6. मापरु इसहाक काचे जुगाड़ करुआय

जेबे अब्राहम खुबे डोकरा होई रहूआय तेबे हातार बेटा, इसहाक, गोटक मानेर बोरसर होई रहूआय। एकाचे अब्राहम खुदर गोटक सेवक के हाय देश ने पोटाउआय, जोन थाने हातार लोगबाग मन रेयते रहूआत, ताकि हाय खुदर बेटा इसहाक काचे बायले आनके सको।

गोटक लम्बा यात्रार पाचे, अब्राहमर सेवक हाय देश ने जाउआय, जोन थाने अब्राहमर लोगबाग मन रेयते रहूआत। मापरु हातार अगुवाई करूआय, की हाय रिबका ले मिलो।

रिबका खुदर परिवार के छाड़ी करी हाय सेवक संगे इसहाकर घरे लेवटी जिबा काचे मानुआय। जसन रिबका खेटूआय, इसहाक हातार संगे बिया करूआय।

गोटक लम्बा बेरार पाचे अब्राहम मोरी जाउआय। तेबे मापरु अब्राहमर बेटा इसहाक के आशीष देउआय, कायकाचे की मापरु अब्राहम संगे वाचा बाँधी रहूआय। हाय वाचा ने मापरुर गोटक प्रतिज्ञा एटा रहूआय की अब्राहमर गिनके ना सकलामा वंशज होयबाय। मांतर इसहाकर बायलेर बेटा-बेटीर जनम ना होउआय।

इसहाक रिबका काचे पारतना करूआय, आउरी मापरु हाके जुड़ाव पिला के पेटे हारिन होयबा काचे सक्षम करूआय। जोन बेरा हाय पिला मन रिबकार पेटे रहूआत हाय मन लड़ते रहूआत, एकाचे रिबका मापरु के पोचारू आय की ए काय होयसी आचे।

मापरी रिबका के बोलुआय, ”तुई दुई ठन बेटा के जनम देबीस। हातार वंशज अलग-अलग जाति बनबाय। हाय मन गोटक दूसरा ले लड़बाय। मांतर बड़े बेटा ले जनमबा बीती जाति के छोटे बेटा ले आयबा बीती जातिर आज्ञा के मानके पड़सी।”

जेबे रिबका पिला मनके जनम देउआय, तो बड़े बेटा लाल आउरी रुंआदार रहूआय, आउरी हाय मन हातार नाम एसाव सोंगाउआत। तेबे छोटे बेटा एसावर लेड़ी के धरी करी जममुआय, आउरी हाय मन हातार नाम याकूब सोंगाउआत।