7. परमेश्वर याकूब नै बरकत देव है

जद बे बच्‍चा बड़ा होया तो याकूब नै घर पर रेणो आच्‍छो लागेओ, पर एसाव नै जानवरां गो शिकार करणो भायो। रिबका याकूब सागै प्‍यार राखेओ, पर इसहाक एसाव मुँ प्‍यार राखतो।

एक दिन, जद एसाव शिकार करगे वापिस आयो तो बो बोत भुखो हो। “एसाव याकूब नै केओ, झीको तु पकायो है बिगै माऊ थोड़ा भोजन मनै दे।” याकूब जवाब दिओ “पैलां मेरै सागै प्रतिज्ञा कर कि पहलौठो होण कारण हर एक चीजं जो तनै मीलगी, बो सारो मनै देवगो।” एसाव सारि चीजां याकूब नै देण गी प्रतिज्ञा कर दी। जद याकूब बीन कुछ भोजन दिओ।

इसहाक एसाव नै बर्कत देणो चान्‍तो हो। पर ईमु पेहलां बणै ईया करेओ, रिबका अर याकूब नै एसाव होण गो ढोंग करगे बिग सागै धोखो करेओ। इसहाक बूढो हो अर अब देख कोनी सके हो। ईं खातिर याकूब एसाव गा कपड़ा घालगे अर बकरी गी खाल आपण गले अर हाथां पर लपेट लिओ।

याकूब इसहाक गै कनै आयो अर केओ, "मैं एसाव हूँ। मैं ई खातिर आयो हूँ कि तू मनै बरकत देय।" जद इसहाक बकरी गै बालां नै महसूस करेयो अर कपड़ा नै सूँघेओ, तो बण सोचेओ के बो एसाव है अर बण बरकत दी।

एसाव याकूब मुँ जलन करी के याकूब बिगै पैहलां पुत्र गो अधिकार अर सागै बिगी बर्कत नै चोर लीओ हो। बण बिगै पिता गै मरण गै बाद याकूब नै मारण गी योजना बणाई।

पर रिबका एसाव गी योजना नै सुण लिओ। ई खातिर बणै अर इसहाक याकूब नै बिगै रिश्तेदारां गै सागै रेण खातिर बोत दुर भेजेओ।

याकूब कई साला तक रिबका गै रिश्तेदारां गै सागै रेओ। बि समय मै बणै बेया कर लिओ अर बारह पुत्र अर एक पुत्री नै जन्माओ। परमेश्वर बणे बोत धनी बणा दिओ।

बीस सालां तक कनान देश मै आपगै घर मुँ दूर रेण गै बाद, याकूब आपणै परिवार, आपणै सेवकां, अर आपणै जानवरां गै सारा झुंड़ा नै सागै लेगे बठै वापिस आओ।

याकूब ई खातिर बोत ड़रेड़ो हो क्योंकि बणै सोचेओ के एसाव अब भी बीनै मारणो चावै हो। ई खातिर बिणै उपहार रूप जानवरां गा झुंड़ा नै एसाव कनै भेजेओ। झीको सेवक बी झुंड़ा नै लेगे गेआ हा बे केओ, "तेरो दास याकूब, इन जानवरां नै तनै देवै है। बो जल्दी ही आणै लागरेओ है।"

पर एसाव अब याकूब नै नुकसान पहुँचाणौ कौनी चांतौ हौ। ईगै बावजुद बौ बिनै दौबारा देख गै बहौत खुश हौ। बिंगै बाद याकूब कनान देश मै आराम मुँ रेऔ। फेर इसहाक मर गेऔ अर याकूब अर एसाव बिनै मिटि देई। वाचा गी प्रतिज्ञा झिकि परमेश्वर अब्राहम सागै करि ही बे अब इसहाक मुँ याकूब पर आगी।