12. बाहरे जिबाटा

इसरायली लोगमन मिस्र ले निकली करी खुबे हरिक रहुआत। हाय मन अबर नौकर ना रहूआत, आउरी हाय मन प्रतिज्ञार देश ने जायते रहूआत! जोन टा बले इसरायली मन माँगुआत मिस्री मन हाय सबु के देउआत, एथानले बले सोना आउरी चाँदी आउरी दूसरा महगा टा मन देउआत। अलगा देशर खिनिक मा लोग मन मापरु ऊपरे विश्वास करूआत आउरी जेबे इसरायली मन मिस्र थानले निकलू आत तेबे हाय मन बले तिकरी संगे मीली जाऊआत।

दिन बेरा बादरीर गोटक बड़े खम्बा तिकर् छोमे –छोमे हिंडला। आउरी राती बेरा हाय जोय र खम्बा बनी गला। मापरु जोन कि हाय बादरीर खम्बा थाने आउरी जोय र खम्बा थाने रहूआय, हमेशा तिकर संगे रहूआय आउरी हाय सफ़र करबा दाय तिकर अगुआई कारुआय। हाय मनके सिर्फ अतक करबा टा रहूआय कि हातार पीटी बाटे हिन्डोत।

खिनिक मा बेरा र बाद, फिरोन आउरी हातार लोगमन अपना मन के बदलू आत। हाय मन इसरायली मनके फिरले गुलाम बनायबार चायते रहूआत। एकाचे हाय मन इसरायली मनर पीछा करूआत एटा मापरु रहूआय जोन तिकर मन के बदली रहूआय। हाय अमता एकाचे करू आय कायकाचे कि हाय चाहते रहुआय कि सबु लोग एटा जनोत कि फिरोन ले आउरी मिस्री मनर सबु देवता मनले हाय, यहोवा खुबे सक्तिशाली आय।

जेबे इसरायली मन मिस्र र सेना र आयबाटा के दखुआत तेबे हाय मनके मालूम होऊ आय कि फिरोन र सेना आउरी लाल समुंद र मजिगता फंसी गलु। हाय मन खुबे डरी जाउआत आउरी कान्दके मुराउआत, "हामी मिस्र के कयकाचे छाड़लु? हामी मोरू आव बे!"

मूसा इसरायली मनके बोलू आय कि, "डरबाटा बंद करा! मापरु आजी तोमर काचे लड़सी आउरी तोमके बचायसी।" तेबे मापरु मूसा के बोलुआय, "ए लोग मन के लाल समुंद बाटे आगे जीबा काचे बोल।"

तेबे मापरु हाय बदरिर खम्बा के धरिकरी इसरायली आउरी मिस्री मनर मजी गता सोंगाय देउआय कि मिस्री मन इसरायली मनके दखके ना सकोत।

मापरु मूसा के समुंद थाने हाथ बड़ायबा काचे बोलुआय। पाचे मापरु हवा ले पानी के डेबरी बाटे आउरी बुजनी बाटे करी देउआय, जार लागी करी समुंद्र थानले होई करी गोटक बाट बनी जाउआय।

इसरायली लोग अपना दुनो बाटे पानी र काति र संगे सुकला माटी थाने होइकरी हिंडूआत।

तेबे मापरु हाय बाट ले बादरी के उठाय देउआय कि मिस्री लोग मन इसरायली लोग मनके बाची करी जीबा दाय दखोत। मिस्री मन हाय मन के धरबा काचे तिकर पीछा करबार निर्णय धरुआत।

अतः हाय मन समुन्द्र र जरिया ले हाय बाट थाने इसरायली मनर पीछा करुआत, मानतर मापरु मिस्री मनके घबराय देउआय आउरी तिकर रथ मनके अटकाय देउआय। हाय मन चिचायके मुराउआत, "पोरा! इसरायली मन बाटले मापरु लड़सी आचे।"

सबु इस्राएली समुद्र र दूसरा बाटे खेटी गलाय। तेबे मापरु मुसा के बोलला कि हाय आउरी पानी ताने हाथ बड़ाव। जड़क दाय मुसा असन करहूआय, तेबे पानी मिस्रर सेना मन थाने आई गला आउरी खुदर पयलर जसन होई गला। सबु मिस्रर सेना बुड़ी गलाय।

जड़क दाय इस्राएली मन दकलाय कि मिस्री मन मोरी जाई रेलाय तेबे हाई मन मापरु र ऊपरे भरोसा करुआत। हाय मन विशवास करुआत कि मूसा मापरु बाटर भाविषयवक्ता रहूआय।

इसरायली मन एकाचे बले खुबे हरिक रेलाय कायकाचे कि मापरु हाय मनके आउरी दास होयबा ले बाचाय रहूआय। अबर मापरु र आराधना करबा काचे आउरी हातार आज्ञा र पालन करबा काचे आजाद रेलाय। इसरायली मन अपना आजादीर परब बनायबा काचे आउरी मापरुर परसंसा करबा काचे कई गीत के गाउआत कायकाचे कि हाय हाय मनके मिस्री मनर सेना ले बचाय रहूआय।

मापरु इसरायली मनके हर बोरस गोटक परब बनायबार देउआय ए याद करबा काचे कि कसन मापरु मिस्री मन के हारायला आउरी हाय मनके दास होयबा ले आजाद करहूआय। एटा फसहर परब बोलाय होई रहूआय। इथाने हाय मनके परब बनायबा काचे गोटक स्वस्थ मेमना के बली करबा टा रहूआय, ताके भूंज बाटा रहूआय, आउरी हाके बिना खमीरर रोटी संगे खयबा टा रहूआय।