9. परमेश्वर मूसा नै बुलावै है

यूसुफ गै मरण गै बाद बीगा सारा रिश्तेदार मिस्र मै बस गेआ। बे अर बांगा वंशज कई सालां ताईं मिस्र मै ही रेआ अर बां बोत संताना पेदा करी। बे इस्राएली कवाया।

कई सौ सालां गै बाद, इस्राएलियां गी संख्या बोत बढ़गी ही। अर मिस्री लोग अब युसुफ गै कामां नै भुल गेया हा के बांगी मदद करणै खातिर यूसुफ बोत कुछ करेओ हो। बे इस्राएलियां कनु डर गेयौ क्योंकि बे संख्या मै बांमुँ बोत जादा हा। ई खातिर बीं

मिस्रिया इस्राएलियां नै बोत सारी इमारतां अर हठै तक कि कई नगरा नै बणाण खातिर मजबूर करेओ। बीं मुशकिल परिश्रम बांग जीवना नै बड़ो दुखी बणा दिऔ,पर परमेश्वर बानै बरकत दी अर बांगी और बोत संताना पेदा होई।

फिरौन देखेओ के इस्राएलियां गै बोत संतानां पैदा होए आवा ही, ई खातिर बण आपग लोंगा नै इस्राएलियां गा सारां नर बच्‍चां नै नील नदी मै फेंकगे मारण गो आदेश दिओ।

एक खास इस्राएली स्त्री एक नर बच्चे नै जन्म दिओ। बणै अर बिंगै पति जीतो बां कनू हो सकेऔ बीं बच्चे नै छिपागे राखेओ।

जद बी बालक नै माता-पिता और जादा ना छिपा सकेआ, तो बिनै मरण मूँ बचाण खातिर एक तेरण आली टोकरी मै नील नदी गै किनारै पर सरकंड़ा गै बीच मै रख दिओ। बींगी बड़ी बहन ओ देखण खातिर बीगी निगरानी करी के बींगै सागै के होवगो।

फिरौन गी पुत्री बीं टोकरी नै देखगे बिंगै मां झाँकी।जद बणै एक बच्चे नै देखेओ तो बणै बिंनै आपणै बच्चे गै रूप मै ले लिओ। बणै एक इस्राएली स्त्री बिनै दूध पिलाण खातिर काम पर राख लिओ, बिना ओ जाणे के बो बिं बच्चे गी असली माता ही। जद बो बच्‍चौ इतो बड़ो हो गेओ के अब बिणै आपगी माता गै दूध गी जरुरत कोनी ही, तो बिंनै फिरौन गी पुत्री नै कनै लौटा दिओ, बिंगो नाम मूसा हो।

एक दिन, जद मूसा बड़ो होगेओ हो, तो बण देखेओ के एक मिस्री एक इस्राएली पिट रेओ है। मूसा आपगै साथी इस्राएली नै बचाण गी कोशिश करी।

जद मूसा सोचेओ के बिनै कोई कोनी देखगो तो बण बिं मिस्री नै मार दिओ अर बिंगि लाश नै दफना दिओ। पर मूसा झीको की करेओ हो बिनै कोई देख लिओ हो।

फिरौन नै पतो चाल गेओ मूसा के करेओ है। बणै बिंनै मारण गी कोशिश करी, पर मूसा मिस्र मुँ जंगल मै भाग गओ। फिरौन गा सैनिक बिनै भठै खोज ना सकेआ।

मुसा मिस्र देश मुँ दूर मिधान देश मै रैण लाग गेयो अर बठै एक लड़की सागै बेया कर लिओ अर दो पुत्र पैदा होया।

मूसा आपगै ससुर गी भेड़ा गै झुंड गी देखभाल करतो हो। एक दिन, बण एक बलती होई झाड़ी नै देखेओ झिकी भस्म होए बिना बलण लागरी ही।बिनै देखण खातिर बो झाड़ी गै कनै गेओ।जद बो जादा कनै गेओ तो परमेश्वर बिगै सागै बात करी। बणै केओ, "हे मूसा, आपगै जूतां उतार दे। तू एक पवित्र स्‍थान पर खड़ेओ है।"

परमेश्वर केओ, "मै आपगै लोगां गा दुःखां नै देखेओ है। मैं तनै फिरौन गै कनै भेजूँगा ताकि तू इस्राएलियां नै मिस्र गी गुलामी मुँ निकाल गै ले आवै। मै बांनै कनान देश देऊँगा, बो देश जिनै मै अब्राहम, इसहाक अर याकूब सागै प्रतिज्ञा करी है।"

मूसा पूछेओ, "जे लोगां पुछेओ के मनै कणै भेजेओ है तो मैं के केऊँ? "परमेश्वर केओ, "जो मैं हूँ सो मैं हूँ। बणै केओ, 'मैं हूँ नै मनै थारै कनै भेजेओ है।'बणै ओ भी केओ, 'मैँ थारा पूर्वजं अब्राहम, इसहाक अर याकूब गो परमेश्वर यहोवा हूँ।' मेरो ओ नाम सदा गो है।"

मूसा डरतो हो अर फिरौन गै कनै कोनी जाणो चान्‍तो हो क्योंकि बणै सोचेओ के बो आच्‍छो कोनी बोल सकगो, ई खातिर परमेश्वर मूसा गा भाई, हारून, न बिंगी मदद करण खातिर भेजेओ।