16. छाड़ायबा बीता

यहोशुर मोरला र पाचे इस्राइएलि मनमापरुर अवज्ञा करलाय। हाय मन मापरुर नियमर पालन ना करलाय, आउरी हाय मन हाई वाचार देश ने बाची रेलाय कनानी मन के बाहरे ना निकलाय लाय। इस्राएली मन खुदर सते मापरु, यहोवा के छाड़ी करी कनानी मनर देवता के उपासना करबार सुरु करी देलाय। इस्राएली मन लगे कोनी राजा ना रेला, एकाचे जाके जोन टा सही लागला हाईटा करला।

मापरुर आज्ञा ना मानला कारण दुबारा इस्राएली मन गोटक पद्धति के चालू करुआत जाके खुबे हार दोहराय रहूआत। ए पद्धति अमता ले चलुआय खिनिक मा बोरस तक इसरायली मन मापरुर आज्ञा के ना मान बाय, तेबे हांय हाय मनके दुसमन थानले हाराय बार द्वारा सजा देयसी। ए दुसमन मन इसरायली मनले तिकर सम्पति के नास करी देबाय, आउरी हाय थानले खूबे झन के मारी देबाय। पाचे जेबे इसरायली मनर दुसमन मन तिकर उपरे कई बोरस तक अत्याचर करबाय, हातार पाचे इसरायली मन अपना पाप ले पश्चताप करबाय आउरी मापरु के हाय मन के बाचायबा काचे परताना करबाय।

सबु हार जेबे इसरायली लोग मन पश्चताप करबाय तो मापरु हाय मनके बाचायसी। हाय गोटक छाड़ायबा बीतार द्वारा अमता करसी - गोटक अमता माने जोन तिकर दुसमनर विरुद्ध लड़सी आउरी हायमन के हारायसी। तेबे देश ने शांति होयसी आउरी हाय छाड़ायबा बीता तिकर उपरे अच्छा ले शासन करसी। मापरु हाय मन के बाचायबा काचे खुबे छाड़ायबा बीता मनके पटायला। मापरु लगर गोटक दुसमन जाति, मिद्यानि मनर द्वरा इसरायली मनके हारायबार द्वरा अमता करला।

मिदयानी मन सात बोरस तक इसरायली मनर फसल के झिकलाय। इसरायली लोग मन खुबे डरी जाई रेलाय, आउरी हाय मन गुपा भीतरे लुकी रेलाय कि मिदयानी लोग मन हाय मन के डगर के ना सकोत। आखरी ने, हाय मनके बाचायबा काचे हाय मन मापरु के हागदेलाय।

गिदोन नामर गोटक इसरायली माने रेला। गोटक दिने, हाय गोटक गुप्त जागा ने गेहू झाड़ते रेला कि मिदयानी लोग हाके चोरके ना सकोत। मापरुर सरगदूत गिदोन लगे आई करी बोलुआय,"हे सूरबीर सुरमा, मापरु तोर संगे आचे। जा आउरी इसरायली मनके दिद्यानी लोग मन ले बाचाव।"

गिदोनर बुआ लगे मूर्ति के समर्पित करला बीती गोटक बेदी रेला। सबु ले पहला गोट जोन कि मापरु गिदोन के करबा काचे बोलला हाय बेदी के टूटायबार रेला। मांतरगिदोन लोग मन ले डरबाराय, एकाचे हाय राती होत ले टाकला। तेबे हाय हाय बेदी के टूटाय करी गोंदा – गोंदा करी देला। हाय मापरु काचे गोटक नुआ बेदी के बनायला आउरी हाय थाने मापरु काचे बली चेगाय ला।

आयबा सकारे लोग मन दखलाय कि कोन आय आले बेदी के टुटाय करी गोंदा – गोंदा करी देला आचे, एकाचे हाय मन खुबे रिसा होयलाय। हाय मन गिदोन के मारबा काचे हातार घरे जाऊआत, मांतरगिदोनर बुआ बोलुआय, ‘’तोमी काय काचे अपना देवतार सहायता करबार कोसीस करबा आस? अगर हाय देवता आय तो अपना सुरक्षा खुद करके दियास!" काय काचे कि हाय अमता बोलला एकाचे लोग मन गिदोन के ना मरुआत।

तेबे इसरायली मनके लुटबा काचे मिदयानी लोग मन फिर ले आउआत। हाय मन अतक खुबे रहूआत कि तिकर गिनती बले करी ना होये। गिदोन तिकर विरुद्ध लड़बा काचे इसरायली मन के गोटक संगे हागदेउआय। गिदोन मापरु ले दुई ठन चिना मांगूआय कि हाके विश्वास होई जाओ कि मापरु सच ने हाके इसरायली मनके बचायबा काचे बोलसी आचे।

पयला चिना काचे, गिदोन मेंडार उन के माटी ने सोंगाय करी मापरु के बोलुआय कि सकार के ओस केवल मेंडार हाय उन थाने पड़ो आउरी माटी थाने ना पड़ो। मापरु अम्तिच करूआय। दूसरा राती ने, हाय मापरु के बोलू आय कि माटी भीजी जाओ मांतरमेंडार उन सुकी रओ। मापरु अमता बले करुआय। ए दुईटा चिनार कारण, गिदोन मापरुर उपरे विश्वास करूआय कि मापरु सते चाहसी आचे कि हाय इसरायली मन के मिदयानी मनले बाचाओ।

