3. पुर

खुबे बेरार पाचे, संसार ने खुबे लोग मन रेयते रेलाय। हाय मन खुबे दुष्ट आउरी उपद्रवी होई जाई रहूआत। सबु अतक बुरा होई जाई रहूआय कि मापरु आखिर निर्णय धरुआय कि गोटक बड़े पुर ले ए पूरा संसार के नाश करी देबी।

मांतर मापरु नूह ले हरिक रहूआय। हाय गोटक धर्मी माने रहूआय, जोन दुष्ट माने मनर मजीगता रहूआय। मापरु नूह के सांगू आय कि हाय गोटक बड़े पुर के आनुआय बे। ए कारण, हाय नूह के गोटक बड़े नाव के बनायबा काचे बोलुआय।

मापरु नूह के गोटक डोंगा बनायबा काचे बोलुआय, जोन लगभग 140 मीटर लोम हो, 23 मीटर चौड़ा हो आउरी 13.5 मीटर डेंगर होयसी। नूह के हाके दारू ले बनायबार रहूआय आउरी हायती तीन तल, खुबे बाकरा, गोटक छत आउरी गोटक खिड़की बनायबार रहूआय। हाय डोंगा नूह, हातार परिवार, आउरी माटीर सबु परकार जानवर मनके पुर ले सुरक्षित सोंगायसी।

नूह मापरुर आज्ञा के मानला। हाय आउरी हातार तीन बेटा मन अमता डोंगा बनाउआत जसन मापरु हाय मनके सांगी रहूआय। कायकाचे हाय डोंगा खुबे बड़े रहूआय एटाकाचे हाके बनायबा काचे खुबे बोरस लागुआय। नूह लोग मनके आयबा बीती पुरर बारे ने चेतावनी देउआय आउरी हाय मनके मापरु बाटे लेवटबा काचे बोलुआय, मांतरहाय मन हातार उपरे विश्वास ना करूआत।

मापरु नूह आउरी हातार परिवार के खुदर काचे आउरी जानवर मन काचे पुरेला मा भात रुंडा करबा काचे आदेश बले देउआय। जेबे सबु तीयार होई जाउआय, तो मापरु नूह के बोलुआय की अबर हाके, हातार बायले के, हातार तीन बेटा मन के, आउरी तीकर बायले मनके-कुल आठ झन के डोंगा ने जिबार बेरा रहूआय।

मापरु सबु जानवर आउरी चेड़ेर नर आउरी मादा के नूह लगे पोटायला ताकि हाय मन डोंगा ने जायके सकोत आउरी पुर दाय सुरक्षित सोंगाया जा सकोत। मापरु असन सबु परकारर जानवर मनर सात नर आउरी सात मादा मनके पोटायला जाके बलि चेगायबा काचे उपयोग करके सकोत। जेबे हाय मन हाय डोंगा ने खेटलाय तो मापरु खुद डोंगार कोपाट के बंद करी देउआय।

तेबे बोरसा होयबा टा शुरू होयला, आउरी बोरसा होयते गला, होयते गला। ना रुकी करी चालीस दिन आउरी चालीस राती तक बोरसा होयते रहूआय। पूरा संसारर सबु चीज पानी ने बुड़ी जाउआय, अथानले बले डेंग ले डेंग परबत बले।

सुकला माटी ने रेबा बीती सबु चीज मोरी जाउआत, मांतरजोन लोग आउरी जानवर डोंगा ने रहूआत हाय मन बाची जाउआत। हाय डोंगा पानी ने पोंरते रहूआय आउरी डोंगार भीतरर सबु चीज के बुड़बा ले सुरक्षित सोंगाउआय।

बोरसार ठेबलार पाचे, पांच मास तक हाय डोंगा पानी ने पोंरते रहूआय, आउरी हाय बेरार पाचे पानी कम होयते रहूआय। तेबे गोटक दिने हाय डोंगा गोटक परबतर टिपे जाई करी टिकुआय, मांतरसंसार एबे बले पानी ले भरी रहूआय। तीन मासर पाचे, परबतर टिप मन दखा देयके मुराउआय।

पाचे चालीस दिनर पाचे, नूह गोटक कावा के एटा दखबा काचे बाहरे पोटाउआय की काय पानी सुकला की नाइ। हाय कावा सुकला माटी के डगरायबा काचे एबाटे हायबाटे उड़ते रहूआय, मांतरअमता कोनी बले जागा ना मिलुआय।

फिर पाचे नूह गोटक कबूतरी के बाहरे पोटाउआय। मांतर हाके बले कोनी सुकला माटी ना मिलुआय, एकाचे हाय नूह लगे लेवटी करी आउआय। गोटक सपतार पाचे हाँय हाय कबूतरी के फिर ले पोटाउआय, आउरी हाय खुदर चोंच ने जैतूनर गोटक नुआ पोतर के धरी करी लेवटू आय। पानी घटते रहूआय, आउरी बूटा मन फिर ले अकरते रहूआत।

नूह गोटक सपता आउरी टाकला आउरी तीसरा हार हाय कबूतरी के बाहरे पोटायला। ए बार, हाके ठेबबा काचे जागा मिलुआय आउरी हाय लेवटी करी ना आउआय। पानी सुकते रहूआय।

दुई मासर पाचे मापरु नूह के बोलुआय, ”अबर तुई आउरी तोर परिवार आउरी सबु जानवर डोंगा ले निकली आसा। खुबे सारा पिला आउरी पिला झिला मनके जनम दियास। आउरी पृथ्वी ने भरी जा।”अतः नूह आउरी हातार परिवार डोंगा ले बाहरे निकली करी आउआत।

नूहर बाहरे आयलार पाचे, हाय गोटक बेदी बनाउआय आउरी बलि काचे उपयोग करके सकबा असन सबु जानवर मन थानले खिनिक मा के धरी करी बलि चेगाउ आय। मापरु हाय बलि ले हरीक होउआय आउरी नूह आउरी हातार परिवार के आशीष देउआय।

मापरु बोलुआय, "मुई किरया करबी आची की माने मनर द्वारा करबा बुरा कामर कारण मुई पाचे केबी बले माटी के शाराप ना दी। मुई ना तो पुरर द्वारा संसार के नष्ट करबी, हालाँकि माने खुदर पिला दायले पापी आय।

पाचे मापरु खुदर वचार चीनर रुप ने पोयला बादरी धनुष के बनाउआय। जेबे केबी बले बादरी ने बादरी धनुष दखा देउआय, तो मापरु सुरता करसी कि हाय काय किरिया करला आचे आउरी अमता हातार लोग मन बले करबाय।