42. यीशु सरग ने लेवटू आय

जोन दिने मापरु यीशु के मोरला थानले जिन्दा करी रहूआय, हातार दुई ठन चेला मन लगर गोटक गाँव ने जायते रहूआत। हिंडबा दाय जोन टा यीशु संगे होई रहूआय। हातार बारे ने गोटाय रे रहूआत, हाय मनके आशा रहूआय कि हाय मसीह रेला, मांतरतेबले बले हाय मार डाला गला। अबर हाय बायले मन बोलबा आत कि हाय फिर ले जी उठला आचे। हाय मन ना जानते रहुआत कि काय गोट ने विस्वास करबा राय।

यीशु हाय मन लगे आई करी तिकर संगे हिंडबार शुरू करला, मांतर हाय मन हाके ना चिताय लाय। हाय पचारू आय कि हाय मन काय बारे ने गोटाय ते रेलाय। हाय मन हाके पिछला दिनर यीशु संगे होयला बीती सबु घटना के सांग लाय। हाय मन बिचारेला य कि हाय मन कोनि अलग माने संगे गोटाय ते रेलाय जोन ना जानते रे कि यरूशलेम ने काय होई रेला।

तेबे यीशु हाय मन के समझाऊ आय कि मापरुर वचन मसीहर बारे ने काय बोलसी आचे। खुबे पयले, भविष्य वक्ता मन बोली रेलाय कि बुरा लोग मन मसीह के दुःख देबाय आउरी मारी देबाय। मांतरभविष्य वक्ता मन ए बले बोली रेलाय कि हाय तीसर दिन ने जी उठसी।

जेबे हाय मन हाय नगर ने खेटू आत जोन थाने हाय दुई झन मन ठेबते रहूआत, तेबे तक लगभग संज होई रहूआय। हाय मन यीशु के तिकर संगे ठेबबा काचे हागदेउआत,अतः हाय तिकर संगे गोटक घरे जाऊआय। खुदर संज बेरार भात खायबा काचे हाय मन बोसूआत। यीशु गोटक रोटी के धरी करी हातार काचे मापरुर धनेवाद करूआय, आउरी पाचे हाके टुटाउ आय। अचानक ले हाय मन जानूआत कि हाय यीशु आय। मांतरहड़कीच दाय, हाय तिकर आँकी छोमले गायब होई जाऊआय।

हाय दुई झन मन एक दूसरा के बोलुआत, "हाय यीशु रेला! एकाचे जेबे हाय हामके मापरुर वचन के समझाय रे तो हामी खुबे हरिक रु!"हड़कीच दाय हाय मन निकली करी वापस यरूशलेम ने जाऊआत। जेबे हाय मन खेटू आत तो हाय मन चेला मनके सांगूआत, "यीशु जिन्दा आचे! हामी हाके दखलु आचु!"

जेबे चेला मन बोलते रहूआत, तो अचानक ले हाय बाकरा थाने यीशु मसीह तिकर संगे दखा देउआय। हाय बोलुआय, "तोमके शांति मिलो!"चेला मन सोचुआत कि हाय कोनी भुत आय, मांतर यीशु बोलुआय, "तोमी काय काचे डरबा आस? तोमी एटा काय काचे ना सोचास कि एटा सचमुच ने मुई आय, यीशु आय? मोर हाथ आउरी गोड़ के दखा भुत मन लगे अमता शरीर ना रहूआय जसन मोर लगे आचे।"ए दखायबा काचे कि हाय कोनी भुत नुआय, तो हाय खायबा काचे काई मांगू आय। हाय मन हाके माचर गोंदा देउआत, आउरी हाय हाके खाऊआय।

यीशु बोलुआय, "मोर बारे ने मापरुर वचन जोन टा बले बोलुआय हाय होयसी। मुई तोमके सांगीरी कि एतार होयबा टा जरुरी आय।"तबे यीशु हाय मनके मापरुर वचन के अच्छा ले समझाऊ आय। हाय बोलुआय, "खुबे पोयले भविष्यवक्ता मन लिखी रेलाय कि मुई मसीह के दुःख उठाय के पड़सी, मोरके पड़सी आउरी पाचे तीसरा दिन ने मोरला थानले जी उठ के पड़सी।"

"हाय भविष्य वक्ता मन ए बले लीखी रेलाय कि मोर चेला मन मापरुर वचनर घोषणा करबाय। हाय मन सबु के पश्चाताप करबा काचे सांगबाय। यदी हाय मन अमता करबाय तो मापरु तिकर पाप के छमा करसी। मोर चेला मन ए समाचार के प्रचार करबा टा यरूशलेम ले शुरु करबाय। तेबे हाय मन सबु जागा सबु जाती मन थाने जिबाय। तोमी लोग मन सबु बात आउरी कामर गवाह आस जोन टा के मुई करी रेली, आउरी हाय सबुर बले जोन टा मोर संगे होयला।"

अगला चालीस दिनर पाचे, यीशु खुदर चेला मनके कई बार दखा देउआय। गोटक हार तो हाय गोटकी बेरा ने 500 ले खुबे झन के दखा देउआय! हाय खुदर चेला मनके कई तरीका ले साबित करूआय कि हाय जिन्दा आचे, आउरी हाय तीके मापरुर बारे ने शिक्षा देउआय।

यीशु खुदर चेला मनके बोलुआय, "मापरु मोके सरग आउरी पृथ्वीर सबु लोग उपरे शासन करबार अधिकार देला आचे। एकाचे अबर मुई तोमके बोलबी आची कि : जाईकरी सबु जातीर लोग मनके चेला बना। अमता करबा काचे, तोमके हाय मनके बुआ, बेटा आउरी पवित्र आत्मार नाम ले बपतिस्मा देयके पड़सी। जोन बले मुई तोमके आज्ञा देबी आची हाय सबु गोट मनके मानाबाटा बले तोमके हाय मन के सिखाय के पड़सी। सुरता सोंगा, मुई सबु दाय तोमर संगे रेबी।"

यीशु मोरला थानले जी उठलार चालीस दिनर पाचे, हाय खुदर चेला मनके बोलुआय, "जेबले मोर बुआ तोमके सामर्थ ना दे तेबे तक यरुशलेम ने ठेबी रा। हाय तोमर उपरे पवित्र आत्मा के पटायबार द्वारा असन करसी।"तेबे यीशु सरग ने चले जाऊआय, आउरी गोटक बादरी हाके तिकर दखबा थानले लुकाय देउआय। सरग ने यीशु सबु चिज उपरे शासन करबा काचे मापरुर बुजनी हाथ बाटे बोसूआय।