7. मापरू याकूब के आशीष देउआय

जेबे हाय पिला मन बड़े होउआत तो याकूब के घरे रेबाटा अच्छा लागुआय, मांतर एसाव के जानवर मनर शिकार करबाटा भायला, मांतर इसहाक एसाव ले मोया करते रहूआय।

गोटक दिने जेबे एसाव शिकार करी लेवटी आउआय तो हाके खुबे भूक लागूआय। एसाव याकूब के बोलुआय, ”जोनटा के तुई बनायली आस हाय थानले खिनिक मा मोके देस।” याकूब जवाब देउआय, ”पोयले मोके ए प्रतिज्ञा कर की पहलौठा होयबार कारण ले सबु चीज जोन तोके मिलबार चाहिए, हाय सबु के मोके देबीस।”अतः एसाव हाय सबु चीज के याकूब के देबार प्रतिज्ञा करी देउआय। तेबे याकूब हाके खिनिक मा भात देउआय।

इसहाक एसाव के आशीष देबार चायते रहूआय, मांतर एतार पोयले की हाय अमता करता, रिबका आउरी याकूब, इसहाक संगे धोका करूआत। हाय मन याकूब के एसाव होयबार दिखावा करूआत। इसहाक डोकरा रहूआय आउरी अबर दखके ना पारते रहूआय। एकाचे याकूब एसावर फोटी के पिंदी करी आउरी बकरीर खाल के खुदर टोडरी आउरी हाथ थाने गुड़ाउआय।

याकूब इसहाक लगे आउआय आउरी बोलुआय, ”मुई एसाव आय। मुई एकाचे आयली आची की तुई मोके आशीष देस।” जेबे इसाहक बकरीर बाल के महसूस करूआय आउरी फोटी के सुन्घुआय, तो हाय सोचुआय की हाय एसाव आय आउरी हाके आशीष देउआय।

एसाव याकूब संगे नफरत करूआय कायकाचे की याकूब हातार पोयला बेटा होयबार अधिकार के आउरी हातार संगे हातार आशीष के बले धरी रहूआय। अतः हाय तीकर बुआर मोरला र पाचे याकूब के मारी देबार योजना बनाउआय।

मांतर रिबका एसावर योजना के सुनुआय। एकाचे हाय आउरी इसहाक याकूब के तीकर लोगबाग संगे रेबा काचे खुबे दूर पोटाय देउआत।

याकूब खुबे बोरस तक रिबकार लोगबाग मन संगे रहूआय। हाय बेरार दाय हाय बिया करूआय आउरी बारा बेटा आउरी गोटक बेटी के जनमाउआय। मापरु हाके खुबे धनी बनाय देउआय।

बीस बोरस ले कनान देश ने खुदर घर ले दूर रेलार पाचे, याकूब खुदर परिवार, खुदर सेवक, आउरी खुदर जानवर मनर सबु रासी संगे हाय थाने वापिस लेवटला।

याकूब ए काचे खुबे डरी रहूआय कायकाचे की हाय सोचते रहूआय की एसाव एबे बले हाके मारी देबार चायते रहसी। एकाचे हाय उपहारर रूप ने जानवर मनर रासी के एसाव लगे पोटाउआय। जोन सेवक मन हाय रासी मनके धरी करी जाई रहूआत हाय मन बोलूआत, ”तोर दास याकूब, ए जानवर मनके तोके देयसी आचे। हाय झोपके आयसी आचे।”

मांतर अबर एसाव याकूब के नुकसान खेटायबार ना चायते रहूआय। एतार बजाय, हाय हाके गोटक हार फिर ले दखी करी खुबे हरिक रहूआय। हातार पाचे याकूब कनान ने शांति ले रहूआय। पाचे इसहाक मोरी जाउआय आउरी याकूब आउरी एसाव हाके पाहटूआत। वाचार प्रतिज्ञा जोन मापरु अब्राहम संगे करी रहूआय हाय अबर इसहाक ले याकूब लगे खेटूआय।