20. गुलामी आउरी लेवटबाटा

इस्राएलर राज्य आउरी यहूदार दुनो मापरुर विरुद्ध ने पाप करूआत। हाय मन हाय वाचा के टूटाय देउआत जोन टा के मापरु तिकर संगे सिनेय परबत ने बाँधी रहूआय। मापरु हाय मनके पश्चताप करबा काचे आउरी फिर ले हातार आराधना करबा काचे चेतावनी देबा काचे खुदर भविष्यवक्ता मनके पटाउआय, मांतरहाय मन हातार गोट के मानबा ले मना करी देउआत।

अतः मापरु तिकर दुसमन के हाय मन के नास करबा काचे ताकतबर बनाय बार द्वारा दुनो राज्य के दंडित करूआय। अश्शुर गोटक दूसरा देश रहूआय जोन खुबे ताकतबर होई जाई रहूआय। हाय मन दूसरा काचे खुबे निर्दयी बले रहूआत। हाय मन आई करी इस्राएलर राज्य के नाश करी देउआत। अश्शुरी मन आई करी इस्राएल राज्यर खुबे लोग मनके मारी देउआत, जोन टा मन करले हाके लूटू आत, आउरी देशर कई जागा के जलाय देउआत।

अश्शुरी मन सबु अगुआ मनके, धनबान लोग मनके, आउरी अमता लोग मनके जोन मन कीमती वस्तू मन बनाय के सकेत गोटक संगे रुंडा करुआत आउरी हाय मन के हाय मन अश्शुर देश नेउआत। इस्राएल ने केवल खिनिक मा गरीब लोग मन बाचुआत।

पाचे अश्शुरी लोग मन हाय देश ने रेबा काचे विदेशी मनके धरी करी आनुआत। हाय विदेशी मन हाय नागर मनके फिर ले बनाऊआत। जोन इसरायली मन हाय थाने बाची रहूआत तिकर संगे हाय मन बिया करूआत। ए लोग मनर वंसज सामरी बोलाय होयलाय।

यहूदा राजर लोग मन दखुआत कि कसन मापरु हाय मनके तार उपरे विशवास ना करबा काचे आउरी हातार गोट के ना मानबार कारण इस्राएलर राजर लोग मन के दंडित करी रेला। मांतरतेब ले बले हाय मन कनानी मनर देवता मनर उपासना करुआत। मापरु हाय मनके चेतावनी देबा काचे भविष्यवक्ता मनके पटाउआय, मांतरहाय मन सुनबा ले मना करी देउआत।

लगभग 100 बरसर पाचे अश्शुरी मन इस्राएल राज के नाश करी देउआत। मापरु बेबीलोनर राजा, नबुकदनेस्सर के यहूदार राज ने हमला करबा काचे पटाउआय। बेबीलोन गोटक ताकतबर देश रहूआय। यहूदार राजा नबुकदनेस्सर र दास बनबा काचे आउरी हर बरस खुबे धन के देबा काचे सहमत होई जाउआय।

मांतरखिनिक मा बोरसर पाचे, यहूदार राजा बेबीलोनर विरुद्ध ने बलवा करूआय। अतः बेबिलोनी मन आई करी यहूदार राज ने हमला करी देउआत। हाय मन यरूशलेम नगर ने कब्ज़ा करी देउआत, मंदिर के नसाय देउआत, आउरी नगर आउरी मंदिरर खजाना के लुटी करी नेउआत।

बलवा करबार कारण यहूदा के दंडित करबा काचे, नबुकदनेस्सर र सैनिक मन राजार बेटा के हातार छोमे मारी देउआत आउरी पाचे हाके काना करी देउआत। एतार पाचे, हाय मन राजा के नेउआत कि हाय बेबीलोनर जेल ने मोरी जाओ।

नबुकदनेस्सर आउरी हातार सेना यहूदार राजर लगभग सबु लोग के बेबीलोन नेउआत, केवल सबु ले गरीब लोग मन के पीटी बाटे छाड़ी करी कि हाय मन बेड़ा थाने फसल उगाओत। ए समय के बन्धुआइ बोललाय जोन थाने मापरु लोग मन के प्रतिज्ञार देश ले निकली करी जीबा काचे विवस करी रहूआत।

भले ही मापरु अपना लोग मन के तिकर पाप काचे बन्धुआइ ने नेबार द्वारा दंडित करूआय, तेबले बले हाय हाय मनके या खुदर प्रतिज्ञा के ना भुलकी रहुहाय। मापरु खुदर लोग मनर निगरानी करबार जारी सोंगाउआय आउरी खुदर भविष्यवक्ता द्वारा हाय मनले गोटायते रेला। हाय प्रतिज्ञा करूआय कि सत्तर बरस पाचे, हाय मन फिर ले प्रतिज्ञार देश ने लेवटबाय।

लगभग सत्तर बरसर पाचे, फारसर राजा कुस्रु बेबीलोन के हाराय देउआय, एकाचे बेबीलोनर साम्राज्यर बजाय फारसर साराज्य कई देश ने शासन करूआय। इसरायली लोग मन अबर यहूदी बोलाय होयते रेलाय। हाय मन थानले खुबे लोग मन खुदर सबु जीवन के बेबीलोन ने बीताय रहूआत। केवल खिनिक मा डोकरा यहूदी लोग मन के ही यहूदार देश याद रहूआय।

फ़ारसी लोग मन खुबे ताकतबर रहूआत, हाय मन खुदर जीतला बीती लोग उपरे दया करी रहूआत। फ़ारसी लोग मनर राजा बनलार खिनिक मा बेरार पाचे, कुस्रू गोटक आज्ञा देउआय कि कोनी बले यहूदी जोन मन यहूदा ने लेवटबार चायबा आत, हाय मन फारस ले निकली करी वापिस यहूदा ने जायके सकेत। एथानले बले हाय मंदिर के फिर ले बनायबा काचे धन बले देउआय। अतः बन्धुआइर सत्तर बरसर पाचे, यहूदी मनर गोटक छोटे समूह यहूदा थाने यरूशलेम ने लेवटी आउआत।

जेबे हाय लोग मन यरूशलेम ने खेटू आत तो हाय मन मंदिर के आउरी नगरर चारो बाटर काति के फिर ले बनाउआत। फ़ारसी लोग मन एबे बले तिकर उपरे शासन करते रहूआत मांतरगोटक हार फिर ले हाय मन प्रतिज्ञार देश ने रेयते रहुआत आउरी मदिर थाने आराधना करते रहूआत।