18. गोंदा होयला राज्य

दाउद राजा चालीस बोरस तक इसरायल ने राज करुआय। तेबे हाय मोरी जाऊआय, आउरी हातार बेटा सुलेमान इस्राएल ने शासन करबा टा चालू करूआय। मापरु सुलेमान के गोटाउ आय आउरी हाके पोचारु आय कि हाय सबु ले खुबे काय चाहसी आचे कि मापरु हातार काचे करो। सुलेमान मापरु ले मागु आय कि हाय हाके सबु ले खुबे बुद्धिमान बनाय दो। ए बीती गोट मापरु के हरिक करी देउआय, एकाचे मापरु सुलेमान के संसारर सबु ले खुबे बुद्धिमान माने बनाय देउआय। सुलेमान खुबे बात मन के सीखू आय आउरी हाय गोटक बुद्धिमान शासक रहूआय। मापरु हाके खुबे धनवान बले बनाय देउआय।

यरुशलेम थाने सुलेमान हाय मंदिर के बनाउआय जार काचे हातार बुआ योजना बनाय रहूआय आउरी सामान मन के रुंडा करी रहूआय। अबर लोग मन मिलाप बीती तम्बूर बजाय मंदिर थाने मापरुर आराधना करते रेलाय आउरी हातार काचे बली चड़ायते रेलाय। मापरु आई करी मंदिर थाने रेबा राय, आउरी हाय हाय थाने अपना लोग मन संगे रेबा राय।

मांतरसुलेमान दूसरा देशर बायले मन संगे मया करूआय। हाय खुबे असन, लगभग 1,000 बायले मन संगे बिया करी मापरु आज्ञा के ना मानु आय! एथानले खुबे बायले मन दूसरा देश ले आउआत आउरी खुदर संगे खुदर देवता मन के बले आनुआत आउरी तिकर उपासना करबा टा चालू सोंगाउ आत। जेबे सुलेमान डोकरा होई जाउआय तो हाय बले हाय देवता मनर उपासना करूआय।

ए लागी करी मापरु सुलेमान उपरे रिसा होउआय। हाय बोलुआय कि हाय इस्राएल देश के दुई ठन राज्य ने बाटा कारबार द्वारा ले हाके दंड देयसी। हाय सुलेमान र मोरला र बाद अमता करसी।

सुलेमानर मोरला र पाचे, रहबाम राजा बनूआय। इस्राएल देशर सबु लोग मन हाके राजार रुप ने मानबा काचे गोटक संगे रुंडा होऊआत। हाय मन रहबाम ले शिकायत करूआत कि सुलेमान हाय मनले खुबे कठिन काम कराय रेला आउरी खुबे कर के वसूली रेला। हाय मन रहबाम ले अनुरोध करूआत कि हाय मनके कम काम कराओ।

मांतररहबाम हाय मनके बड़े भोकावा असन जवाब देउआय, "तोमी बोलबा आस कि मोर बुआ तोमके कठिन काम कराय ला। मांतरमुई तोमके हातार ले बले खुबे कठिन काम कराय बी, आउरी मुई तोमके हातार ले बले खुबे पीड़ित करबी। "

जेबे लोग मन हाके अमता बोलबा दाय सुनुआत तो हाय मन थानले कई लोग मन हातार विरुद्ध ने बलवा करूआत। दस गोत्र मन हाके छाडी देउआत: हातार संगे अबर केवल दुई गोत्र बाचुआय। ए दुई गोत्र खुद के यहूदार राज्य बोलुआय।

बाकि दस गोत्र मन यारोबाम नामर माने के राजा बनाउआत। एगोत्र देशर उत्तर- पूर्वी भाग ने रहूआत। हाय मन खुद के इस्राएलर राज्य बोलुआत।

मांतरयारोबाम मापरुर विरुद्ध ने पाप करुआय आउरी लोग मन के पाप कराउआय। हाय खुदर लोग मनर द्वारा उपासना करबा काचे दुई ठन मुरती के बनाउआय। हाय मन अबर यहूदा ने यरूशलेम ने मापरुर आराधना करबा काचे ना जाउआत।

यहूदा आउरी इस्राएलर राज्य दुसमन बनी जाउआत आउरी अक्सर एक दूसरार विरुध ने लड़के मुराउआत।

इस्राएलर नुआ राज्य ने, सबु राज मन दुष्ट रहूआत। एथानले कई राजा तिकर जागा ने राजा बनबा काचे चाह रखबा बीती मन दूसरा इसरायली मनर द्वारा मारी दि जाई रहूआत।

इस्राएल राजर सबु राजा मन आउरी खुबे लोग मन मूर्ति मनर उपासना करूआत। जेबे हाय मन अमता करूअत, तो अक्सर वेश्या मन संगे सोउआत आउरी एथानले बले कई बार मुरती मनर छोमे पीला मनके बली बले करूआत।

यहूदा राजर राजा, दाउदर वंसज रहूआत। ए राजा मन थानले कई अच्छा माने मन रहूआत जोन मन न्यायपूर्वक शासन करूआत आउरी मापरुर आराधना करूआत। मांतरयहूदार खुबे राजा मन दुष्ट रहूआत। हाय मन दुष्टता ले शासन करूअआत, आउरी मुरती मनर उपासना करूआत। एथानले बले खिनिक मा राजा मन झुटा देवता मनर छोमे खुदर पीला मनके बली करी देउआत। यहूदा खुबे लोग मन मापरुर विरुद्ध ने बलवा करूआत आउरी दूसरा देवता मनर उपासना करूआत।