5. प्रतिज्ञार बेटा

अब्राम आउरी सारैर कनान खेटलार दस बोरसर पाचे, एबले बले तीकर कोनी बेटा ना रहूआत। एकाचे अब्रामर बायले सारैहाके बोलुआय, ”दख मापरु एबले मोके बेटा ना देला आचे। आउरी मुई अबर बेटा जनमायबा काचे खुबे डोकरी होई गली आची। अबर सुन मोर दासी हाजिरा इ थाने आचे।

अतः अब्राम हाजिरा ले बिया करूआय। हाजिरा ले गोटक बेटा जनमु आय, अब्राम हातार नाम इश्माएल सोंगाउआय। मांतर सारैहाजिरा ले कुचर होयते रहूआय। जेबे इश्माएल तेरा बोरसर रहूआय, मापरु अब्राम ले फिर ले गोटाउआय।

मापरु बोलुआय, ”मुई सर्व-शक्तिमान मापरु आय। मुई तोर संगे गोटक वाचा बाँधबी।” तेबे अब्राम माटी थाने घसरी करी दंडवत करूआय। मापरु अब्राम के ए बले बोलुआय की, ”तुई सबु जातिर बुआ होयबिस। मुई तोके आउरी तोर वंशज के तीकर निज माटी होयबा काचे कनान देश देबी आउरी सबु दाय काचे तीकर मापरु होयबी। तोके खुदर घरानार सबु मानेर खतना करबा राय।”

तोर बायले सारैगोटक बेटा के जनम देयसी-हाय प्रतिज्ञार बेटा होयसी। हातार नाम इसहाक सोंगाव। मुई हातार संगे मोर वाचा के बनाय करी सोंगायबी आउरी हाय गोटक बड़े जाति बनी जायसी। मुई इश्माएल के बले गोटक बड़े जाति बनायबी, मांतर मोर वाचा इसहाक संगे रहसी।” तेबे मापरु अब्रामर नाम बदली करी अब्राहम सोंगाय करी देउआय, जार मतलब आय “खुबे लोगर बुआ”। मापरु सारैर नाम बदली करी सारा करी देउआय, जार मतलब आय “मूलमाता”।

हाय दिने, अब्राहम खुदर घरानार सबु मानेर खतना करूआय। लगभग गोटक बोरसर पाचे अब्राहम 100 बोरसर रहूआय आउरी सारा 90 बोरसर रहूआय। तेबे सारा अब्राहमर बेटा के जनम देउआय। जसन मापरु तीके बोली रहूआय हाय मन हातार नाम इसहाक सोंगाउआत।

जेबे इसहाक जुआन होउआय, तेबे मापरु अब्राहमर विश्वासर परीक्षा करूआय। मापरु बोलुआय, ”खुदर गोटक लौता बेटा के धर, आउरी हाके मोर काचे बलिर रूप ने चेगाय देस। ”फिर ले अब्राहम मापरुर आज्ञा के मानुआय आउरी खुदर बेटा के बलि करबा काचे तीयार करूआय।

जेबे अब्राहम आउरी इसहाक बलि चेगायबा जागा बाटे जायते रहूआत तो इसहाक पोचारूआय, ”हे बुआ, हामर लगे बलि काचे दारु तो आचे, मांतर बलि करबार मेमना कोनती आचे?” अब्राहम जवाब देउआय, ”हे मोर बेटा, मापरु बलि करबा काचे मेमनार जुगाड़ करसी।”

जेबे हाय मन बलि चेगायबा जागा ने खेटलाय, तो अब्राहम इसहाक के बाँधी करी बेदी थाने सुआय देउआय। हाय खुदर बेटा के मारबा काचे होई रहूआय की मापरु बोलुआय,”ठेबी जा! पिला के नुकसान ना खेटाव! अबर मुई जानी गली आची की तुई मोर भय मानुआस कायकाचे की तुई तोर गोटक बेटा के बले मोर थानले बाचाय करी ना सोंगायलिस।”

लगे अब्राहम गोटक मेंडा के दखुआय जोन झाड़ी थाने लटकी रहूआय। इसहाकर बदला ने बलि काचे मापरु मेंडार जुगाड़ करूआय। अब्राहम हरिक-हरिक मेंडार बलि चेगाय देउआय।

तेबे मापरु अब्राहम के बोलुआय, ”तुई मोर काचे सबु के देबा काचे इच्छा करी रेलीस, एथानले बले की खुदर गोटक बेटा के बले। एकाचे मुई तोके आशीष देबार प्रतिज्ञा करबी आची। तोर वंशज बादरीर तारा मन ले बले खुबे होयबाय। कायकाचे की तुई मोर आज्ञा के मानली आस एकाचे मुई तोर परिवारर द्वारा संसारर सबु कुल मनके आशीष देबी।”