50. यीशु वापिस आवै है।

लगभग 2,000 सांला मुँ, संसार मै सारा स्थाना पर जादा मुँ जादा लोग मसीह यीशु गै बारै मै शुभ संदेश सुणण लागरेया हैं। कलीसिया बघण लागरी है। यीशु वायदो करेओ के संसार गै अंत मै वापिस आवगो। जे बो अभी वापिस कोनी आयो है, फेर भी आपग वाद नै पूरो करगो।

जद कि आपा यीशु गै वापिस आण गो ईंन्‍तजार करा हां, परमेश्वर मांरै सागै ईं रीति मुँ जीवन जीण गी ईच्‍छा करतो है जो पवित्र है अर झीको बिंगो आदर करतो है। जद यीशु पृथ्वी पर रेण लागरेओ हो तब बण केयो, "मेरा चेला संसार भर मै सारी जगां गै लोगा नै परमेश्वर गै राज्य गै बार मै शुभ संदेश प्रचार करैगा, अर तब अंत आ जावगो।"

बोत सारि जातियां अब ताईं यीशु गै बारै मै कोनी सुणेयो है। स्वर्ग मै जाण मुँ पहेलां, यीशु मसीहियां नै बिं लोगां नै शुभ संदेश सुणाण नै केयो झीकां बिंन कदी कोनि सुणेयो है। बण केयो, "जाओ अर सारि जातिया ग लोगां न चेलो बणओ !" अर "कटाई करण गै खतिर खेत पक चुकेया हैं!

यीशु ओ भी केयो, "कोई भी आदमी गो सेवक स्‍वामी मुँ बड़ो कोनी होवै। ईं संसार गा महत्वपूर्ण लोगां मेर सागै नफरत करी, अर मेरै कारण बै थानै सतावगा अर मार देवगा। ईं संसार मै थनै दूखी होओगा, पर मज़बूत बणो, क्योंकि मै शैतान नै हरा दियो है झीको संसार पर राज करै है। जे थे अंत तक मेरा विश्वासयोग्य बणेया, तो परमेश्वर थानै बचावगो!"

यीशु आपगै चेलां नै ओ समझाण खातिर एक कहाणी सुणाई के जद संसार गो अंत होवगो तो लोगां सागै के होवगो।बण केयो, "कोई आदमी आपगै खेत मै आच्‍छो बीज बोयो। जद बो सोण लागरेयो हो तो बिंगो शत्रु आयो अर गेहूँ गै बिजां मै जंगली पौधा गै बीजां नै बो दियो , अर फेर बो जान्‍तो रेयो।"

जद पौधा निकलेया तो सेवकां बिं आदमी नै केयो, 'हे स्वामी, तू तो आपग खेत मै आच्‍छो बीज बोयो हो। तो फेर ईंग मां जंगली पौधा क्यों हैं?' बिं आदमी जवाब दियो, 'मेरो शत्रु ही बिन बोणो चावगो। ओ मेरो कोई शत्रु है झिकै ईयां करेयो है।'

"बाँ सेवकां आपगै स्वामी नै जवाब दियो, 'के मानै जंगली पौधा नै उखाड़ना चाईऐ?' बिं स्वामी केयो, 'ना। जे थे ईयां करोगा तो कुछ गेहूँ नै भी उखाड़ देओगा। कटाई गै समय तक ईन्‍तजार करो। फेर जंगली पौधां नै गांठां मै ईकठो कर लेओ के थे बिंन जला सको। पर गेहूँ मैर खत्ते मै लेगे आओ।'"

चेलां ईं कहाणी गै मतलब नै कोनी समझेयो, ईखातिर चेलां यीशु कनु समझण गी वीनति करी। यीशु केयो, "आच्‍छो बीज बिजण आलो आदमी मसीह है। खेत संसार है।आच्‍छो बीज परमेश्वर गै राज्य गा लोग है।"

