44. पतरस आउरी यूहन्ना गोटक भिकारी के चंगा करूआत

गोटक दिन, पतरस आउरी युहन्ना मंदिर ने जाऊआत। गोटक हिंड के ना सकबा माने भिक मांगबा काचे कोपाट लगे बोसी रहूआय।

पतरस हाय खोड़ाया माने बाटे दखु आय आउरी बोलुआय, "मोर लगे तोके देबा काचे पयसा तो निआय। मांतरजोन टा मोर लगे आचे हाय टा के मुई तोके देबी आची। यीशु र नाम ले उठ, आउरी हिंडा बुला हो!"

हड़कीच दाय, मापरु हाय खोड़या माने के चंगा करी देउआय। हाय एबाटे हाय बाटे हिंड बाटा आउरी डोगाय बाटा, आउरी मापरुर स्तुति करबाटा शुरू करूआय। मंदिरर दुआर ने रेला लोग मन अचंभित रहूआत।

हड़कीच दाय लोग मनर गोटक भीड़ हाय माने के दखबा काचे आऊआय जोन चंगा होई रहूआय। पतरस हाय मनके बोलुआय, "ए माने ठीक आचे, मांतरए गोट ने अचंभित ना हुआ। हामी एके खुदर ताकत ले ठीक ना करलू आचू, या एकाचे ना करलू आचू कि हामी मापरुर आदर करूआव। मान्तर, हाय यीशु आय जोन ए माने के खुदर ताकत ले चंगा करला आचे, काय काचे कि हामी यीशुर उपरे भरोसा करूआव।"

"हाय टा तोमी आस जोन मन हाय रोमी राज्यपाल के यीशु के मारबा काचे बोली रेलास। तोमी हाके मारी देलास जोन सबु के जीवन देउआय। मांतरमापरु हाके मोरला थानले जिन्दा करला। तोमी ना समझलास कि तोमी काय करते रेलास, मांतरजेबे तोमी हाय काम मनके करते रास, तो जोन भविष्यवक्ता बोली रेला हाय टा पूरा होयला। हाय मन बोली रेलाय कि मसीह दुःख उठायसी आउरी मोरी जायसी। मापरु ए तरीका ले होयके देला। ए काचे अबर पश्चाताप करा आउरी मापरु बाटे लेवटा, ताकि हाय तोमर पाप के धोई करी साफ़ करी देओ।"

जेबे मंदिरर अगुआ मन पतरस आउरी यहुन्ना के सुनुआत, तो हाय मन घबराय जाउआत। ए काचे हाय मन तिके गिरफ्तार करी जेलखाना ने डाली देउआत। मांतरजोन पतरस बोली रहूआय हातार उपरे खुबे लोग मन विस्वास करूआत। यीशु उपरे विस्वास करबा लोगर गिनती बड़ी करी लगभग 5,000 होई जाऊआय।

दूसरा दिने, हाय यहूदी अगुआ मन पतरस आउरी यहुन्ना के महायाजक आउरी दूसरा धार्मिक अगुआ मनर छोमे धरी करी आनुआत। हाय मन हाय माने के बले धरी करी आनुआत जोन हिंड के ना सकते रहूआय। हाय मन पतरस आउरी यहुन्ना के पचारू आत, "कोन अधिकार ले तोमी हाय हिंड के ना सकबा माने के चंगा करलास?"

पतरस जवाब देउआय, "हाय माने जोन तोमर छोमे ठिया आचे हाके यीशु मसीहर सामर्थ द्वारा चंगा कराला आत। तोमी यीशु के क्रूश ने चेगायला आस, मांतरमापरु हाके फिर जिन्दा करी देला आचे! तोमी हाके अस्वीकार करलास, मांतर यीशु र सामर्थर जरियार अलावा उद्धार पायबार कोनी दूसरा बाट निआय!"

हाय अगुआ मन हैरान रेलाय कि पतरस आउरी युहन्ना खुबे साहसी रुप ले बात करलाय। हाय मन दखुआत कि ए मन साधारण माने मन रहूआत जोन मन अनपड़ रहूआत। पाचे हाय मनके सुरता आऊआय कि ए माने मन यीशु संगे रेबाराय। एकाचे हाय मन तिके बोलुआत, "हामी तोमके खुबे दंड देबू अगर तोमी ए माने यीशुर बारे ने लोग मनके कोनी आउरी संदेस देबास तो।"अमता खुबे गोट बोललार पाचे, हाय मन पतरस आउरी युहन्ना के जायके देलाय।