19. भविष्यद्वक्ता

मापरु सबु बेरा इसरायली मन लगे भविष्य वक्ता मन के पोटाय ते रहूआय। भविष्य वक्ता मापरुर संदेस मन के सुनते रहूआत आउरी पाचे हाके लोग मन के सांगते रहूआत।

अबर अहाब इस्राएल राज्यर राजा रहूआय तो हाय बेरा एलियाह भविष्यवक्ता रहूआय। अहाब गोटक बुरा माने रहूआय। हाय झुटा बाल देवतार उपासना करायबा काचे लोग मन के विवस करी रहूआय। एकाचे एलिय्याह अहाब के बोलुआय कि मापरु हाय लोग मन के दंडित करके जायते रेला। हाय हाके बोलुआय, "जेबे तक मुई बोरसा होयबा काचे ना बोली तेबे तक इस्राएलर राज्य ने बोरसा ना होए आउरी ओस बले ना घसरे।"ए बीत गोट अहाब के अतक रिसा करी देउआय कि हाय एलिय्याह के मारी देबार निर्णय करूआय।

एकाचे मापरु एलिय्याह के बोलू आय कि हाय झारे जाई करी अहाब ले लुकी रहो। एलिय्याह हाय झारे हाय सोता लगे जाउआय जोन थाने जीबा काचे मापरु हाके बोली रहूआय। सबु सकारे आउरी सबु संज बरा, चेड़े मन एलिय्याह काचे रोटी आउरी माउस धरी करी आयते रेलाय। ए सबु बेरा, अहाब आउरी हातार सेना मन एलिय्याह के डगरते रेलाय, मांतरहाय मन हाके डगर के ना पारलाय।

बोरसा ना होयलार खिनिक मा बेरार पाचे हाय सोता सुखी जाऊआय। एकाचे एलिय्याह लगर गोटक देश ने जाउआय। हाय देश ने गोटक गरीब विधवा रहूआय जार गोटक बेटा रहूआय। तिकर लगे भात लगभग सरी जाई रहूआय कायकाचे कि हाय थाने काई फसल ना होई रहूआय। मांतरतेब ले बले, हाय बायले एलिय्याहर देख भाल करूआय, एकाचे मापरु हातार आउरी हातार बेटार जरुरत के पूरा करूआय, ए लागी करी हातार आटार बर्तन आउरी हातार तेलर कुप्पी केबी बले खाली ना होऊआय। हाय सबु अकालर दोरान तिकर लगे भात रहूआय। एलिय्याह खिनिक मा बरस तक हाई थाने रहूआय।

साढ़े तीन बोरसर पाचे, मापरु एलिय्याह के बोलुआय कि फिरले बोरसा करसी। हाय एलिय्याह के लेवटी करी इस्राएल राज्य ने जाई करी अहाब ले गोटाय के बोलुआय। एकाचे एलिय्याह अहाब लगे जाउआय। जेबे अहाब हाके दखुआय तो हाय बोलुआय, "अच्छा तुई आस, मुसीबत जनमायबा बीता!"एलिय्याह जवाब देउआय, "मुसीबत जनमायबा बीता तो तुई आस! तुई यहोवा के छाड़ी देली आस। हाई सच्चा मापरु आय, मांतर तुई बाल र उपासना करबी आस। अबर तोके इस्राएल राजर सबु लोगमन के कर्मेल परबत ने धरी करी आनबार आय।"

अतः सबु कर्मेल परबत ने जाउआत। हाय माने मन बले आउआत जोन मन बोलते रहूआत कि हाय मन बालर संदेस मन के बोलबा आत। ए मन बालर भविष्य वक्ता मन रहूआत। हाय मन सबु 450 रहूआत। एलिय्याह लोग मन के बोलुआय, "कड़क दायले तोमी खुदर मन के फिराय रेबास? अगर यहोवा मापरु आय तो हातार आराधना करा! अगर बाल मापरु आय तो हातार उपासना करा!"

तेबे एलिय्याह बालर भविष्य वक्ता मनके बोलुआय, "गोटक बुइला के बली करी हातार माउस के बलिदान होयबा काचे बेदी थाने सोंगा,मांतरजोय ना धरा। हातार बाद मुई बले अमति करबी, आउरी गोटक दूसरा बेदी ने हाय माउस के सोंगायबी। तेबे अगर मापरु बेदी थाने जोय घसरायसी तो तोमी जानी जीबास कि हाई सच्चा मापरु आय।" तेबे बालर भविष्य वक्ता मन गोटक बली के तियार करूआत मांतरजोय ना धराउ आत।

तेबे बालर भविष्य वक्ता मन बाल ले पारतना करूआत कि, हे बाल, हामोर सुन!"सबु दिन हाय मन परतना करूआत आउरी चीचाउ आत एथानले बले हाय मन खुद के चाकू ले काटी होउआत, मांतरबाल जवाब ना देउआय, आउरी हाय कोनि जोय ना घसराउआय।

