21. मापरु मसीहर प्रतिज्ञा करूआय

जेबे मापरु संसार के बनाय रहूआय, हाय जानते रहुआय कि हाके पाचे कोनी दिना मसीह के पटाय के पड़सी। हाय आदम आउरी हव्वा ले प्रतिज्ञा करूआय कि हाय अमता करसी। हाय बोलुआय कि हव्वा ले गोटक वंसज जनम सी जोन सांपर मुंडी के कुचलसी। जोन सांप हव्वा के धोका दि रहू आय हाय निसंदेह शैतान रहूआय। मापरुर मतलब रहूआय कि मसीह पूरा तरह ले शैतान के हाराय देयसी।

मापरु अब्राहम ले प्रतिज्ञा करी रहूआय कि हातार द्वारा संसारर सबु जाति मन आशीष पायबाय मापरु पाचे कोनी बेरा मसीह के पोटाय बार द्वरा ए प्रतिज्ञा के पूरा करसी। हाय मसीह संसारर सबु जाती थानले लोग मनके तिकर पाप ले छाड़ायसी।

मापरु मूसा ले प्रतिज्ञा करी रहूआय कि भविष्य ने मूसार जसन गोटक दूसरा भविष्य वक्ता के पटायसी। ए भविष्य वक्ता मसीही होयसी। ए रीती ले, मापरु फिरले प्रतिज्ञा करूआय कि हाय मसीह के पटायसी।

मापरु राजा दाउद ले प्रतिज्ञा करी रहूआय कि हातार गोटक वंसज मसीह होयसी। हाय राजा होयसी आउरी मापरुर लोग उपरे सदा काचे शासन करसी।

मापरु यिर्मयाह भविष्यवक्ता ले गोटाउ आय आउरी बोलुआय कि गोटक दिने हाय गोटक नुआ वाचा बांधसी। हाय नुआ वाचा इसरायली मन संगे सिनेय थाने बांधला बीती पुराना वाचा असन ना होयसी। जेबे लोग मन संगे हाय अपना नुआ वाचा बांधसी, तो हाय तिकर उपरे खुद के व्यक्तिगत रुप ले तिकर उपरे प्रगट करसी। सबु लोग मन हाके मया करबाय आउरी हातार व्यवस्था के पालन करबा काचे मन करबाय। मापरु बोलुआय कि ए हातार व्यवस्था के हिरदय थाने लिखी देला मा होयसी। हाय मन हातार लोग होयबाय, आउरी मापरु तिकर पाप के छमा करसी। हाय मसीह होयसी जोन तिकर संगे नुआ वाचा के बांधसी।

मापरुर भविष्य वक्ता मन ए बले बोलूआत कि मसीह गोटक भविष्य वक्ता होयसी। गोटक भविष्यवक्ता हाय माने आय जोन मापरुर वचन के सुनु आय आउरी पाचे लोग उपरे मापरुर सन्देशर घोषणा करूआय। जाके पटाय बार मापरु प्रतिज्ञा करी रहूआय हाय मसीह गोटक सिद्ध भविष्यवक्ता होयसी। मतलब हाय मसीह मापरुर सन्देश के अच्छा तरह ले सुनसी, आउरी हाय लोग मनके हाय सन्देश मन के अच्छा तरह ले सीखायसी।

इसरायली याजक मन लोगमन काचे मापरुर छोमे बलिदान चड़ायबाटा जारी रखुआत। ए बलिदान लोगर पाप मन काचे हाय मनके मापरुर दंड करबार जागा ने चड़ाय ला बीती रहूआय। याजक मन लोगमन काचे पारतना बले करूआत। मांतरहाय मसीह सिद्ध महायाजक होयसी जोन मापरु के देबा काचे गोटक सिद्ध बलीर रुप ने खुद के चड़ाय देयसी। मतलब हाय केबे बले पाप ना करसी, आउरी जेबे हाय खुद के बली होयबा काचे देयस, तो संसारर कोनी बले दूसरा बली जरुरी ना होयसी।

