49. मापरुर नुआ वाचा

गोटक सरगदूत जूआन बायले मरीयम ले बोलुआय कि हाय मापरुर बेटा के जनम देयसी। हाय ऐबे कुआरी रहूआय, मांतर पवित्र आत्मा हातार लगे आउआय आउरी आय पेटे हारनी होऊआय। हाय गोटक बेटा के जनम देउआय जार नाम हाय यीशु सोंगाउ आय। एकाचे, यीशु मापरु आउरी माने दुनो आय।

यीशु खुबे जादू करूआय जोन टा दखाऊआय कि हाय मापरु आय। हाय पानी ने हिंडूला आउरी आंधी के शांत करला। हाय खुबे बीमार लोग मनके चंगा करला आउरी खुबे लोग मन थानले दुष्टआत्मा मनके निकलायला। हाय मोरला लोग मनके जिन्दा करी देला, आउरी हाय पांच रोटी आउरी दुई मछली ले 5,000 लोग मनके खुआयबा काचे भरपुर भोजन ने बदली देला।

यीशु गोटक महान शिक्षक बले रहूआय। जोन टा बले हाय सीखायला, हाय हाके सिद्ध संगे सिखायला। जोन टा हाय लोग मनके करबा काचे बोलुआय हाय टा हाय मनके करबार चाहिए काय काचे कि हाय मापररु बेटा आय। उदाहरण कचे हाय सीखायला कि तोमके दूसरा लोग मन संगे हाई रीती ले मया करबार जरूरत आचे जसन तोमि खुद के करूआस।

हाय ऐ बले सीखायला कि तोमके सबू वस्तु ले खुबे आउरी खुदर सम्पति ले बले खुबे मापरु के मया करबा राय।

यीशु बोलला कि संसार ने काई बले चीज के पायबा ले खुबे अच्छा आय मापरुर राज्य ने होयबाटा। हातार राज्य ने तोमके ओल्बा काचे जरुरत आचे कि मापरु तोमके तोमर पाप ले बाचाओ।

यीशु बोलला कि खिनिक मा लोग मन हाके ग्रहण करबाय। मापरु हाय लोग मनके बाचायसी। मांतर दूसरा लोग मन हाके ग्रहण ना करबाय। हाय ऐ बले बोलला कि खिनिक मा लोग मन अच्छा माटी जसन आत, काय काचे कि हाय मन यीशुर बारे ने शुभ सन्देश के स्वीकार करूआत, आउरी मापरु हाय मनके बाचाऊ आय। मांतर खिनिक मा लोग मन बाटर कड़ा माटी जसन आत। मापरुर वचन बीज जसन बाट ने घसरू आय, मांतर हाय थाने काई बले ना अकरु आय। ऐ लोग मन यीशुर बारे ने सन्देश के अस्वीकार करी देउआत। हाय मन हातार राज्य ने ओल्बा काचे मना करी देउआत।

यीशु सीखायला कि मापरु पापी मनले मया करूआय। हाय हाय मनके क्षमा करबार चाहसि आचे आउरी तीके खुदर बेटा बनायबार चाहसी आचे।

यीशु ऐ बले सांगी रेला कि मापरु पाप ले नफरत करूआय। काय काचे कि आदम आउरी हव्वा पाप करूआत, एकाचे हातार सबू वंशज मन बले पाप करूआत। ऐ संसार ने रेबा सबू लोग मन पाप करूआत आउरी मापरु ले दूर आचेत। सबू लोग मन मापरुर दुसमन आत।

मांतर मापरु ऐ संसार ने रेबा बीती सबू माने संगे ऐ रीती ले मया करला : हाय खुदर गोटक बेटा के दि देला ताकि मापरु हाय मनके दण्ड ना दे जोन मन हातार उपरे विश्वास करूआत।

तोमि मोरबार योग्य आस कायकाचे कि तोमि पाप करला आस। तोम के मापरुर रिसा होयबाटा उचित आय, एतार अपेक्षा, हाय यीशु उपरे रिसा होयला। हाय यीशु के क्रूसर मृत्यु दि करी दण्ड देला।

