46. पौलुस मसीही विश्वासी बनुआय

शाऊल नामर गोटक माने रहूआय जोन यीशु उपरे विश्वास ना करी रहूआय। जेबे हाय जुआन रहूआय, तेबे हाय स्तिफनुस के मारबा लोगर फोटीर निगरानी करी रहूआय। पाचे, हाय विश्वासी मनके सताय रहूआय। हाय यरूशलेम ने घरे – घरे जाईकरी माने आउरी बायले दुनो के गिरफ्तार करी जेलखाना ने डाली देई रहूआय। तेबे महायाजक शाऊल के दमिश्क नगर ने जीबा काचे अनुमति देउआय। हाय मन हायतीर मसीह मनके गिरफ्तार करबा काचे आउरी हाय मनके लेवटाय करी यरूशलेम ने आनबा काचे शाऊल के बोलुआत।

अतः शाऊल दमिश्क ने जीबार यात्रा के शुरु करूआय। हाय नगर ने खेटबार खिनिक पयले, हातार चारो बाटे बादरी ले उजर चमकू आय, आउरी हाय माटी थाने घसरी जाऊआय। शाऊल काके आले बोलबा दाय सुनुआय, "हे शाऊल! हे शाऊल! तुई मोके काय काचे सताय बी आस?" शाऊल पचारू आय, "हे परबु तुई कोन आस?" यीशु जवाब देउआय, "मुई यीशु आंय। तुई मोके सतायबी आस!"

जेबे शाऊल उठू आय तो हाय दखके ना सकते रहूआय। हातार मित मन हाके दमिश्क ने धरी करी नेई रहूआत। शाऊल तीन दिन तक काई बले खाई पी ना रहूआय।

दमिश्क ने हनन्याह नामर गोटक चेला रहूआय। मापरु हाके बोलुआय, "हाय घरे जा जोन थाने शाऊल ठेबला आचे। खुदर हाथ के हातार उपरे सोंगाव ताकि हाय फिर ले दखो।"मांतरहनन्याह बोलुआय, "हे परबु, मुई सुनली आची कि ए माने विश्वासी मनके कसन सतायला आचे।" मापरु हाके जवाब देउआय, "जा! मुई हाके यहूदी मन थाने आउरी दूसरा जातिर लोग मन थाने मोर नामर घोषणा करबा काचे चुनली आची। हाय मोर नाम काचे खुबे दुःख सहसी।"

अतः हनन्याह शाऊल लगे जाऊआय, खुदर हाथ के तार उपरे सोंगाऊ आय, आउरी बोलुआय, "यीशु, जोन एती आयबा थाने तोर बाट ने तोर उपरे प्रगट होई रेला, मोके तोर लगे पटायला आचे कि तुई फिर ले दखके मुराव, आउरी पवित्र आत्मा तोके भरी दो।" हड़कीच दाय शाऊल दखके सकूआय, आउरी हनन्याह हाके बपतिस्मा देउआय। तेबे शाऊल भात खाऊआय आउरी फिर ले ताकतवर होई जाऊआय।

तेबेले, शाऊल दमिश्क ने रेबा यहूदी मन थाने ए प्रचार करबा टा शुरु करी देउआय। हाय बोलुआय, "यीशु ही मापरुर बेटा आय!" यहूदी लोग मन अचंभित रहूआत, कायकाचे कि शाऊल विश्वासी मन के मारी देबार कोशिस करी रहूआय, मांतरहाय यीशु उपरे विश्वास करी रहूआय। शाऊल यहूदी मन संगे वाद – विवाद करूआय। हाय दखाउ आय कि यीशु ही मसीह रेला।

खुबे दिनर पाचे, यहूदी मन शाऊल के मारी देबार योजना बानाउ आत। हाय मन हाके मारबा काचे नगरर कोपाट ने लोग मनके पटाउआत। कि हातार निगरानी करोत मांतरशाऊल हाय योजनार बारे ने सुनुआय, आउरी हातार संगवारी मन बाची करी निकलबा ने हातार सहायता करूआत। गोटक राती हाय मन हाके टुकना ने बोसाय करी नगरर काति ले हाके तले उतारी देउआत। दमिश्क ले बाची करी निकललार पाचे शाऊल यीशुर बारे ने प्रचार करबा टा जारी सोंगाउ आय।

शाऊल प्रेरित मनके मिलबा काचे यरूशलेम जाऊआय, मांतरहाय मन हाके डरते रहूआत। तेबे बरनबास नामर गोटक विश्वासी शाऊल के प्रेरित मन लगे आनुआय। हाय तीके सांगूआय कि शाऊल कसन साहसी होईकरी दमिश्क ने प्रचार करी रेला। हातार पाचे, प्रेरित मन शाऊल उपरे विश्वास करूआत।

खिनिक मा विश्वासी मन जोन मन यरूशलेमर सताव ले पोराय रहूआत हाय मन अंताकिया नगर ने जाई रहूआत आउरी यीशुर बारे ने प्रचार करते रहूआत। अंताकिया ने रेबा लोग मन खुबे यहूदी ना रहूआत, मांतरपोयला हार, हाय थानले खुबे लोग मन विश्वासी बनी जाऊआत। बरनबास आउरी शाऊल ए नुआ विश्वासी मनके यीशुर बारे ने आउरी खुबे सीखायबा काचे हाय थाने जाऊआत आउरी कलीसिया के मजबूत करूआत। यीशु उपरे विश्वास करबा लोग मन पोयला हार अंताकिया ने "मसीही" बोलाय होयलाय।

गोटक दिने, अंताकिया ने मसीही लोग मन उपवासर संगे पारतना करते रेलाय। पवित्र आत्मा तीके बोलुआय,"बरनबास आउरी शाऊल के हाय काम के करबा काचे अलग करी दियास जाके करबा काचे मुई हाय मनके हाग देली आची।"एकाचे अंताकियार कलिस्या बरनबास आउरी शाऊल काचे पारतना करूआत आउरी तिकर उपरे खुदर हाथ मनके सोंगाउआत। तेबे हाय मन तीके आउरी दूसरा जागा ने यीशुर बारे ने शुभ संदेसर प्रचार करबा काचे पोटाय देउआत। बरनबास आउरी शाऊल अलग – अलग जातीर लोग मनके शिक्षा देउआत, आउरी खुबे लोग मन यीशुर उपरे विश्वास करूआत।