27. दायलु सामरीर कहानी

गोटक दिने, मूसार व्यवस्था के सिखायबा बिता यीशु लगे आउआय। हाय सबु के ए दखायबार चाहते रहूआय कि यीशु गलत रीती ले शिक्षा देयसी आचे। एकाचे हाय बोलुआय, "हे गुरु अनंत जीवन के पायबा काचे मुई काय करबी?" यीशु जवाब देउआय, "मूसार व्यवस्था जोन मापरु देला आचे हाय थाने काय लिखला आचे?"

हाय माने बोलुआय, "हाय थाने अमता बोललार आचे कि खुदर मापरु के सारा मन, प्राण, सामर्थ आउरी बुद्धि ले प्रेम सोंगाव। आउरी खुदर पड़ोसी ले खुदर जसन मया सोंगाव।"यीशु जवाब देउआय,"तुई सही बोललीस! अगर तुई असन करबीस, तो तोके अनंत जीवन मिलसी।"

मांतरहाय व्यवस्थार विशेषज्ञ लोग मनके दखायबार चाहते रहूआय कि हातार जीवन जी बार तरीका सही रहूआय। एकाचे हाय यीशु के पचारू आय,"ठीक आय,तो मोर पड़ोसी कोन आय?"

यीशु हाय व्यवस्थार विशेषज्ञ के गोटक कहानी सांगबार द्वारा ने जवाब देउआय।"गोटक यहूदी माने रहूआय जोन गोटक बाट ले होई करी यरूशलेम नगर ले यरीहो नगरर यात्रा करते रहूआय।"

‘’मांतर खिनिक मा डाकू मन हाके दखुआत आउरी हातार उपरे हमला करी देउआत। हाय मन हातार सबु के धरुआत आउरी हाके मारुआत-पेटूआत आउरी अधमरा छाड़ी करी जायते जाउआत।"

‘’हातार तुरंत पाचे, गोटक यहूदी याजक हाई बाट ले होई करी जाऊआय। हाय याजक हाय माने के बाट थाने पड़ा हुआ दखु आय। जेबे हाय हाके दखुआय तो हाय बाटर दुसरा बाटे जाई करी छोमे हिंडू आय। हाय हाय माने के पूरा तरह ले अनदेखा करी देउआय।"

‘’खिनिक मा बेरा होयलार पाचे, गोटक लेवी हाय बाट ने आसूआय। (लेवी यहूदी मनर गोटक गोत्र रहूआय जोन मन मंदिर थाने महायाजक मनर सहायता करी रहूआत।) हाय लेवी बले हाय अधमरा होयला माने के दखुआय आउरी दखी करी बाटर दूसरा बाटले जायते जाउआय। हाय बले हाय मान के अनदेखा करी देउआय।"

‘’दूसरा माने जोन हाय बाट ने आसूआय हाय सामरिया देशर गोटक माने रहूआय। ( सामरी लोग आउरी यहूदी लोग मन एक दूसरा ले नफरत करते रहूआत।) तेबले बले हाय सामरी माने जेबे बाटे हाय यहूदी माने के दखुआय। तो हातार उपरे खुबे तरस खाउआय तेबे हाय हातार लगे जाउआय आउरी हातार घाव ने फोटी बांधू आय।"

‘’पाचे हाय सामरी हाय माने के खुदर गधा थाने डालूआय आउरी हाके हाय बाटले गोटक सराय ने नेउआय। जोन थाने हाय हातार देखभाल करबाटा जरी सोंगाऊआय।"

दूसरा दिने, हाय सामरी के खुदर यात्रा के जारी सोंगायबा टा जरुरी रहूआय। हाय सरायर मालिक के खिनिक पोयसा देउआय। हाय हाके बोलुआय, "ए मानेर देखभाल कर। अगर ए पयसार अलावा तोर खिनिक आउरी पयसा सरसी तो लेवट ले मुई तोर हाय खरचा के भोरी देबी।"

पाचे यीशु हाय व्यवस्थार विशेषज्ञ के पचारू आय, "तुई काय सोचबी आस? ए तीन लोग मन थानले कोन हाय मानेर पड़ोसी आय जाके जूरी रेलाय आउरी मारी रेलाय? "हाय जवाब देउआय, "हाई जोन हातार उपरे किरपा करूआय।"यीशु हाके बोलुआय, "तुई जा आउरी असनीच कर।"