13. इस्राएली मन संगे मापरुर किरिया

इसरायली मनके लाल समुन्द्र ले नकाय करी नेलार पाचे, मापरु हाय मनके झार ले होई करी सीनै बोलाय होयबा बीती परबत बाटे धरी करी जाउआय। एटा हाई परबत रहूआय जोन थाने मूसा पोड़बा बीती झाड़ी के दखी रहूआय। हाय लोग मन हाय परबतर तले खुदर लाड़ी के बनाउआत।

मापरु मूसा आउरी इसरायलर सबु लोग मनके बोलुआय, ”अगर तोमी मोर आज्ञा के मानबास, आउरी मोर वाचार पालन करबास, तो सबु लोग थाने तोमी मोर निज धन ठहरबास, आउरी तोमी मोर नजर ने याजक मनर समाज आउरी पवित्र जाती ठहरबास।”

मापरु द्वारा तीकर लगे आयबा काचे लोग मन तीन दिन तक खुद के तीयार करूआत। तेबे मापरु सीनै परबतर टिप थाने तले उतरु आय। जेबे हाय आउआय तो भूकंप होउआय, बिजली चमकुआय, कुमरा उठुआय, आउरी मोरी मनर जोरदार शब्द होउआय। तेबे मूसा खुद उपरे परबत ने चेगुआय।

तेबे मापरु लोग मन संगे गोटक वाचा बांधुआय। हाय बोलुआय, ”मुई तोमर मापरु, यहोवा आय। मुई आय जोन तोमके मिस्रर गुलामी ले छाड़ायली। कोनी दूसरा देवतार उपासना ना करा।”

“मुरती ना बना आउरी तीकर उपासना ना करा, कायकाचे मुई, तोमर गोटकिच मापरु आय। गलत रीती ले मोर नामर उपयोग ना करा। सब्त के दिन के पवित्र मानबा काचे सुरता सोंगा। दूसरा शब्द ने, छय दिन तक खुदर सबु काम के करा, सातवाँ दिन तोमर काचे विश्राम करबार आउरी मोके सुरता करबार दिन आय।”

“खुदर माँ आउरी बुआर आदर करा। हत्या ना करा। व्यभिचार ना करा। चोरी ना करा। खुदर पड़ोसीर बायले, हातार घर, या हातार कोनी बले सामान के धरबार मोन ना करा।”

तेबे मापरु ए दस आज्ञा के पोकनार दुई ठन पट्टी थाने लिखी करी मूसा के दी देउआय। मापरु पालन करबा काचे लोग मनके दूसरा खुबे व्यवस्था मनके देउआय। अगर हाय मन ए व्यवस्था के पालन करबाय तो मापरु हाय लोग मनके आशीष देयसी आउरी तीकर सुरक्षा करबार प्रतिज्ञा करूआय। मांतर हाय बोलुआय की अगर हाय मन एतार पालन ना करेत तो हाय तीके दण्डित करसी।

मापरु इसरायली मनके गोटक बड़े बीती लाड़ी बनायबा काचे बले बलुआय – मिलाप बीती तम्बू। हाय हाय मने ठीक ठीक सांगी दी रहूआय कि ए लाड़ी के कमता बनायबार आय, आउरी हातार भितरे कोन चीज मनके सोंगायबार आय। हांय तीके हाय बीती तम्बू के दुई बाकरा थाने बाटबा काचे गोटक बड़े परदा के बनायबा काचे बले बोलुआय। मापरु हाय परदार पिटीबाटर बाकरा ने आयसी आउरी हाय थाने रेयसी। जोन लगे मापरु रहूआय हाय बाकरा थाने आयबार अनुमति सिर्फ महायाजक के रहूआय।

हाय लोग मनके मिलाप बीती तम्बूर छोमे गोटक बेदी बनाय के पड़सी। जोन बले मापरुर व्यवस्था के ना मानसी हांय हाय बेदी लगे गोटक जानवर के धरी करी आनो। तेबे याजक हाके बली करसी आउरी बेदी थाने मापरु काचे बली करबा काचे पोड़ायसी। मापरु बोलला कि हांय जानवरर लहू हांय मानेर पाप के ढाकसी। ए रीती ले, अबर मापरु हाय पाप के ना दखसी। हांय माने मापरुर नजर ने शुद्ध ठहरसी। मापरु मूसार भाई हारून के आउरी हारूनर वंस के अपना याजक होयबा काचे चुनला।

मापरु हांय लोग मनके जोन नियम दिरे हाय मन पालन करबा काचे सहमत होउआत। हाय मन केवल मापरुर लोग होयबा काचे आउरी केवल हातार आराधना करबा काचे सहमत होउआत।

कई दिन ले, मुसा सीनै परबतर उपरे रहूआय। हांय मापरु ले गोटाय ते रहूआय। मांतरलोग मन तिकर लगे लेवट बाटा के टाकि टाकि थकी जाउआत। एकाचे हाय मन हारून लगे सोना धरी करी अनुआत आउरी हाके गोटक मुरती बनायबा काचे बोलुआत ताकि हाय मन मापरु के छाड़ी करी तार उपासना करके सकोत। ए रीती ले, हाय मन भयंकर रुप ले मापरुर विरुद्ध ने पाप करुआत।

हारून बाचा पीलार आकार ने सोनार गोटक मूर्ति बनाउआय। हाय लोग मन मुरतीर उपासना कारबार सुरु करी देलाय आउरी हाके बली चड़ाऊआत! तिकर पापर कारण ले मापरु तिकर ले खुबे रिस होई रहूआय। हांय हाय मनके नास करी देबार चाहते रहुआय। मांतरमूसा हाय मनके ना मारबा काचे मापरु ले निवेदन करूआय। मापरु हातार निवेदन के सुनु आय आउरी हाय मनके नास ना करूआय।

आखिरी ने मूसा सीनै परबत ले तले उतरुआय। हांय हाय दुनो पोकनार पट्टी के धरी रहूआय जोन थाने मापरु दस आज्ञा के लिखी रहूआय। पाचे हांय हाय मुरती के दखुआय। हांय अतक रिसा होऊआय कि हांय हाय पट्टी मनके टूटाय देउआय।

पाचे मूसा हाय मुरती के पीसी करी हातार बुरादा बनाय देला, आउरी बुरादा के पानी ने मिलायकरी हाय लोग मनके हाय पियाय देला। मापरु हाय लोग मन उपरे गोटक विपति पोटाऊआय हाय थानले खुबे लोग मन मोरी जाउआत।

जोन पट्टी मनके मूसा टूटाय रहूआय तिकर जागा धरबा काचे मूसा हाय दस आज्ञा बीती पोकनार पट्टी के बनाऊआय। तेबे हाय आउरी परबत ने चेगुआय आउरी पारतना करूआय कि मापरु हाय लोग मनके माफ़ करो। मापरु मूसार सुनु आय आउरी हाय मनके माफ़ करी देऊआय। नुआ पट्टी ने दस आज्ञा के धरी करी मूसा परबत ले तले उतरी आऊआय। तेबे मापरु सीनै परबत ले धरी करी प्रतिज्ञार देस तक इसरायली मनर अगुआई करूआय।