47. फिलिप्पी ने पौलुस आउरी सीलास

जेबे शाऊल सबु रोमी साम्राज्य ने यात्रा करूआय तो हाय खुदर रोमी नाम "पौलुस" अर उपयोग करबा टा शुरू करी देउआय। गोटक दिने, पौलुस आउरी हातार संगवारी सीलास फिलिप्पी नगर ने यीशुर बारे ने शुभ संदेस सुनायबा काचे जाऊआत। हाय मन नगरर बाहरे नदीर रेटे गोटक जागा ने जाऊआत जोन थाने लोग मन पारतना करबा काचे रुंडा होई रहूआत। हाय मन हाय थाने लुदिया नामर गोटक बायले ले मिलु आत जोन गोटक व्यापारी रहूआय। हाय मापरु ले मया करते रहूआय आउरी हातार आराधना करते रहूआय।

मापरु लुदिया के यीशुर बारे ने सन्देश थाने विश्वास करबा काचे सक्षम करूआय। पौलुस आउरी सीलास हाके आउरी हातार परिवार के बपतिस्मा देउआत। हाय पौलुस आउरी सीलास के खुदर घरे ठेबबा काचे हाग देउआय, एकाचे हाय मन हाय थाने ठेबु आत।

पौलुस आउरी सीलास लोग मनके अक्सर हाय जागा ने मिलते रहूआत जोन थाने यहूदी लोग मन पारतना करबा राय। रोजे दिना जेबे हाय मन हाय थाने जायते रेलाय तो गोटक दासी टोकी जोन दुष्ट आत्मा द्वारा नियंत्रित रहूआय। हाय मनर पीछा करबा राय। ए दुष्ट आत्मार जरिया ले हाय लोग मनके भविष्य सांगबा राय, एकाचे हाय भविष्य सांगबा बीतीर रुप ने खुदर मालिक काचे खुबे धन कमायते रेला।

तिकर जीबा दाय ए दासी टोकी किरकिरबा राय, "ए माने मन परम प्रधान मापरुर सेवक मन आत। ए मन तोमके उद्धार पायबार बाट सांगबा आत!" हाय सबु दिना अमति करते रेला जार लागी पौलुस नाराज होई जाऊआय।

आखरी ने, गोटक दिने जेबे हाय दासी लड़की चिचाय के मुराउ आय, तो पौलुस हातार बाटे पलटी करी हातार भीतरर दुष्ट आत्मा के बोलुआय, "यीशुर नाम ले एथार थानले निकली जा।"हड़कीच दाय हाय दुष्ट आत्मा हाके छाड़ी देउआय।

हाय दासी टोकीर स्वामी मन खुबे रिसा होई जाऊआत। हाय मन जानी जाऊआत कि बिना दुष्ट आत्मार हाय टोकी लोग मनर भविष्य के सांगके ना सके। एतार मतलब रेला कि लोग मन अबर हातार स्वामी मनके पोयसा ना देत कि हाय हाय मनके भविष्य सांगसी कि तिकर संगे काय होयसी।

एकाचे हाय दासी टोकीर स्वामी मन पौलुस आउरी सीलास के रोमी अधिकारी लगे नेउआत। हाय मन पौलुस आउरी सीलास के पेटू आत, पाचे हाय मनके जेल ने डाली देउआत।

हाय मन पौलुस आउरी सीलास के जेलर गोटक जगा ने सोंगाउआत जोन थाने खुबे सिपाही रहूआत। एथानले बले हाय मन तिकर गोड़ मनके गचर बड़े गोंदा थाने जोड़ी देउआत। मांतरपौलुस आउरी सीलास मोजी रातीर बेरा, मापरुर स्तुतिर गीत गायते रहूआत।

अचानक ले, गोटक भयानक भूकम्प होऊआय! जेलर सबू दुआर खुली जाऊआय, आउरी सबू कैदी मनर जंजीर मन खुली करी घसरी जाउआय।

तेबे दरोगा चेतु आय। हाय दखुआय कि जेलर सबू दुआर मन खुली गला आचे। हाय सोचु आय कि सबू कैदी मन बाची करी पोरायलाय। हाय डरी जाई रहूआय कि हाय मनर पोराय लार लागी करी रोमी अधिकारी मन हाके मारी देबाय, एकाचे हाय खुद के मारी देबा काचे तियार होउआय! मांतरपौलुस हाके दखी करी चिचाऊ आय, "ठेब! खुद के नुकसान ना पहुँचाव। हामी सबू इथाने आचू।"

हाय दरोगा थर थरते पौलुस आउरी सीलास लगे आयिकरी पचारू आय,"उद्धार पाय्बा काचे मुई काय करबी? "पौलुस जवाब देउआय, "परबु यीशु उपरे विश्वास कर तो तुई आउरी तोर घराना उद्धार पायसी।"हाय दरोगा पौलुस आउरी सीलास के खुदर घरे नेउआय आउरी तिकर घाव मनके धोऊआय। पौलुस तिकर घरर सबू लोग के यीशुर बारे ने शुभ सन्देश के सुनाऊ आय।

दरोगा आउरी हातार परिवार यीशु उपरे विश्वास करूआत, एकाचे पौलुस आउरी सीलास हाय मनके बपतिस्मा देउआत। तेबे दरोगा पौलुस आउरी सीलास के भात खुआउ आय, आउरी हाय मन गोटक संगे हरिक होउआत।

दूसरा दिने नगरर अगुआ मन पौलुस आउरी सीलास के जेल ले आजाद करी देउआत आउरी फिलिप्पी ले जिबा काचे बोलुआत। पौलुस आउरी सीलास लुदिया आउरी खिनिक दूसरा संगवारी मन सगे मिलुआत आउरी हातार पाचे नगर ले निकली जाउआत। यीशुर बारे ने सन्देश फैलते गला, आउरी कलीसिया बाड़ते गला।

पौलुस आउरी दूसरा मसीही अगुआ मन खुबे नगरर यात्रा करूआत। हाय मन लोग मनके यीशुर बारे ने शुभ सन्देश सुनाऊआत। हाय मन कलीसियार विश्वासी मनके उत्साहित करबा ने आउरी हाय मनके शिक्षा देबा काचे खुबे पत्र लिखुआत। एथानले खिनिक मा पत्र बाइबलर पुस्तक बनी गलाय।