4. अब्राहम संगे मापरुर बादा

बाढ़र खुबे बोरसर पाचे, संसार ने खुबे लोग मन रेयते रहूआत, आउरी हाय मन फिर ले मापरु आउरी गोटक दूसरार विरुद्ध ने पाप करलाय, हाय मन सोबू गोटकीच भाषा के गोटायते रहूआत, एकाचे हाय मन गोटक संगे रुंडा होयलाय आउरी गोटक नगर के बनाय के मुरायलाय। जसन मापरु आदेश दी रहूआय, हातार अनुसार हाय मन सबु संसार ने ना फैललाय।

हाय मन घमंडी रहूआत, आउरी हाय मनके कमता जीवन जी बा राय ए बारे ने हाय मन मापरु आदेशर पालन करबार ना चाहते रहूआत। एथानले बले हाय मन गोटक अमता मीनार के बनायबार शुरू करूआत जोन सरग तक खेटसी। मापरु दखुआय की अगर हाय मन गोटक संगे मिली करी बुरा काम मनके करते रेबाय, तो आउरी बले खुबे असन पाप बीती काम के करके सकेत।

एकाचे मापरु तीकर भाषा के खुबे असन दूसरा भाषा ने बदली देउआय आउरी हाय लोग मनके सबु संसार ने फैलाय देउआय। जोन नगर के हाय मन बनायबा टा शुरू करी रहूआत हाय बाबेल बोलाय होयला, जार मतलब आय “गड़बड़ी”।

खुबे बोरसर पाचे, मापरु गोटक अब्राम नामर गोटक माने ले गोटाउआय। मापरु हाके बोलुआय, ”खुदर देश आउरी परिवार के छाड़ी करी हाय देश ने जा जोन टा के मुई तोके दखायबी। मुई तोके आशीष देबी आउरी तोर थानले गोटक बड़े जाती के बनायबी। मुई तोर नाम के महान बनायबी। जोन तोके आशीष देयसी मुई ताके आशीष देबी, आउरी जोन तोके श्राप देयसी हाके श्राप देबी। संसारर सबु कुल तोर द्वारा आशीष पायबाय।”

हाय खुदर बायले सारै के धरुआय, खुदर सबु सेवक आउरी खुदर सबु सम्पति के बले धरुआय आउरी हाय देश ने, मतलब कानन देश ने जायते जाउआय जोन मापरु हाके दखाय रहूआय।

जेबे अब्राम कानन खेटूआय तो मापरु हाके बोलुआय, ”खुदर चारो बाटे दख। मुई तोके ए सबु देश देबी आउरी तोर वंशज सबु दाय काचे एतार उपरे अधिकार सोंगायबाय।” तेबे अब्राम हाय देश ने बोसी गला।

मलिकिसिदक नामर गोटक माने रहूआय जोन सर्वोच्च मापरुर याजक रहूआय। गोटक दिने जेबे अब्राम युद्ध करला र पाचे आयते रहूआय तो हाय आउरी अब्राम मिलुआत। मलिकिसिदक अब्राम के आशीष देउआय आउरी बोलुआय ”सर्वोच्च मापरु जोन सरग आउरी पृथ्वीर मालिक आय हाय तोके आशीष दो।” पाचे अब्राम युद्ध ने जीतला बीती सबु चीज मनर दशमांश मलिकिसिदक के देउआय।

खुबे बोरस बितला, मांतर एबले बले अब्राम आउरी सारै के कोनी बेटा ना होई रहूआय। मापरु अब्राम के गोटाउआय आउरी फिर ले प्रतिज्ञा करूआय। हाय ए प्रतिज्ञा करला की हातार गोटक बेटा जनमसी आउरी जसन बादरी ने तारा मन आचेत असनी हातार खुबे असन वंशज होयबाय। अब्राम मापरुर प्रतिज्ञा उपरे विश्वास करूआय। मापरु घोषणा करूआय की अब्राम गोटक धर्मी माने रहूआय काय काचे की हाय मापरुर प्रतिज्ञा उपरे विश्वास करी रहूआय।

तेबे मापरु अब्राम ले गोटक वाचा बाँधउआय। सादा रूप ले, गोटक वाचा दुई दलर मजीगता गोटक दूसरा काचे काम करबार गोटक समझौता होउआय। मांतर ए मामला ने, मापरु अब्राम के ए प्रतिज्ञा तेबे करूआय, जेबे अब्राम सोयते रहूआय, मांतर तेबले बले मापरुर आवाज के सुन के सकते रहूआय। मापरु बोलुआय, ”मुई तोर शरीर ले जनमाय करी तोर काचे गोटक खुदर बेटा देबी। मुई तोर वंशज के ए कनान देश देबी आची।” मांतर एबले बले अब्रामर कोनी बेटा ना होउआय।