बालर भविष्य वक्ता मन बाल के पारतना करबा ने लगभग पूरा दिन बीतय देउआत। आखरी तक हाय मन पारतना करबा टा बंद ना करूआत। तेबे एलिय्याह दूसरा बुईलार माउस के मापरुर बेदी ने सोंगाउआय। एतार पाचे, हाय लोग मन के पानीर बड़े बर्तन मनके हाय बलिदान थाने उलद के बोलुआय जड़ दायले कि माउस, दारू, आउरी एथानले बले कि बेदीर लगर माटी पूरा तरह ले भीजी ना गला।

तेबे एलिय्याह पारतना करूआय कि, "हे यहोवा,अब्राहम, इसहाक, आउरी याकूबर मापरु, हामके दखाव कि तुई इस्राएलर सच्चा मापरु आस आउरी एटा कि मुई तोर सच्चा दास आय। मोके जवाब देस जोन थानले कि ए मन जानी जिबाय कि तुईच सच्चा मापरु आस।"

हड़कीच दाय, बादरी ले ओय घसरू आय आउरी हाय माउस, दारू, पोकना, माटी आउरी एथानले बले कि बेदीर लगर पानी के बले पोड़ाय देउआय। जेबे लोग मन एटा के दखु आत, हाय मन माटी ने घसरू आत आउरी बोलुआत, "यहोवा ही सच्चा मापरु आय! यहोवा ही मापरु आय!"

तेबे एलिय्याह बोलुआय, "बालर गोटक बाले भविष्य वक्ता बाची करी जायके ना पारोत!" एकाचे लोग मन बालर भविष्य वक्ता मन के धरुआत आउरी हाय मनके हाय थानले अलग नेउआत आउरी हाय मन के मारी देउआत।

तेबे एलिय्याह अहाब राजा के बोलुआय, झोपके खुदर घरे पोराव, काय काचे कि बोरसा होउआय बे। झोपके बादरी घना होई जाउआय, आउरी खुबे बोरसा चालू होई जाउआय। यहोवा हाय सुकला बीती के सराय ते रहूआय। एथानले दखा देउआय कि यहोवा ही सच्चा मापरु आय।

जेबे एलिय्याह खुदर काम के सराऊ आय, तो मापरु एलिशा नामर गोटक माने ने खुदर भविष्यवक्ता होयबा काचे चुनु आय। मापरु एलिशार जरिया ले बहुत चमत्कार करूआय। गोटक चमत्कार नामान संगे होउआय। हाय गोटक दुसमन सेनार सरदार रहूआ, मांतरहाके चामड़ीर गोटक बुरा रोग होईजाई रहूआय। नामान एलिशार बारे ने सुनि रहूआय, एकाचे हाय एलिशा लगे आउआय आउरी हाके ठीक करबा काचे अनुरोध करूआय। एलिशा नामान के बोलुआय कि जाई करी यरदन नदीर पानी थाने सात बार बुड़।

नामान रिसा होई जाउआय। हाय अमता करबा काचे मना करी देउआय, काय काचे कि एटा हाके भोकवा मनर काम लागूआय। मांतरपाचे हाय अपना मन के बदली देउआय आउरी जाई करी यरदनर पानी ने सात बार डूबकी लगाउ आय। जेबे आखरी बार हाय पानी ले बाहरे निस्कू आय तो मापरु हाके ठीक करी देउआय।

मापरु इस्राएलर लोग मन लगे दूसरा खुबे भविष्यवक्ता मन के पोटाउ आय। हाय सबु मन लोग मन ले मुरती मनर उपासना करबाटा बंद करी देबा काचे बोलूआत। एतार बजाय, हाय मनके एक दूसरा संगे न्यायपूर्वक व्यव्हार करबा राय आउरी एक दूसरार उपरे दया करबाराय। हाय भविष्य वक्ता मन लोग मन के चेतावनी देउआत कि हाय मनके बुरा काम करबाटा बंद करी देबाराय आउरी एतार बजाय मापरुर गोट मनके पालन करबा राय। अगर हाय लोगमन अमता ना करबाय तो मापरु हाय मन के दोसी मानी करी तिकर न्याय करसी, आउरी हाय मन के दंडित करसी।

खुबे बेरा, हाय मन मापरुर आज्ञार पालन ना करूआत। अक्सर हाय मन भविष्यवक्ता मन संगे बुरा व्यवहार करूआत आउरी एथानले बले केबे – केबे हाय मन के मारी देउआत। गोटक बार, हाय मन यिर्मयाह भविष्य वक्ता के सुकला चुआ थाने डाली देउआत आउरी हाय थाने मोरबा काचे छाड़ी देउआत। हाय चुआर तले चिकल ने धसी जाउआय। मांतरतेबे राजा के हातार उपरे दया आई जाउआय आउरी हाय अपना सैनिक मन के आदेश देउआय कि यिर्मयाह के मोरबार पोयले हाय चुआ ले बाहरे झिकोत।

भविष्यवक्ता मन मापरु बाटले बोलबाटा चालु सोंगाउआत भले ही लोग मन हाय मन के नफरत करला य। हाय मन लोग मन के चेतावानि देलाय कि हाय मन पश्चाताप ना करले मापरु हाय मन के नास करसी। हाय मन लोग मन के एटा बले सुरता कराउआत कि मापरु हाय मन लगे मसिह के बले पोटाय बार प्रतिज्ञा करला आचे।