लोग मनर समूह थाने राजा आउरी प्रधान मन शासन करूआत, आउरी केबे – केबे हाय मन गलती करूआत। राजा दाउद केवल इस्राएली मन उपरे शासन करी रहूआय, मांतरराजा दाउदर वंसज पूरा संसार ने राज करसी, आउरी हाय सदा काचे शासन करसी। एतर अलावा, हाय सबु बेरा न्यायपूर्ण रीती ले शासन करसी, आउरी सही निर्णय मन के धरसी।

मापरुर भविष्य वक्ता मन मसीहर बारे ने खुबे असन गोट मनके बोलूआत। उदाहरण काचे, मलाकी बोलुआय कि मसीहर आयबार पोयलेगोटक दूसरा भविष्यवक्ता आयसी। हाय भविष्य वक्ता खुबे जरुरी होयसी। एतर अलावा, यशायाह भविष्यवक्ता लिखू आय कि मसीह गोटक कुआरी ले जनम सी। आउरी मिका भविष्य वक्ता बोलुआय कि मसीह बेतलहम नगर ने जनमसी।

यशायाह भविष्यवक्ता बोलुआय कि मसीह गलीलर जागा ने वास करसी। जोन लोग मन खुबे दुखी आचेत मसीह हाय मनके शांति देयसी। हाय कैदी मनके बले आजाद करसी। मसीह बीमार लोग मनके आउरी जोन मन सुनके ना सकेत, दखके ना सकेत, बोलके ना सकेत, या हिन्ड के ना सकेत हाय मनके बले चंगा करसी।

यशायाह भविष्यवक्ता ए बले बोलुआय कि लोग मन मसीह ले नफरत करबाय आउरी हाके स्वीकार करबा ने मना करी देबाय। दूसरा भविष्य वक्ता मन बोलुआत कि मसीहर गोटक साथी हातार विरुद्ध ने उठसी। जकर्याह भविष्य वक्ता बोलुआय कि हातार गोटक साथी अमता करबा काचे दूसरा लोग मन थानले चांदीर तीस सिक्का धरसी। ऐतार अलावा, खिनिक मा भविष्य वक्ता मन बोलुआत कि लोग मन मसीह के मारी देबाय, आउरी एटा कि हातार फोटी काचे जुआ खेलबाय।

भविष्य वक्ता मन एटा बले सांगूआत कि मसीह कसन मोरसी। यशायाह भविष्यवाणी करुआय कि लोग मसीहर उपरे थूकबाय, हातार मजाक उड़ायबाय, आउरी हाके मारबाय। हाय मन हाके छेद बाय आउरी हाय खुबे दर्द आउरी यातना ने मोरी जायसी, जबकि हाय काई बले गलत ना करी रेयसी।

भविष्य वक्ता मन ए बले सांगूआत की मसीह पाप ना करसी। हाय सिद्ध होयसी। मांतरहाय एकाचे मोरसी मापरु हाके दूसरा लोगर पाप मन काचे दंडित करसी। हातार मोरले लोग मन मापरु संगे मेल करबा काचे सक्षम होयबाय। एकाचे मापरु चाहसि आचे कि मसीह मोरो।

भविष्य वक्ता मन ए बले सांगू आत कि मापरु मसीह के मोरला थानले जियायसी। एटा दरसाय सी आचे कि एटा सबु नुआ वाचा के बांधबार मापरुर योजना रेला, कि हाय हाय लोग मनके बाचाय के सको जोन मन हातार विरुद्ध ने पाप करला आत।

मापरु भविष्य वक्ता मन उपरे मसीहर बारे ने खुबे गोट के प्रगट करूआय, मांतरमसीह हाय भविष्यवक्ता मन थानले कारी बले जीवनकाल ने ना आसू आय। ए भविष्यवाणी के देलार 400 ले खुबे बरसर पाचे, सही बेरा ने, मापरु मसीह के ए संसार ने पोटायसी।