15. प्रतिज्ञार देश

आखरी ने, हाय समय आयला कि इसरायली मन प्रतिज्ञार देश, कनान ने ओलोत। हाय देश ने यारिहो नामर गोटक नगर रेला। हातार सुरक्षा काचे हातार चारो बाटे मजबूत काती मन रेला। यहोशु हाय नगर ने दुई ठन भेदी मन के पोटायला। हाय नगर ने राहाब नामर गोटक वेश्या रेला। हांय हाय भेदी मनके लुकाऊआय, आउरी पाचे हांय आय मनके नगर ले बाची करी निकलबा ने मदद करुआय। हांय असन एकाचे करुआय कि हाय मापरु उपरे विश्वास करते रहूआय। जेबे इसरायली मन यरीहो के नास करबाय तेबे हाय मन राहाब आउरी हातार परिवार के रक्षा करबार किरया करी रहुआत।

इसरायली लोग मनके प्रतिज्ञार देश ने ओल्बा काचे यरदन नदी के पार करबाटा रेला। मापरु यहोशु के बोलुआय, "याजक मनके पोयलेजायके देस।"जेबे याजक मन यरदन नदी थाने अपना गोड़ के सोंगायलाय तो पानीर बोहड़बाटा ठेबी जाउआय, जोन थानले कि इसरायली मन नदीर दूसरा बाटे सुकला माटी थाने जायके सकोत।

हाय लोग मन यरदन नदी पार करला य तो मापरु यहोशु के बोलुआय कि यरीहो थाने हमला करबा काचे तिआर रहा, हाय बहुत मजबूत शहर रहुआय। मापरु हाय लोग मन के बोलू आय कि हाय मनर याजक आउरी सैनिक मन के छह दिन तक हाय नगरर चारो बाटे गोटक हार चक्कर लगाय बार आय। याजक आउरी सैनिक मन अमतीच करुआत।

तेबे सातवां दिने, इसरायली मन हाय नगरर चारो बाटे सात बार चक्कर लागाउआत। तिकर नगरर सातवीं बार चक्कर लगायलार बाद, याजक मन अपना तुरही के फुकुआत आउरी सैनिक मन जोरदार शब्द करुआत।

तेबे यरीहोर चारो काति घसरी जाउआय! जसन मापरु आज्ञा डी रहूआय इसरायली मन नगरर हर चीज के नसाय देउआत। हाय मन केवल राहाब आउरी हातार परिवार के छाडी देउआत, जोन मन इसरायली मनर भाग बनी जाई रहूआत। जेबे कनानर रेबा लोग मन थानले दूसरा लोग मन सुनुआत कि इसरायली लोग मन यरीहो के नास करी देला आत, तेबे हाय मन डरी जाउआत कि इसरायली मन तिकर थाने बले हमला करबाय।

मापरु इसरायली मन के आज्ञा दि रहूआय कि कनानर रेबा बीती कोनी बले जतीर संगे शांतिर वाचा ना करबाराय। मांतरगिबेनियो नामर गोटक कनानी जाति यहोशु के झूट बोलुआय कि हाय मन कनान ले दूर गोटक जगा ने रेबा लोग आत। हाय मन यहोशु ले तिकर संगे शांतिर वाचा करबा काचे अनुरोध करूआत। यहोशु आउरी इसरायली अगुआ मन मापरु के ना पचारु आत कि हाय मनके काय करबाराय। एतार बजाय, हाय मन गिबेनियो मन संगे शांति संधि करूआत।

तीन दीनर पाचे, इसरायली मन के मालूम होउ कि गिबोनर लोग मन कनान ने ही रेबा राय। हाय मन रिसा होई जाउआत कायकाचे कि गिबेनि लोग मन हाय मनके धोका दि रहूआत। मांतरहाय मन तिकर संगे करला बीती हाय शांति संधि के बनाय करी सोंगाउआत कायकाचे कि हाय बीती मापरुर छोमे करला बीती रहूआय। तेबे खिनिक मा समयर पाचे, कनान ने रेबा बीती गोटक आउरी जाती, एमोरियोर राजा सुनुआय कि गिबेनि मन इसरायली लोग मन संगे शांति संधि करला आचे, एकाचे हाय मन अपना – अपना सेना के गोटक – गोटक करी बड़े सेना बनाउआय आउरी गिबोन थाने हमला करी देउआय। गिबोनी मन तिकर सहायता करबा काचे यहोशु लगे गोटक चिठ्ठी पटाउआत।

अतः यहोशु इसरायली सेना के जमा करूआय आउरी गिबोनी मन लगे खेटबा काचे हाय मन पूरा राती हिन्डू आत। सकार पार हाय मन एमोरी मनर सेना के चकित करी देउआत आउरी हाय मन थाने हमला करी देउआत।

हाय दिने मापरु इसरायली मन काचे लड़ला। हांय एमोरी मन के घबराय देउआय आउरी हांय बड़े – बड़े ओला घसराय करी खुबे एमोरी मन के मारी देउआय।

मापरु बेर के बले बादरी ने गोटक जागा ने ठेबाय दि रहुआय ताकि इसरायली मन के खुबे समय मिलो कि एमोरी मन के पूरा तरह ले हाराय दोत। हाय दिने मापरु इस्राएली लोग मन काचे गोटक बड़े विजय प्राप्त करुआय।

जेबे मापरु हाय सेना मनके हाराय लार पाचे, खुबे कनानी जातीर लोग मन इस्राएल न हमला करबा काचे रुंडा होउआत। यहोशु आउरी इसरायली मन हमला करी हाय मनर सर्वनाश करी देउआत।

ए लड़ाई मनर पाचे, मापरु इस्राएलर सबु गोत्र के प्रतिज्ञार हाय देश ने बाटा देउआय। तेबे मापरु इस्राएल के हातार सबु सीमा ने शांति देउआय।

जेबे यहोशु डोकरा होई जाउ आय तो इस्राएलर सबु लोग मन के गोटक संगे हाग देउआय तेबे यहोशु हाय लोग मन के सुरता दिलाऊआय कि हाय लोग मन हाय वाचा के पालन करबार किरया खायला आत जोनटा के मापरु तिकर संगे सिनेय परबत ने बाँधी रेला। हाय लोग मन मापरुर प्रति विश्वास योग्य रेबा काचे आउरी हातार व्यवस्था मनके पालन करबार किरया खाउआत।