43. कलीसियार शुरु होउआय

यीशु सरग ने लेवटलार पाचे, चेला मन यरूशलेम ने ठेबलाय जसन कि यीशु हाय मन के करबा काचे आदेस दि रेला। हाय थानर विश्वासी लोग मन लगातार गोटक संगे पारतना करबा काचे रुंडा होयते रेलाय।

सबु बोरस, फसहर परब के 50 दिनर पाचे, यहूदी लोग मन पिन्तेकुस्त नामर गोटक जरुरी दिन के बनायते रहूआत। पिन्तेकुस्त हाय बेरा रहूआय जेबे यहूदी लोग मन गेंहूर कटाई के बनाय ते रेलाय। सबु संसारर यहूदी लोग मन पिन्तेकुस्तर दिन के गोटक संगे बनायबा काचे यरूशलेम ने आई रेलाय। ए बरस, पिन्तेकुस्त बनायबार बेरा यीशर सरग ने गलार लगभग गोटक सपतार पाचे आउआय।

जोन बेरा सबु विश्वासी मन गोटक लगे रुंडा होई रेलाय, तो जोन घर ने हाय मन रहूआत अचानक ले हाय जोर लर हवा चलबार आवाज ले भोरी जाऊआय। तेबे जोय असन दखबा बीती काय आले सबु विश्वासीर मुंडी उपरे दखा देउआय। हाय मन सबु पवित्र आत्मा ले भोरी जाउआत आउरी दूसरा भासा मन थाने मापरुर स्तुति करूआत। एटा हाय भासा मन रहूआय जोन टा के बोलबा काचे तीके पवित्र आत्मा सक्षम करूआय।

जेबे यरूशलेम ने रेबा बीती लोग मन हाय कोलार के सुनुआ, तो हाय मन भीड़ होई करी ए दखके आऊआत कि काय होयते रेला। हाय मन विश्वासी मन के मापरुर करला बीती बड़े – बड़े कामर घोषणा करबादाय सुनुआत। हाय मन चोकि जाई रहूआत काय काचे कि हाय मन हाय काम मनके के खुदर भासा के सुनते रहूआत।

एथानले खिनिक मा लोग मन बोलुआत कि हाय चेला मन नसा ने आचेत। मांतर पतरस ठीआ उठू आय आउरी आय मनके बोलुआय, "मोर गोट के सुना! हाय मन नसा ने नियात! एतार बजाय, जोन टा तोमी दखु आस कि एटा हाई टा आय जोन टा के योएल भाविस्यवक्ता बोली रे कि होयसी : मापरु बोलला कि अंतर दिन ने, मुई खुदर आत्मा के उलद बी।"

"हे इसरायली माने मन, यीशु गोटक अमता माने रेला जोन ए दखायबा काचे कि हाय कोन रे खुबे असन अनोखा काम मनके करी रेला। हाय मापरुर समर्थ ले खुबे असन अद्भुत काम मनके करी रेला। तोमी ए जानास, काय काचे कि तोमी ए काम मनके दखला आस। मांतरतोमी हाके क्रूश ने चेगाय देलास!"

" यीशु मोरी गला मांतरमापरु हाके हाय मोरला थानले जिन्दा करी देला। ए हाय गोट के पूरा करी देला जाके गोटक भविष्यवक्ता लिखी रेला:’ तुई खुदर पवित्र झन के कबर ने सड़के ना दिस।’ हामी गवाह आव कि मापरु यीशु कि फीर ले जिन्दा करी देला।"

"मापरु पिता अबर यीशु के खुदर बुजनी बाटे बोसाय करी हाके आदर देला आचे। आउरी यीशु हामर काचे पवित्र आत्मा के पटायला आचे जसन हाय किरया करी रेला हाय पोटायसी। पवित्र आत्मा ही हाय काम मनके होयके देयसी आचे जोन टा के तोमी दखबा आस आउरी सुनबा आस।"

" तोमी हाय माने, यीशु के क्रूश ने चेगाय देलास। मांतरनिश्चित रुप ले जाना कि मापरु यीशु के सबु उपरे परभू आउरी मसीह दुनो ठहरायला आचे!"

पतरस सुनबा लोग मन हातार बोलला बीती गोट ले भीतरे तक हाली जाई रेलाय। एकाचे हाय मन पतरस आउरी चेला मनके पचारू आत, "हे भाई मन, हामके काय करबार चाहिए?"

पतरस हाय मनके जवाब देउआय, "तोमी मन थानले सबु खुदर पाप मन काचे पश्चाताप करा ताकि मापरु तोमोर पाप के छमा करो, आउरी यीशु मसीहर नाम ले बपतिस्मा धरा। तेबे हाय तोमके वरदानर रुप ने पवित्र आत्मा बले देयसी।"

पतरस बोलुआय हातार उपरे लगभग 3,000 लोग मन विस्वास करूआत आउरी यीशुर चेला बनूआत। हाय मन बपतिस्मा धरुआत आउरी यरूशलेमर कलिस्यार हीस्सा बनी जाऊआत।

जेबे प्रेरित मन हाय मनके शिक्षा देउआत तो विश्वासी मन लगातार सुनुआत। हाय मन लगातार मिलते रहुआत आउरी गोटक संगे भात खायते रहूआत, आउरी हाय मन अक्सर एक दूसरा काचे पारतना करूआत। हाय मन मीली करी मापरुर स्तुति करूआत आउरी जोन टा बाले तिकर लगे रहूआय हाय मन एक दूसरा संगे बाटा करूआत। नगरर सबु माने मन तिकर काचे अच्छा विचार सोंगायते रेलाय। सबु दिना, खुबे ले खुबे लोग मन विश्वासी बनते गलाय।