41. मापरु यीशु के मोर ला थानले जीयाउ आय

सैनिक मन द्वारा यीशु के क्रूश ने चेगाय लार पाचे, यहूदी अगुआ मन पिलातुस के बोलुआत, "हाय झुटा, यीशु बोली रेला कि हाय तिन दिनर पाचे मोरला थानले जी उठसी। काकी बले ए निश्चित करबा काचे कबरर निगरानी करके पड़सी कि हातार चेला मन हातार शरीर के चोरी करी ना नेओत। अगर हाय मन अमता करबाय तो हाय मन बोलबाय कि हाय मोरला थानले जी उठला आचे।"

पिलातुस बोलुआय, "खिनिक मा सैनिक मन के निया आउरी जसन तोमी करके सकास अमति कबरर निगरानी करा।"एकाचे हाय में कबरर ओलाबा बीती दुआरर पोकना थाने गोटक मोहर के लगाय देउआत। हाय मन ए निश्चित करबा काचे हाय थाने सैनिक मन के बोसाय बले देउआत कि कोनी बले हातार शरीर के ना चोरके सकोत।

यीशुर मोरबा दिन सब्तर दिन रहूआय। कोनी बले सब्तर दिन ने काम करके ना सकते रहूआत, एकाचे यीशु र मित्र मन थानले कोनी बले कबर ने ना आयी रहूआत। मांतरसब्तर पाचेर दिने, सकारपार, खिनिक मा बायले मन यीशुर कबर ने जीबा काचे तिआर होउआत। हाय मन हातार शरीर ने आउरी बले मसाला मनके लागाय बार चाहते रहूआत।

हाय बायले मनर खेटबार पयले, कबर ने गोटक बड़े भुकंप होऊआय। सरग ले गोटक सरग दूत आई करी हाय पोकन के लुड़काय देउआय जोन कबरर ओल्बा बीती दुआर के ढाकी रहूआय आउरी हाय हाय थाने बोसू आय। ए सरग दूत उजर जसन चमक ते रहुआय कबर थाने जोन सैनिक मन रहुआत हाय मन हाके दखुआत। हाय मन अतक डरी जाऊआत कि मोरला लोग जसन माटी थाने घसरी जाऊआत।

जेबे हाय बायले मन कबर थाने खेटूआत तो हाय सरग दूत हाय मनके बोलुआय, "ना डरा। यीशु ए थाने नीआय। हाय मोरला थानले जी उठला आचे, जसन कि हाय बोली रेला कि हाय जी उठ्सी! कबर ने डगरा आउरी दखा।"हाय बायले मन कबरर भीतरे आउरी जोन थाने यीशुर शरीर के सोंगाय रहूआत हाय थाने डगराऊ आत आउरी दखुआत कि हातार शरीर हाय थाने ना रहूआय!

तेबे सरग दूत हाय बायले मनके बोलुआय, "जाई करी चेला मनके सांगा, ’यीशु मोरला थानले जी उठला आचे आउरी हाय तोमर छोमे – छोमे गलील ने जायसी।"’

हाय बायले मन अचंभित होऊआत आउरी खुबे हरिक होऊआत। हाय मन चेला मनके ए शुभ संदेस के सुनाय बा काचे पोराउआत।

जेबे हाय बायले मन चेला मन के ए शुभ संदेस के सांगबा काचे बाटे रहूआत, तो यीशु हाय मनके दखा देउआय। हाय मन हातार गोड थाने घसरु आत। तेबे यीशु बोलुआय, "ना डरा। जाई करी चेला मनके गलील ने जीबा काचे बोला। हाय मन मोके हाय थाने दखबाय।