28. धनि जुआन शासक

गोटक दिने, गोटक धनी जुआन अगुआ यीशु लगे आई करी हाके पचारू आय, "हे उत्तम गुरु, अनंत जीवन पायबा काचे मोके काय करबार चाहिए? ’ यीशु हाके बोलुआय, "तुई मोके ‘उत्तम’ काय काचे बोलबिआस? केवल गोटकीच उत्तम आय आउरी हाय मापरु आय। मांतर यदि तुई अनंत जीवन पायबार चायबी आस तो तुई मापरुर व्यवस्थार पालन कर।"

हाय पोचारू आय, ‘’मोके कोन कोन बीती आज्ञा के पालन करबार जरुरत आचे?"। यीशु जवाब देउआय,"हत्या ना कर। व्यभिचार ना कर। चोरी ना कर। झूट ना बोल। खुदर माता आउरी पितार आदर कर, आउरी खुदर पड़ोसी के खुदर जसन मया कर।"

मांतरहाय जुआन माने बोलुआय, "मुई मोर पीला दायले ए सबु आज्ञार पालन करते आयबी आची। मोक सबुदाय काचे जिन्दा रेबा काचे एबे बले काय करबार जरुरत आचे? "यीशु हाके दखु आय आउरी हाके मया करूआय।

तेबे यीशु जवाब देउआय, "अगर तुई सिद्ध होयबार चायबी आस तो जाई करी खुदर सबु के बिकी देस आउरी हाय पयसा के गरीब मनके बाटी देस, आउरी तोके सरग ले धन मिलसी। तेबे आसी करी मोर पीटी बाटे होई देस।"

जेबे हाय जुआन माने यीशुर गोट के सुनुआय तो हाय खुबे उदास होई जाउआय, काय काचे कि हाय खुबे धनी रहूआय आउरी हाय खुदर सबु सम्पति के देबार ना चायते रहूआय। हाय लेवटी केरी यीशु लगले चले जाऊआय।

तेबे यीशु खुदर चेला मनके बोलुआय, "धनी लोग मन काचे मापरुर राज्य ने ओल्बाटा खुबे कठिन आय! हां, गोटक धनी मानेर मापरुर राज ने ओल्बा टार तुलना ने कोनी ऊंटर सुईर काना थानले निकली जीबा टा आसान आय।"

जेबे चेला मन यीशुर गोट के सुनुआत तो हाय मन खुबे चकित होउआत। हाय मन बोलुआत, "अगर ए असन आय तो मापरु काके बाचायसी?"

यीशु चेला मन के दखु आय आउरी बोलुआय, "लोग मन खुद के ना बाचाय के सकेत। अमता करबाटा असम्भव आय। मांतरमापरू काचे काई बले करबाटा असम्भव नुआय।"

पतरस यीशु के बोलुआय, "हामी तो तोर चेला मन आव सबु के छाड़ी करी तोर पीटी बाटे होयलु आचू। तो हामर पुरस्कार काय होयसी?"

यीशु जवाब देउआय, "सबु लोग मन जोन मन मोर काचे घर,भाई, भोइन, बुआ, माँ, पीला या सम्पति के छाड़ला आचेत, हाय हातार ले 100 गुना खुबे पायसी आउरी अनंत जिवन के बले पायसी। मांतरखुबे असन जोन मन पोयले आचेत हाय मन पीटी बाटे होयबाय, आउरी खुबे असन जोन मन पीटी बाटे आचेत हाय मन पोयले होयबाय।"