तेबे गिदोन सैनिक मन के अपना लगे हागदेउआय आउरी 32,000 माने मन आसूआत। मांतरमापरु हाके बोलुआय कि ए मन खुबे आत। तेबे गिदोन हाय सबु 22,000 के घरे वापिस पटाय देउआय जोन मन लड़बा ले डरते रहूआत। मापरु गिदोन के बोलुआय कि ए माने मन एबे बले खुबे आचेत। एकाचे गिदोन 300 सैनिक मन के छाड़ी करी सबु के घरे पटाय देउआय।

हाय राति ने मापरु गिदोन के बोलुआय, "मिदयानी मनर लाड़ी ने जा आउरी हाय मनके गोटायबा दाय सुन। जेबे तुई सुनबीस कि हाय मन काय गोटायबा आत तो तुई तिकर उपरे हमला करबा ने ना डरबीस।" एकाचे हाय राती, गिदोन तले तिकर लाड़ी ने जाऊआय आउरी हाय गोटक मिदयानी सैनिक के अपना मित के ए गोट सांगबा दाय सुनु आय जोन टा के हाय सपना ने दकी रे। हाय मानेर मित बोलुआय, "ए सपनार अर्थ आय कि गिदोनर सेना हामी मिदयानी मन के हाराय देबाय!"जबे गिदोन एटा के सुनु आय तो हाय मापरुर स्तुति करूआय।

तेबे गिदोन अपना सैनिक मन लगे लेवटी आऊआय आउरी हाय मन सबु के गोटक – गोटक नर्सिंगा, गोटक माटीर बर्तन, आउरी गोटक मसाल देउआय। हाय मन हाय लाड़ी के घेरी देउआत जोन थाने मिदयानी सैनिक मन सोयते रहुआत। गिदोनर 300 सैनिक मन अपना मसाल के बरतन ले ढाकी रहूआत एकाचे हाय मिदयानी मन हाय मसालर उजर के ना दखके पारुआत।

तेबे गिदोनर सबु सैनिक मन अपना बरतन के गोटकि समय ने टुटाय करी अचानक ले मसालर जोय के दखाऊआत। हाय मन अपना नर्सिंगा के फुंकु आत आउरी चीचाउआत,"मापरुर आउरी गिदोनर तलबार!"

मापरु मिदयानी मन के घबराय देउआय, हाय मन एक दूसरा के मारके – काटके मुराउआत। हड़कीच दाय, गिदोन संदेशवाहक मन के इसरायली मन के मिद्यानि मनर पीछा करबा ने तिकर सहायता करबा काचे हागदेबा काचे पटाऊआय। हाय मन हाय थानले खुबे के मारी देउआत आउरी बाकी के पीछा करी हाय मन के इस्राएल ले बाहरे निकलाय देउआत। हाय दिने 1,20,000 मिदयानी मन मोरी जाउआत। ए तरह ले मापरु इसरायली मन के बाचाउ आय।

हाय लोग मन अपना राज बानाय बार चाहते रहूआत, मांतरगिदोन हाय मन के अमता ना करके देउआय, मांतरहाय हायबीती सोनार आभूषण मांगूआय जोनटा के हाय मन थानले सबु लोग मन मिदयानी मन थानले लुटी रहूआत। हाय मन खुबे मात्रा ने गिदोन के सोना देउआत।

तेबे गिदोन हाय सोना ले विशेष फोटी बनाऊआय जमता कि महायाजक पिन्दते रेलाय। मांतरलोग मन हातार उपसना करबार आरम्भ करी देलाय जसन कि हाय कोनी मुरती हो। तेबे मापरु इसरायली मन के आउरी दंडित करूआय कायकाचे कि हाय मन मुरतीर उपसना करी रहूआत। मापरु तिकर दुसमन के हाय मनके हाराय बा ने सक्छम करूआय। आखरी ने हाय मन मापरु के सहायता करबा काचे पारतना करुआत, आउरी मापरु तिकर लगे हाय मन करे बाचायबा काचे दूसरा छाड़ायबा बीता के पोटाउआय।

ए बीती गोट खुबे हार होयला: इसरायली लोग पाप करबाय, मापरु हाय मनके दंडित करसी, हाय मन पश्चाताप करबाय, आउरी मापरु हाय मनके छाड़ायबा काचे काकी पुनि पटाय सी। कई बोरस तक, मापरु खुबे छाड़ाय बा बीता मनके पटाऊ आय जोन इसरायली मन के तिकर सत्रु ले बाचाऊ आत।

आखरी ने, हाय लोग मन दूसरा देशर असन अपना काचे गोटक राजार मांग करुआत। हाय मन गोटक राजा चाहते रहूआत जोन डेंगा आउरी त्ताकतबर हो, आउरी जोन युद्ध ने तिकर अगुआई करके सको। मापरु के ये निवेदन पसंद ना आऊआय, मांतरहाय मनके अमता राजा देउआय जमता हाय मन मांगी रहूआत।