31. यीशु पानी थाने हिंडू आय

पांच हजार लोग के भोजन कराय लार पाचे, यीशु खुदर चेला मनके डोंगा ने चेगबा काचे बोलुआय। हाय तीके झीलर दूसरा बाटे जीबा काचे बोलुआय जबकि हाय खिनिक मा बेरा काचे हाई थाने ठेबी जाऊआय। अतः चेला मन चले जाऊआत आउरी यीशु भीड़ के विदा करूआय कि हाय मन खुदर घरे जाओत। एतार पाचे यीशुपारतना करबा काचे गोटक परबत ने जाउआय। हाय थाने हाय एकला रहूआय,आउरी हाय देर राती तक पारतना करूआय।

हाय बेरा, चेला मन खुदर डोंगा थाने जायते रहूआत, मांतरहव्वा तिकर विरुद्ध ने खुबे जोर ले बहते रहूआय। खुबे राती होयलार पाचे बले हाय मन केवल बीच ने खेटी रहूआत।

हाय बेरा यीशु पारतना करबा टा सराऊ आय आउरी खुदर चेला मन लगे लेवटबा टा शुरू करूआय। हाय डोंगा बाटे जीबा काचे पानी उपरे हिंडते रहूआय।

तेबे चेला मन हाके दखुआत। हाय मन खुबे डरी जाऊआत कायकाचे कि हाय मन सोची रहूआत कि हाय कोनी भुत आय। यीशु जानते रहूआय कि हाय मन डरी जाई रहूआत, एकाचे हाय आवाज दि करी बोलुआय, "ना डरा,एटा मुई आंय!"

तेबे पतरस यीशु के बोलुआय, "हे परबु,एटा अगर तुई आस तो मोके पानी थाने हिंडी करी तोर लगे आयबा काचे आदेश देस।" यीशु पतरस के बोलुआय, "आ!"

अतः पतरस डोंगा थानले उतरी जाऊआय आउरी यीशु लगे जीबा काचे पानीर उपरे हिंडके मुराऊ आय। मांतरखिनिक मा दूर जाई करी, हाय खुदर आँकी के यीशु बाटले गुचाउआय आउरी लहर के दखुआय आउरी तेज हव्वा के महसूस करके मुराऊआय।

तेबे पतरस डरी जाऊआय आउरी पानी ने डूबते रहूआय। हाय किरकिरू आय,हे परबू मोके बाचाव! "यीशु हड़कीच दाय हाथ बड़ाय करी हाके धरुआय। तेबे हाय पतरस के बोलुआय, "तोर विश्वास खुबे कम आय! तोके बाचायबा काचे तुई मोर उपरे भरोसा काय काचे ना करलीस?"

तेबे यीशु आउरी पतरस डोंगा थाने चेगुआत, आउरी हड़कीच दाय हवार बह बा टा बंद होई जाऊआय। पानी शांत होई जाऊआय। चेला मन चकित होईकरी यीशुर छोमे मांडी खुठा देउआत। हाय मन हातार आराधना करूआत आउरी हाके बलुआत,"सचमुच तुई मापरुरु बेटा आस।"