32. यीशु दुष्टआत्मा ग्रस्त माने के आउरी गोटक बीमार बायले के चंगा करूआय

यीशु आउरी हातार चेला खुदर डोंगा ने चेगी करी हाय जागा ने जाऊआत जोन थाने गिरासेनी लोग मन रहूआत। हाय मन हाय जागा ने खेटी करी डोंगा ले उतरुआत।

हाय थाने गोटक माने रहूआय जोन दुष्टआत्मा धरी रहूआय।

ए माने अतक ताकतबर रहूआय कि कोनी बाले हाके नियंत्रित करके ना सकी रहूआत। खुबे बेरा लोग मन हातार हाथ आउरी गोड़ के जंजीर थानले बाँधी रहूआत, मांतरहाय हाय मनके टुटाय देबा राय।

हाय माने हाय जागार मोड़ा भाटी ने रेबा राय। हाय माने सबु दिना आउरी सबु राती कीरकीर बा राय। हाय फोटी ना पिंद बा राय आउरी अक्सर खुद के पोकना थानले घायल करबा राय।

जमता हाय माने यीशु के दखुआय तो हाय पोराय करी हातार लगे आउआय। आउरी हातार छोमे मांडी खुटा देउआय। तेबे यीशु हाय मानेर भितरे जोन दुष्टआत्मा रहूआय हाके बोलुआय, "ए माने थानले बाहरे निकली आव!"

हाय दुष्ट आत्मा जोर ले किरकिरु आय,"हे यीशु,परम प्रधान मापरुर बेटा, तोर मोर संगे काय काम आचे? किरपा करी मोके ना सताव!"तेबे यीशु हाय दुष्ट आत्मा के पचारू आय, "तोर काय नाम आय?"हाय जवाब देउआय, "मोर नाम सेना आय,कायकाचे कि हामी खुबे आंव।"( रोमी सेना ने खुबे हजारर सैनिक मनर गोटक समूह गोटक ‘’सेना" होयते रेला।)

हाय दुष्ट आत्मा मन यीशु के विनती करू आत कि, "किरपा करी हामके ए जागा ले बाहरे ना पटाव!"हायी लगर पहाड़ी ने सुअर मनर रासी चरते रेला। एकाचे हाय दुष्टआत्मा मन यीशु ले विनती करूआत कि,"कीरपा करी हामके हाय सूअर मन थाने पटाय देस!"यीशु बोलुआय,"ठीक आय, तिकर थाने चले जा!"

अतः हाय दुष्ट आत्मा मन हाय माने थानले निकली करी हाय सूअर मन थाने ओलुआत। हाय सूअर मन पोराय करी गोटक ठीयां टिला थानले झील थाने कुदुआत आउरी सबु डूबी मोरुआत। हाय राशी थाने लगभग 2,000 सूअर मन रहुआत।

हाय थाने हाय सूअर मनर राका करबा लोग मन रहुआत। जोन बले हूई रहूआय जेबे हाय मन दखु आत तो हाय मन नगर थाने पोराउ आत। यीशु जोन टा के करी रहूआय हाय थाने हाय मन सबु के सांगूआत। हाय नगरर लोग मन निकली करी आसूआत आउरी हाय माने के दखु आत जार थाने दुष्टआत्मा रहूआय। हाय शांति ले, फोटी पिंदि करी, आउरी गोटक सामान्य माने असन व्यहवार करी बोसी रहूआय।

हाय लोग मन खुबे डरी जाऊआत आउरी हाय मन यीशु के चले जीबा काचे बोलुआत। अतः यीशु डोंगा थाने चेगुआय। हाय मने जार थाने दुष्ट आत्मा रहूआय हाय यीशु संगे जीबा काचे विनती करूआय।

मांतरयीशु हाके बोलु आय, "नाई। मुई चाहबी आची कि तुई घरे जाई करी सबु के सांग कि मापरु तोर काचे काय करला आचे। हाय मनके सांग कि कसन मापरु तोर उपरे दया करी रेला।"

एकाचे हाय माने चले जाऊआय आउरी सबु के ए बारे ने सांगूआय जोन टा के यीशु हातार काचे बोली रहूआय। हातार कहानी के सुंनबा बीता सबु लोग मन चकित होऊआत।

यीशु झीलर दूसरा बाटे लेवटी आउआय। हातार हाय लगे खेटलार पाचे, गोटक बड़े भीड़ हातार आसपास रुंडा होउ आय आउरी हाके दबाय के मुराऊआत। हाय भीड़ ने गोटक बायले रहूआय जोन बारा बरस ले लउ बोयबार समस्या ले पीड़ित रहूआय। हाय खुदर सबु पयसा के ओसो बीता मन थाने लगाय दी रहूआय कि हाय मन हाके ठीक करके सकोत, मांतरहातार रोग आउरी बले बिगड़ी जाई रहूआय।

हाय सुनी रहूआय कि यीशु कई बीमार लोग मन के ठीक करला आचे आउरी हाय सोचु आय,"मुई निश्चित आची कि अगर मुई केवल यीशुर फोटी के बले छिंबी, तो मुई ठीक होई जीबी!"एकाचे हाय यीशुर पीटी बटले आऊआय आउरी हातार फोटी के छिंउ आय। जमता हाय हाके छिंउ आय, हातार लहू बोयबा टा बंद होई जाऊआय।

हड़कीच दाय यीशु जानू आय कि हातार भीतर ले सामर्थ निकलला आचे। एकाचे हाय पिटी बाटे मुड़ी करी पचारू आय कि, "मोके कोन छिंला?" चेला मन जवाब देउआत कि, " एथाने अतक सबु लोग मन तोर चारो बाटे भीड़ लगायला आत, आउरी तोके ठेगलबा आत। तो तुई कायकाचे पचारलीस कि मोके कोन छिं ला आचे?"

हाय बायले यीशुर छोमे कांपते हुए आउरी डरी करी खुदर मांडी खुटा ने बोसू आय। तेबे हाय हाके सांगी देउआय कि हाय काय करला आचे, आउरी ए बले की हाय ठीक होई गला आचे। यीशु हाके बोलुआय, "तोर विश्वास तोके चंगा करला आचे। शन्ति ले घरे जा।"