17. दाऊद संगे मापरुर किरिया

शाउल इस्राएलर पोयला राजा रहूआय। हाय डेंग आउरी सुंदर रहूआय, जसन हाय मन चायते रहुआत एकदम असनिच रहूआय। मांतर पाचे हाय गोटक दुष्ट माने बनी जाउआय जोन मापरुर गोट मनके ना मानुआय, एकाचे मापरु गोटक दूसरा माने के चुनुआय जोन गोटक दिन हातार जागा ने राजा बनसी।

मापरु दाऊद नाम मर गोटक जुआन इस्राएली माने के डगरी करी गोटक दिन शाऊलर जगा ताने राजा होयबा काचे तियार करबार सुरु करुआय। दाऊदबेतलहम नगरर गोटक धोरी रहूआय। कई बेरा, दाऊद सेर आउरी भालू दुनो के मारी रहूआय कायआचे कि दाउदर राका करबादाय हातार बुआर मेंडा थाने हाय मन हमला करी रहूआत। दाऊदगोटक सीधा साधा आउरी धरमी माने रहूआय। हाय मापरु उपरे भरोसा करूआय आउरी हातार बात मन ले मानुआय।

जड़क दाय दाऊद जुआन मानेच रहूआय, हाय डेंगा – चोड़ा गोलिअतर विरुद्ध लड़ाई करूआय। गोलियत गोटक अच्छा सैनिक रहूआय। हाय खुबे मजबूत आउरी लगभग तीन मीटर डेंगा रहूआय! मांतर मापरु गोलियत के मारबा ने आउरी इस्राएल के बाचायबा ने दाउदर सहायता करूआय। एतार पाचे, दाऊद इसरायली मनर दुसमन थाने कई बार विजय प्राप्त करुआय। दाऊदगोटक बड़े सैनिक बनी जाऊआय, आउरी खुबे युद्ध थाने इसरायली मनर अगुआई करुआय। लोग मन हातार खुबे प्रसंसा करुआत।

लोग मन दाऊद ले अतक मया करुआत कि शाउल हातार ले कुचर होयके मुराउआय। आखरी ने शाउल हाके मारी देबार चाहते रहूआय, एकाचे दाऊद हातार ले आउरी हातार सैनिक मन ले लुकबा काचे झारे पराऊ आय। गोटक दिने, जेबे शाउल आउरी हातार सैनिक मन दाऊद के डगराय ते रेलाय तो शाउल गोटक गुफा ने जाऊआय। एटा हाई गुफा रहूआय जोन थाने दाऊद लुकी रहूआय, मांतरशाउल हाके ना दखुआय। दाऊद शाउलर पीटी बाटे हातार लगे जाऊआय आउरी हातार फोटी के गोटक गोंदा काटी देउआय। पाचे, शाउल हाय गुफा ले निकलू आय तो दाऊद हाके हागदि करी हाय धरेला बीती फोटीर गोंदा के दखाउ आय। ए रीती ले, शाउल जानी जाऊ आय कि दाऊद राजा बनबा काचे हाके मारी देबा ले मना करी दि रहूआय।

खिनिक मा समयर पाचे शाउल युद्ध ने मोरी जाऊआय, आउरी दाऊद इस्राएलर राजा बनी जाउआय। हाय गोटक अच्छा राजा रहूआय, आउरी लोग मन हाके मया करुआत। मापरु दाऊद के अशीसित करूआय आउरी हाके सफल बनाउआय। दाऊद कई युद्ध के लड़ला, आउरी मापरु इस्राएलर दुसमन के हारायबा काचे हातार मदद करूआय। दाऊद यरुशलेम नगर के जीती करी हाके अपना राजधानी बानाउ आय, जोन थाने हाय रेला आउरी शासन करला। दाऊद चालीस बरस तक राजा रहूआय। ए समयर पाचे, इस्राएल ताकतबर आउरी धनबान बनी जाउआय।

दाऊद गोटक मंदिर बनायबार चाहते रहूआय जोन थाने सबु इसरायली मन मापरुर आराधना करके सकोत आउरी हातार काचे बलिदान चढ़ाय के सकोत। लगभग 400 बरस ले, हाय मन मूसार बनाय ला बीती तम्बू थाने मापरुर आराधना करते रेलाय आउरी हातार काचे बलिदान चढ़ाय ते रेलाय।

