30. यीशुर पांच हजार लोग के खाना खुआउ आय

यीशु खुदर प्रेरित मनके प्रचार करबा काचे आउरी लोग मनके शिक्षा देबा काचे खुबे असन अलग – अलग गाँव थाने पटाउआय। जेबे हाय मन लेवटू आत जोन लगे यीशु रहूआय तो हाय मन हाके सांगूआत कि हाय मन काय करी रहूआत। तेबे यीशु हाय मनके झीलर दूसरा बाटे तार संगे गोटक शांत जागा ने जाई करी खिनिक बेरा आराम करबा काचे हाग देउआय। अतः हाय मन गोटक डोंगा थाने चेगुआत आउरी झीलर दूसरा बाटे चले जाऊआत।

मांतरहाय थाने खुबे लोग मन रहूआत जोन मन यीशु के आउरी हातार चेला मनके डोंगा थाने जीबा दाय दखी रहूआत। एटा जानी करी लोग मन बले झीलर दूसरा बाटे जीबा काचे झीलर रेटे–रेटे पोराऊआत आउरी हाय मन ले पोयले जाई करी खेटू आत। अतः जेबे यीशु आउरी हातार चेला मन खेटूआत तो इ लोग मनर गोटक बड़े समूह तीके पोयलेले हाय लगे टाकी रहूआत।

हाय भीड़ ने बायले आउरी बच्चा मनर गिनतीर बिना 5,000 ले खुबे माने मन रहूआत। यीशु हाय लोग मन उपरे खुबे तरस खाऊआय। यीशु काचे हाय लोगो मन हाय मेंडा मन जसन रहूआत जार कोनी धोरी ना रहूआत। एकाचे हाय तीके शिक्षा देउआय आउरी तिकर बीच थाने जोन मन बीमार रहूआत हाय मनके चंगा करूआय।

दिनर सरबा दाय, चेला मन यीशु के बोलुआत, "एबे देर होई गला आचे आउरी आसपास ने कोनी नगर बले निआय। ए लोग मनके विदा कर कि ए मन जाई करी खायबा काचे काई टा धरोत।"

मांतरयीशु चेला मनके बोलुआय, "तोमी हाय मनके खायबा काचे काई टा दियास!"हाय मन जवाब देउआत, "हामी अमता ना करके सकबु? हामर लगे केवल पांचटा रोटी आउरी दुई ठन मछली आचे।"

यीशु खुदर चेला मनके बोलुआय कि हाय मन भीड़र लोग मनके चारा थाने पचास – पचासर रुंडा थाने बोसबा काचे बोलोत।

तेबे यीशु पांच रोटी आउरी दुई मछली के धरी करी सरग बाटे दखुआय, आउरी हाय भोजन काचे मापरु के धनेवाद देउआय।

आउरी यीशु रोटी मनके टुटाय-टूटाय करी चेला मनके देयते जाउआय की हाय मन लोग मनके बांटोत, आउरी हाय दुई ठन मछली मन के बले हाय सबु ने बांटी देउआय। हाय लोग मनके देबा काचे खुदर चेला मनके हाय गोंदा मनके देउआय। चेला मन हाय भोजन के बाटते रहूआत, आउरी हायटा केबी ना सरूआय! हाय लोग मन खाई करी तृप्त होई जाउआत।

एतार पाचे, चेला मन भोजन के रुंडा करूआत जाके ना खायी रहूआत आउरी हाय गोंदा ले भोरी होयला बारा टुकना के उठाउआत! हाय सबु भोजन हाय पांच रोटी आउरी दुई मछली ले आई रहूआय।