"जंगली पौधां बिं दुष्ट जन, शैतान गा लोग हैं। बिं मनुष्य गो शत्रु शैतान है, जण जंगली पौधां नै बो दियो हो। कटाई संसार गो अंत है, अर कटाई करण आला परमेश्वर गा स्वर्गदूत हैं।"

"जद संसार गो अंत होवगो तब स्वर्गदूत बि सारै लोगां नै एक साथ इकट्ठो करगो झिका शैतान गा हैं। बे स्वर्गदूत बानै एक बहुत ही गर्म आग मै फेंक देंवगो।बठ बे लोग भयंकर सताव मै रोवगा अर आपग दाँत पिसगा। पर झीका लोग धर्मी हैं, जी लोगां यीशु गै पीछ चालेया है, बे परमेश्वर पिता गै राज्य मै सूरज गी तरियां समान चमकगा।"

यीशु ओ भी केयो के बो संसार गै अंत होण मुँ पहेलां पृथ्वी पर आवगो। बो बि तरिका मुँ वापिस आवगो जीयां बो गेयो हो। अर्थात, बिंग कनै वास्तविक शरीर होवगो, अर बो आकाश मै बादलां पर सवार होगे आवगो। जद यीशु आवगो है, तो हर एक मसीही झीका मर गेया हैं मरेया मुँ जी उठगा अर बिगै सागै आकाश मै मिलगा।

तब झीको मसीही अभी भी जीवित हैं बे आकाश मै उठा लिया जावगा अर दूसरा मसीयां गै सागै शामिल हो जावगा झीका मरेया मुँ जी उठता हैं।बे सारा भठे यीशु गै सागै होवगा। बिंगे बाद, यीशु आपगे लोगां गै सागै रेवगो। जद बे एक सागै रेवै हैं तो बांग कनै सदा गै खातिर पूरी शान्ति होवगी।

यीशु पर विश्वास करण आला हर एक जन नै एक मुकुट देण गी प्रतिज्ञा करी है। बे सदा गै खातिर परमेश्वर गै सागै हर एक चीज पर राज करगो। बिंग कनै सिद्ध शान्ति होवगी।

पर परमेश्वर बां सारां गो न्याय करगो झिका यीशु पर विश्वास कोनी करता हैं। बो बानै नरक मै डाल देवगो। बठे बे रोवगा अर आपग दाँत पीसगा, अर बे हमेशा पीड़ित होंता रेवगा। कदी ना बुझण आली आग बाने लगातार जलांती रेवगी, अर किड़ा बाने खाण मुँ कदी कोनि रुकेगा।

जद यीशु लोटैगो, तो बो पूरी तरियां शैतान नै अर बिंगै राज्य नै नष्ट कर देवगो। बो शैतान नै नरक मै डाल देवगो। बठे शैतान हमेशा खातिर जलतो रेवगो, बां सारा गै सागे झीका परमेश्वर गी बातां ने छोड़गे शैतान गै पीछ चालण गो चुनाव करेयो हो।

क्योंकि आदम अर हव्वा परमेश्वर गी अनाज्ञाकारिता करी ही अर पाप नै ईं संसार मै लेगे आया हा, परमेश्वर बिंन श्राप दियो अर बिंन नष्ट करण गो फंसलो करेयो। पर किसै दिन परमेश्वर एक नए स्वर्ग अर एक नई पृथ्वी गी रचना करगो झीका सिद्ध होंवगा।

यीशु अर बिंगा लोग बिं नई पृथ्वी पर रेवगा, अर बो सदा खातिर सारी चीजां पर राज करगो । बो लोगां गी आँखेयां मुँ हर एक आँसू नै पोंछ देवगो। अब कोई भी पीड़ित या दुःखी कोनी होवगो। बे रोवगा कोनी। बे बीमार कोनी होवगा या मरगा कोनी।अर बठे कुछ भी बुराई कोनी होवगी। यीशु आपग राज्य पर न्यायपूर्वक, अर शान्ति गै सागै राज करगो। बो हमेशा खातिर आपग लोगां गै सागे रेवगो।