मांतरहाय थाने नातान नामर गोटक भविष्यवक्ता रेला। मापरु हाके दाऊद के ए बोलबा काचे पोटायला कि: "तुई खुबे युद्ध के लड़ली आस, एकाचे तुई मोर काचे मंदिर के ना बनायिस। तोर बेटा एके बनायसी। तेबले बले, मुई तोके खुबे आशीष देबी। तोर गोटक वंस सदा काचे मोर लोग उपरे राजार रुप ने शासन करसी।" सदा काचे शासन करबा बीता हाय दाउदर एकमात्र वंसज मसीह रहूआय। मसीह मापरुर चुनला बीती माने रहुआय जोन संसारर लोग मनके तिकर पाप ले बाचायसी।

जेबे दाऊद नातानर सन्देश के सुनु आय तो हाय मापरुर धन्यवाद करुआय आउरी हातार स्तुति करूआय। मापरु हातार प्रतिष्ठा के बड़ाय ते रहूआय आउरी हाके खुबे आशीष देयते रहूआय। इति सक नियाय कि, दाऊद ना जानते रहूआय कि मापरु ए बात मनके केबके करसी। ए समय हामी जानु कि इसरायली मन के गोटक लम्बा समय तक, लगभग 1,000 बरस तक मसीहर आयबार प्रतीक्षा करके पड़सी।

दाऊद कई बरस तक न्यायपूर्वक अपना लोग उपरे शासन करुआय। हाय बड़ी निष्ठा ले मापरुर बात के मानुआय आउरी मापरु हाके आशीषित करुआय। हालाँकि, अपना जीवनर सरबादाय हाय मापरुर विरुद्ध ने भयानक पाप करी रहूआय।

गोटक दिने दाऊद अपना महल ले बाहरे ओंजारु आय आउरी गोटक सुंदर बायले के पानी धोयबा दाय दखु आय। हाय हाके ना जानते रहूआय, मांतरहाय पता लगाउ आय कि हातार नाम बतशेबा आय।

अपना नजर के लेवटाय बार पाल्टा, दाऊद हाके अपना लगे आनबा काचे काकी बले पोटाउ आय। हाय हातार संगे सोउ आय आउरी हाके वापस घरे पटाय देउआय। खिनिक मा समयर पाचे बेतशेबा एटा बोली करी दाऊद लगे संदेस पोटाउ आय कि हाय पेटे आचे।

बेतशेबार मुनुस उरिय्याह नामर गोटक माने रहूआय। हाय दाउदर अच्छा सैनिक मन थानले गोटक रहूआय। ए समय ने हाय युद्ध करबा काचे बाहरे जाई रहूआय। दाऊद उरिय्याह के युद्ध ले वापिस हागदि करी हाके हातार बायले संगे रेबा काचे बोलुआय। मांतरदूसरा सैनिक मन युद्ध ने रहूआत एकाचे उरिय्याह घरे जीबा काचे मना करी देउआय। अतः दाऊद उरिय्याह के वापस युद्ध ने पटाय देउआय आउरी सेनापति ले हाके अमता जागा ने सोंगाय बा काचे बोलुआय जोन थाने दुसमन मन सबु ले ताकतबर रहोत कि हाय मोरी जाओ। तो अमता होऊआय कि उरिय्याह युद्ध ने मोरी जाऊआय।

उरिय्याहर युद्ध ने मोरला र पाचे दाऊद बतशेबा संगे बिया करी देउआय। पाचे, हाय दाउदर बेटा के जनम देउआय। दाऊद जोनटा करी रहूआय हतार ले मापरु खुबे रिसा होई रहूआय, एकाचे हाय नातान नबी के एटा सांगबा काचे पोटाउ आय कि हातार पाप कतक घिनघिना आय। दाऊदअपना पापर पश्चताप करूआय आउरी मापरु हाके क्षमा करी देउआय। अपना बाचाला जीवन ने, अपना कठिन समय ने बले दाऊद मापरुर पीटी – पीटी हिंडू आय आउरी हातार बात के मानुआय।

मांतर दाउदर बेटा मोरी गला। एरीती ले मापरु दाऊद के दण्डित करला। एतार अलावा, दाऊदर मोरबा तक, हाय खुदर परिवारर खिनिक मा लोग मन हातार विरुद्ध ने लड़ाई करूआत, आउरी दाऊदर खुदर शक्ति कम होई गला। मांतर मापरु विश्वासयोग्य रेला आउरी एबे बले हाय हायटा करला जोन हाय दाऊद ले करबार वादा करी रहूआय हाईटा करसी, भले ही दाऊद हातार आज्ञा के ना मानला। पाचे, दाऊद आउरी बेतशेबार दूसरा बेटा जनम ला, आउरी हातार नाम सुलैमान सोंगाउआत।