48. यीशु ही प्रतिज्ञा करला बीती मसीह आय

जेबे मापरु संसार के बनायला तो सबू अच्छा रेला। कोनि पाप ना रेला। आदम आउरी हव्वा गोटक दूसरा संगे माया करते रेलाय, आउरी हाय मन मापरु संगे बले माया करते रेलाय। कोनी बीमारी या मोरबाटा ना रेला। मापरु अमती संसार के मोन करते रेला।

शैतान सांपर जरिया ले बगीचा ने हव्वा ले गोटाउआय, काय काचे कि हाय हाके धोका देबार चाहते रेला। तेबे हव्वा आउरी आदम मापरुर विरुद्ध ने पाप करूआत। काय काचे कि हाय मन पाप करी रेलाय एकाचे पृथ्वीर सबू लोग मन मोरु आत।

काय काचे कि आदम आउरी हव्वा पाप करी रेउआत, एकाचे खिनिक आउरी बले बुरा होउआय। हाय मन मापरुर दुसमन बनी गलाय। जार लागी, तेबले सबू लोग मन पाप करला आत। सबू लोग मन जनमला दायले मापरुर दुश्मन आत। मापरु आउरी लोग मनर मजीगता शांति ना रेला। मांतर मापरु शांति स्थापित करबार चाहते रेला।

मापरु प्रतिज्ञा करुआय कि हव्वा र गोटक वंसज शैतान र मुंडी के कुचलसी। हाय इ बोले बोलुआय कि शैतान हातर लेढ़ी के डससी। दूसरा सब्द ने शैतान मसीह के मारसी, मांतर मापरु हाके फिर ले जिंदा करी देयसी। एतार पाचे, मसीह शैतान र शक्ति के सबू हार काचे सराय देयसी। खुबे बोरस र पाचे, मापरू दखायला कि हाय मसीह यीशु आय।

मापरू हाय बाड़ ले खुदर परिवार के बाचाऊ आय जाके हाय आनबा काचे रहूआय। नूह ले गोटक नाव बनायबा काचे बोलुआय कि हाय ऐ प्रकार ले मापरु हाय लोग मनके बाचयला जोन मन हातार उपरे विश्वास करते रेलाय। ऐ प्रकार ले, हाय मन सबू मापरु द्वारा मारी देबार योग्य रहूआत काय काचे कि हाय मन पाप करी रहूआत। मांतर मापरु हाय मनके बाचय बा काचे यीशु के पोटाऊ आय जोन मन हातार उपरे विश्वास करू आत।

सैकड़ो बोरस ले, याजक मन मापरु काचे बलिदान चेगाय ते रेलाय। एटा दखायते रेला कि लोग मन पाप करी रेलाय, आउरी एटा कि हाय मन मापरुर द्वारा मारी देबार योग्य रेलाय। मांतर हाय बलिदान तिकर पाप मनर क्षमा ना करके सकि रहूआत। यीशु सबू ले बड़े याजक आय। हाय हायटा करूआय जोन टा कोनी याजक करके ना सकते रहूआत। हाय हाय गोटक बलिदान होयबा काचे खुद के दि देउआय जोन सबूर पाप के मिटाय के सकते रेला। हाय स्वीकार करूआय कि मापरु हाय सबु लोग मन काचे हाके दण्डित करो। ऐ कारण ले, यीशु सिद्ध महायाजक रहूआय।

मापरु अब्राहम के बोलुआय, "मुई तोर द्वारा संसारर सबू कुल मनके आशीष देबी।"यीशु इ अब्राहम र वंशज रहूआय। मापरु अब्राहमर जरिया ले सबू कुल के आशीष देउआय, काय काचे कि जोन मन यीशु उपरे विश्वास करूआत मापरु हाय सबू के पाप ले बाचाऊ आय। जेबे ऐ लोग मन यीशु उपरे विश्वास करूआत, तो मापरु हाय मनके अब्राहमर वंशज मानुआय।

मापरु अब्राहम के बोलुआय कि खुदर सगा बेटा के, हातार काचे बलिदान करी दो। मांतर पाचे मापरु इसहाकर पालटा ने बलिदान करबा काचे गोटक मेमना देउआय। हामी सबू खुदर पाप मन काचे मारी देबार योग्य रेलू! मांतर मापरु हामर जागा ने मोरबा काचे यीशु के बलिदानर रूप ने देला। ऐ कारण ले हामी यीशु के मापरुर मेमना बोलुआव।

जेबे मापरु मिस्र ने आखरी विपत्ति के पोटाउ आय तो हाय सबू इसरायली परिवार के बोलुआय कि हाय मन गोटक मेमनार बलि करोत। हाय मेमना ने कोनी दोष ना रेबार चाहिए। तेबे खुदर चोखटर उपरे आउरी रेटे हाय मनके हातार लहू के लगाय बार रहूआय। जेबे मापरु हाय बलिदान के दखु आय तो हाय तिकर घर मनले आगे बड़ी जाऊआय आउरी तिकर पहिलोठा बेटा मनके ना मारूआय। जेबे एटा होऊआय तो मापरु एके फसहर परब बोलला।

यीशु फसहर परबर मेमना जसन आय। हाय केबी बले पाप ना करूआय, एकाचे हातार थाने काई बले गलत ना रहूआय। हाय फसहर परबर बेर मोरुआय। जेबे कोनी यीशु उपरे विश्वास करूआत, तेबे यीशुर लहू हाय मानेर पापर किमत के चुकाऊ आय। एटा असन आय जसन कि मापरु हाय मानेर लगले आगे बड़ी गला, काय काचे कि हाय हाके दण्ड ना देयते रहूआय।

मापरु इसरायली लोग मन संगे गोटक वाचा बांधला, काय काचे कि हाय असन लोग मन रहूआत जोन मनके मापरु खुदर होयबा काचे चुनी रहूआय। मांतर अबर मापरु गोटक अमता वाचा बांधू आय जोन कि सबू काचे आय। अगर कोनी बले जातिर कोनी बले माने ऐ नुआ वाचा के स्वीकार करूआय, तो हाय मापरु लोग मन थाने शामिल होई जाउआय। हाय अमता एकाचे करूआय काय काचे कि हाय यीशु उपरे विश्वास करूआय।

मूसा गोटक भविष्यवक्ता रहूआय जोन मापरुर वचन के बड़े सामर्थ ले प्रचार करी रहूआय। मांतर यीशु अबर सबू भविष्यवक्ता मनले सबू ले बड़े आय। हाय मापरु आय, एकाचे जोन टा बले हाय करला आउरी बोलला हाय टा मापरुर काम आउरी वचन रेला। एकाचे पवित्र -शास्त्र यीशु के मापरुर वचन बोलू आय।

मापरु राजा दाऊद ले प्रतिज्ञा करी रहूआय कि राजार रूप ने हातार गोटक वंशज मापरुर लोग मन उपरे सदा काचे शासन करसी। यीशु मापरुर बेटा आउरी मसीह आय, एकाचे हाय राजा दाऊदर वंशज आय जोन सदा काचे राज्य करके सके।

दाऊद तो इस्राएलर राजा रहूआय, यीशु सबू जगतर राजा आय! हाय फिर ले आयसी आउरी सदा काचे न्याय आउरी शांति संगे खुदर राज्य ने शासन करसी।