै कियां सतायौ है।" परमेश्वर बिनै जवाब दियौ, "जा! मैं बिनै यहूदियां मै अर दूसरी जातियां गा लोगां मै मेरै नाम गी घोषणा करणै खातिर चुण लियौ है। बो मेरै नाम खातिर बहोत कष्ट सहवगौ।"

अतः हनन्याह शाऊल कनै गेयौ,आपणै हाथां नै बिंगै ऊपर राखेयौ, अर केयौ, "यीशु ,झिकौ हठै आण गै तेरै मार्ग मै तेरै ऊपर प्रकट होयौ हो, मनै तेरै कनै भेजेयौ है ताकै तू फैर देखणै लागजै, अर पवित्र आत्मा तनै भर देअ।" तुरन्त ही शाऊल फैर देखणै मै सक्षम हो गयो, अर हनन्याह बिनै बपतिस्‍मो दियौ। फैर शाऊल भोजन करेयौ अर फैर बलवंत हो गयौ।

तभी, शाऊल दमिश्क मैं रेहण आलां यहूदियां मै प्रचार करनो शुरु कर दियौ। बणै केयौ, "यीशु ही परमेश्वर गो पुत्र है!" यहूदी लोग हराण हा, क्योंकि शाऊल तो विश्वासियां नै मार डालण गो प्रयास करेयौ हो, पर अब बणै यीशु मैं विश्वास करेयो हौ। शाऊल यहूदियां सागै वाद-विवाद करेयौ। बणै दिखायौ के यीशु ही मसीह हौ।

बहोत दिनां बाद, यहूदियां शाऊल नै मार डालणै गी योजना बणाई।बां बिनै मार डालणै खातिर गाँव गे फाटक पर लोगां नै भेजेयौ। के बिंगी निगरानी करै पर शाऊल बिं योजना गै बारै मै सुण लियौ हो, अर बिंगै मितरा बिनै बचा गै निकलण मै बिंगी उसकी सहायता करी। एक रात बां बिनै टोकरी मै बैठा गै गाँव गी दीवार परू नीचै उतार दियौ। दमिश्क मुं बच गे निकलण गै बाद शाऊल यीशु गै बारै मै प्रचार करना जारी रखेयौ।

शाऊल प्रेरितां नै मिलण खातिर यरूशलेम गेयौ, पर बे बिमुं डरता हा। फैर बरनबास नाम गो एक विश्वासी शाऊल नै प्रेरितां कनै लेगै गेयौ।बणै बानै बतायौ के शाऊल किंयां साहसी होगै दमिश्क मै प्रचार किरेयौ हो। बिंगै बाद, प्रेरितां शाऊल नै स्वीकार कर लियौ।

कुछ विश्वासी झिका यरूशलेम गै सताव मुँ भाग गेया हा बे दूर अंताकिया गाँव मै चलेया गेया अर यीशु गै बारै मै प्रचार करता हा। अंताकिया मै रेहण आला लोग अधिकतर यहूदी कोनी हा, पर पहली बार, बामुं बहोत सा लोग विश्वासी बण गेया। बरनबास अर शाऊल आं नयां विश्वासियां नै यीशु गै बारै मै अर अधिक सिखाण खातिर भठै गेया कलीसिया नै मजबूत करेयौ। यीशु पर विश्वास करणै आला पहली बार अंताकिया मै ही "मसीही" कवाया।

एक दिन, अंताकिया गा मसीही लोग उपवास गै सागै प्रार्थना कर रेया हा। पवित्र आत्मा बानै केयौ, "मेरै खातिर बरनबास अर शाऊल नै बिं काम नै करणै खातिर अलग कर देयौ झिकौ करणै खातिर मैं बानै बुलायौ है।"ईंखातिर अंताकिया गी कलीसिया बरनबास अर शाऊल खातिर प्रार्थना करी अर बांगै ऊपर आपणै हाथां नै रख दियौ।फैर बां बानै अन्य बहुतां स्थानां पर यीशु गै बारै शुभ संदेश गो प्रचार करणै खातिर भेज दियौ। बरनबास अर शाऊल अलग-अलग जातियां गां लोगां नै शिक्षा देई, अर बहोत सा लोगां यीशु पर विश्वास करेयौ।