26. यीशु खुदर सेवा के शुरू करूआय

शैतानर परीक्षा मनके मना करलार पाचे, यीशु लेवटी करी गलील ने आउआय। एटा हाई जागा रहूआय जोन थाने हाय रेयते रहूआय। पवित्र आत्मा हाके खुबे सामर्थ देयते रहूआय, आउरी यीशु गोटक जागा ले दूसरा जागा जाईकरी लोग मनके शिक्षा देउआय। सबु लोग मन हातार बारे ने अच्छा बात मन बोलुआत।

पाचे यीशु नासरत नगर ने जाउआय। जेबे हाय पिला रहूआय, तो हाय इ गाँव ने रेबा राय। सब्तर दिने, हाय आराधना करबा जागा ने जाऊआय। अगुआ मन हाके यशायाह भविष्य वक्तार संदेस बीती पुस्तक के देउआत। हाय मन चाहते रहूआत कि हाय हाय थानले पड़ो। अतः यीशु हाय पुस्तक के खोली करी हातार गोटक भाग के लोग मन काचे पड़ला।

यीशु ए परकार ले पड़ला, "मापरु मोके खुदर आत्मा के देला आचे कि मुई कंगाल मनके सुसमाचारर प्रचार करके सकबी। हाय मोके ए काचे पटायला आचे कि मुई कैदी मनके आजाद करबी, काना मनके दखबाटा देबी, जोन मनके दूसरा लोग मन कुचल बा आत हाय मन के छुटकारा देबी। इ बेरा आय, जेबे मापरु हामर उपरे दया करसी आउरी हामर सहायता करसी।"

पाचे यीशु बोसला। सबु लोग मन हाके खुबे ध्यान ले दखते रेलाय। हाय मन जानते रेलाय कि पवित्रशास्त्रर जोन भाग के हाय एबे पड़ला हायटा मसीहर बारे ने रेला। यीशु बोलुआय, "जोन गोट के एबे मुइ तोमर काचे पड़ली, हायटा बिलकुल एबे घटित होयसी आचे।"सबु लोग मन चकित होई जाऊआत। हाय मन बोलुआत, "काय ए युसूफर बेटा नुआय?"

तेबे यीशु बोलुआय, "एटा सते आय कि लोग मन केबे बले हाय भविष्य वक्ता के ना अपनाउ आत जोन तिकर नगर ने बाड़ी रहूआय। एलिय्याह भविष्य वक्तार बेरा ने, इस्राएल ने खुबे असन विधवा मन रहूआत। मांतर मापरु एलिय्याह के इसरायल थाने कोनी विधवार सहायता करबा काचे ना पटाउआय। एतार बजाय, हाय एलिय्याह के कोनी दूसरा देशर विधवा लगे पटाउआय।"

यीशु बोलबाटा जारी सोंगाऊआय, "आउरी एलिशा भविष्य वक्तार बेरा ने, इस्राएल थाने खुबे लोग मन चमड़ीर रोग ले पीड़ित रेलाय। मांतर एलिशा हाय मन थानले काकी बले चंगा ना करूआय। हाय केवल इस्राएलर दुसमनर सेनापति नामान के चंगा करूआय।"मांतरजोन लोग मन यीशु के सुनते रेलाय हाय मन यहूदी रेलाय। एकाचे जेबे हाय मन हाके एटा बोलबा दाय सुनुआत तो हाय मन हातार उपरे रिसा होऊआत।

नासरतर लोग मन यीशु के धरुआत आउरी हाके आराधनर जागा ले ओड़गोड़ी करी बाहरे नेउआत। आउरी हाय मन हाके गोटक पोकनार टीपे नेउआत, ताकि हाके हाय थानले घसराय करी मारी देओत। मांतरयीशु भीड़ थानले चले जाऊआय आउरी नासरत नगर के छाड़ी करी चले जाऊआय।

पाचे यीशु सबु गलीलर जागा ने जाऊआय, आउरी बड़े भीड़ हातार लगे आउआय। हाय मन अमता खुबे लोग मन के आनुआत जोन मन बीमार आउरी विकलांग रहूआत। हाय मन थानले खिनिक काना रहूआत, आउरी खिनिक दूसरा खोड़या, भोयरा या गूंगा रहूआत।

एतार अलावा, असन खुबे लोग मनके यीशु लगे आनुआत जोन मनके दुष्टआत्मा मन धरी रेउआत। यीशु दुष्टआत्मा मनके तिकर थानले निकली जीबा काचे आदेश देउआय आउरी हाय मन निकलू आत। हाय दुष्टआत्मा मन अक्सर किरकिरु आत, "तुई मापरुर बेटा आस!"भीड़र लोग मन चकित रहूआत, आउरी हाय मन मापरुर स्तुति करूआत।

पाचे यीशु बारा माने मनके चुनु आय जाके हाय प्रेरित बोलुआय। ए प्रेरित मन हातार संगे यात्रा करूआत आउरी हातार ले शिक्षा पाऊआत।