यीशु केबे बले पाप ना करला, मांतर हाय मापरु के हाके दण्ड देयके देउआय। हाय मोरी जिबा टा स्वीकार करूआय। ऐ रीती ले, तोमर पाप के आउरी संसार ने रेबा लोगर सबूर पाप के उठाय नेबा काचे हाय गोटक सिद्ध बलिदान रहूआय। यीशु खुद के मापरु काचे बलिदान करी देउआय, एकाचे मापरु कोनी बले पाप के, एथानले बले कि भयंकर पाप मनके बले क्षमा करूआय।

भले ही तोमि अच्छा ले अच्छा काम करूआस, तो एतार द्वारा मापरु तोमके ना बाचाये। हातार संगवारी बनबा काचे अमता कायी बले निआय जोन टा के तोमि करके सकास। एतार अपेक्षा तोमके विश्वास करबा राय कि यीशु ही मापरुर बेटा आय, आउरी हाय तोमर बदला ने क्रूश ने मोरी गला, आउरी ऐ बेले कि मापरु हाके फिर ले जिन्दा करी देला। अगर तोमि एथाने विश्वास करबास, तो मापरु तोमर पापर क्षमा देयसी।

मापरू हाय सबू लोग के बाचायसी जोन यीशु उपरे विस्वास करुआत आउरी हाके खुदर परबू स्वीकार करुआत। मांतर हाय तीके ना बाचाये जोन हातार उपरे विस्वास ना करुआत। एटा कोनी मायने ना सोंगाऊ आय कि तोमि धनी आस या गारीब आस, माने हो या बायले, डोकरा हो या जुआन हो, या तोमि कोनती रेऊआस। मापरु तोमके मया करुआय आउरी चाहुआय कि तोमि यीशु उपरे विस्वास करा।

यीशु तोमके हाग देयसी आचे कि हातार उपरे विश्वास करा आउरी बपतिस्मा धरा। काय तोमि विश्वास करूआस कि मापरुर गोटक बेटा, यीशु मसीह आय? काय तोमि विश्वास करूआस कि तोमि गोटक पापी आस आउरी एटा बले कि तोमि मापरु द्वारा दण्डित किया जिबार योग्य आस? काय तोमि विश्वास करूआस कि तोमर पाप के मिटायबा काचे यीशु क्रूश ने मोरला?

अगर तोमि यीशु उपरे जोन हाय तोमर काचे करला आचे हातार उपरे विश्वास करूआस, तो तोमि गोटक मसीह आस! शैतान खुदर अंधकारर राज्य ने अबर तोमर उपरे शासन ना करूआय। अबर मापरु खुदर प्रकाशर राज्य ने तोमर उपरे शासन करूआय। हाय तोमके पाप करबा ले रोकी देला आचे जाके तोमि करते रेलास। हाय तोमके गोटक नुआ उचित जीवन देला आचे।

अगर तोमि गोटक मसीह आस तो जोन यीशु करला आचे हातार कारण मापरु तोमर पाप के क्षमा करी देला आचे। अब मापरु गोटक दुसमनर अपेक्षा तोमके गोटक अच्छा संगवारी मानु आय।

अगर तोमि मापरुर संगवारी आस आउरी परबु यीशुर सेवक आस तो तोमि हाय बाट मनर पालन करबार इच्छा करबास जोन टा यीशु तोमके सिखाऊ आय। भले तोमि गोटक मसीह आस, शैतान ऐबे बले पाप करबा काचे तोमर परीक्षा करसी। मांतर मापरु सबू हार हाय करुआय जोन हाय बोलुआय कि हाय करसी। हाय बोलसी आचे कि अगर तोमि खुदर पाप के मान बास, तो हाय तोमके क्षमा करी देयसी। हाय तोमके पापर विरुद्ध ने लड़बा काचे ताकत देयसी।

मापरु तोमके पारतना करबा ने आउरी हातार वचन के पड़बा काचे बोलसी आचे। हाय तोमके दूसरा विश्वासी मनर संगे मिली करी हातार आराधना करबा काचे बले बोलसी आचे। तोमके दूसरा लोग मनके बले सांगबा काचे कि हाय तोमर काचे काय करला आचे। अगर तोमि ऐ सबू काम के करबास, तो तोमि हातार गोटक अच्छा संगवारी बनी जिबास।