8. परमेश्वर यूसुफ अर बिंगै परिवार नै बचाव है
कई सालां बाद, जद याकूब बूढो हो गेऔ हौ, तो बणै आपण प्यार पुत्र यूसुफ ने बींगै भाइयां गी जाँच करणै खतीर भेजेऔ झिका जानवरां गै झुंडा गी देखभाल करै आवै हा।
यूसुफ गा भाई बिग साग जलन करता हा क्योंकि बांगो पिता बीगै सागै जादा प्रेम करतो हो अर ई खातिर भी के यूसुफ सपणो देखेओ हो कि बो बांगो राजा हो जावगो। जद यूसुफ आपगै भाइयां कनै गेऔ तो बानै बिणै गुलाम बणा लिऔ अर बणै दासां गो व्यापार करणै आला नै बेच दिऔ।
घर वापिस लौटण मुँ पेहला यूसुफ गै भाइयां यूसुफ गा कपड़ा फाड़गे बकरी गै खुन मै भिगो दियो। फेर बे बो कपड़ा आपणै पिता नै दिखायो के बो सोचगो के कोई जंगली जानवर यूसुफ नै मार दिओ है। याकूब बोहत उदास हो।
दासां गो व्यापार करण आला बे लोग यूसुफ नै मिस्र ले गेया। नील नदी गै किनारै पर बसेऔ होयो मिस्र एक विशाल अर शक्तिशाली देश हो। बां दासां गो व्यापार करणै आला यूसुफ नै एक धनी सरकारी अधिकारी नै दास गै रूप में बेच दिओ। यूसुफ आपगै स्वामी गी आच्छि तरिआं सेवा करी, अर परमेश्वर यूसुफ नै बरकत देई।
बिंग स्वामी गी पत्नी यूसुफ गै सागै नाजायज रिशता बणाण गि कोशिश करी, पर यूसुफ ईं रीति मुँ परमेश्वर गै खिलफ पाप करण मुँ इंकार कर दिऔ।बा गुस्सौ हो गई अर यूसुफ पर झूठो आरोप लगा दिऔ, ईं खतिर बिनै गिरफ्तार करगे जेलखान मै भेज दिऔ। हठ ताईं जेलखान मै भी, यूसुफ परमेश्वर गै प्रति सच्चौ रेऔ, अर परमेश्वर बिनै आशीष देई।
दो सालां बाद, यूसुफ हजे ताईं भी जेलखाने मै हौ, भले ही बौ निर्दोष हौ। एक रात, फिरौन, जियां मिस्री लोग अपणै राजावां ने पुकारता हा, बां दो सपना देखेआ झिकां बानै बहोत हि परेशान हो गेया। बिंगो कोई भी सलाहकार बिनै बिं सपनां गौ अर्थ कोनि बता सकेऔ।
परमेश्वर यूसुफ नै सपनां गो अर्थ बताण गी समझ प्रदान करी ही, ईं खातिर फिरौन यूसुफ नै जेलखानै मुँ आपगै कनै बुलाओ। यूसुफ बिनै बिं सपनां गो अर्थ बताओ अर केओ, "परमेश्वर भरपूरी गी फसलां आल सात सालां बाद अकाल गा सात साल भेजण आलो है।"
फिरौन यूसुफ मुँ इतो खुश होऔ के बिन मिस्र गो दुसरा सारां मुँ शक्तिशाली आदमी घोशित कर दिओ।
यूसुफ लोगों नै आच्छी फसलां आला सात सालां गै दौरान बड़ी मात्रा मै अनाज जमा करणै खातिर केओ। जद सात सालां गो अकाल आओ फेर यूसुफ लोगों नै बो अनाज बेचेओ कै बांगै कनै खाण खतिर अनाज होवै।
बो अकाल केवल मिस्र मै ही कोनी, पर कनान देश मै भि भयंकर हो झठ याकूब अर बिंगो परिवार रेहंता हा।
ईं खातिर याकूब आपणै सारां मुँ बड़ा पुत्रां नै अनाज खरीदण खतिर मिस्र भेजेओ। जद बे अनाज खरीदण खतिर यूसुफ गै सामणै खड़ा होआ तो बां भाइयां यूसुफ नै कोनी पचाणेओ। पर यूसुफ बानै पहचाण लिओ।
आ जाणन खातिर के बे बदल गेआ है बांगी जाँच करणै बाद, यूसुफ बानै केओ, "मैं थारो भाई यूसुफ हूँ! डरो ना। जद थे मनै दास गै रूप मै बेचेओ हो तो थे बुरो करणै गी ठानी ही, पर परमेश्वर बिं बुराई नै भलाई गै खातिर उपयोग करेओ! आओ अर मिस्र मै रेओ के मै थारै अर थारै परिवारां खातिर अनाज गो प्रबंध कर सकूँ।”
जद यूसुफ गा भाई घर वापिस आया अर आपणै पिता याकूब नै बताओ के यूसुफ हजे ताईं जिंदा है तो बौ बहोत खुश होऔ।
हालाँकि याकूब एक बुढौ आदमि हो तौभी बो आपण पूरै परिवार सागै मिस्र जांतो रेओ, अर बे बठै बस गेआ। याकूब गै मरण मुं पेहलां, बणै आपगै हरेक पुत्रां नै आशीषित करेओ।
वाचा गी बा प्रतिज्ञावां झिकी परमेश्वर अब्राहम मुँ करी ही बे इसहाक पर अर बिंगै बाद याकूब, अर बिंगै बाद बिगै बारह पुत्रां अर बांगै परिवारा पर आ गेई हि। बां बारह पुत्रां गा वंशज इस्राएल गा बारह गोत्र बण गेया।
उत्पत्ति अध्याय 37-50 मुँ एक बाइबल गी कहाणी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।