50. यीशु वापिस लेवटू आय

लगभग 2,000 बरस ले, संसार ने सब जागा ने खुबे ले खुबे लोग मन मसीह यीशुर बारे ने शुभ सन्देश के सुनबाआत। कलीसिया उन्नति करसी आचे। यीशु वादा करला आचे कि हाय संसारर आखरी ने वापिस लेवटसी। ऐबे हाय वापिस ना आयला आचे, तेबेले बले हाय खुदर वादा के पूरा करसी।

जेबे हामी यीशुर वापिस लेवटबा टा के टाकबू आचू, मापरु हामर ले ऐ रीती ले जीवन के जि बा काचे इच्छा करसी आचे जोन पवित्र आय आउरी जोन हातार आदर करूआय। जेबे यीशु पृथ्वी ने रेयते रेला तेबे हाय बोलला, "मोर चेला मन संसार भर ने सबू जागार लोग मनके मापरुर राज्यर बारे ने शुभ सन्देशर प्रचार करबाय, आउरी अन्त आई जायसी।"

खुबे जाति मन एबले बले यीशुर बारे ने ना सुनला आत। सरग ने लेवट बार पयले, यीशु मसीही मनके हाय लोग मनके शुभ सन्देश सुनायबा काचे बोलला जोन मन एके केबी ना सुनला आचेत। हाय बोलला,"जा आउरी सबू जातिर लोग मनके चेला बना। "आउरी"काटबा काचे बेड़ा पाकला आचे!"

यीशु ऐ बले बोलला, "कोनी मानेर सेवक खुदर स्वामी ले बड़े ना होऊआय। ऐ संसारर जरुरी लोग मन मोके नफरत करला य, आउरी मोर कारण हाय मन तोमके सतायबाय आउरी मारी देबाय। ऐ संसार ने तोमि पीड़ित होयबास, मांतर मजबूत बना, काय काचे कि मुई शैतान के हाराय देली आची जोन ऐ संसार ने शासन करूआय। अगर तोमि आखरी तक मोर विश्वास योग्य बनी रेबास, तो मापरु तोमके बाचायसी!"

यीशु खुदर चेला मनके यह समझायबा काचे गोटक काहनी सुनायला कि जेबे संसारर अन्त होऊआय तो लोग मन संगे काय होयसी। हाय बोलला, "कोनी खुदर बेड़ा ने अच्छा बीज बोयला। जेबे हाय सोयते रेला तो हातर सतरू आयला आउरी गेहूँर बिज मोनर मंजी गता झार बूटार बीज मनके बोई देला, आउरी पाचे हाय जायते गला।"

’जेबे बूटा मन अकरला य तो सेवक मन हाय माने के बोललाय, ’हे स्वामी, तुई तो तोर बेड़ा ने अच्छा बीज बोई रेलीस। तो फिर एताने झार बूटा काय काचे आचेत?’ हाय माने बोलला,’केवल मोर दुसमन मन हायटा के बोयबार मन करबाय। एटा मोर कोनी दुसमन आय जोन अमता करला आचे।”

’हाय सेवक मन खुदर स्वामी के जवाब देउआत कि, "काय हामी झार बूटा मनके झिकी करी पोकाय देबार चाहिय?’ हाय स्वामी बोलला, ’नाई। अगर तोमि असन करबास तो तोमि खिनिक गेंहू के बले झिकबास। काटबार बेरा तक टाका। तेबे झार बूटा मनके गोचा ने रुंडा करा ताकि तोमि हाय मनके पोड़ायके सकबास। मांतर गेंहूँ के मोर खत्ता ने धरी करी आना।"

चेला मन ए कहानीर मतलब के ना समझ लाय, एकाचे हाय मन यीशु के हाय मनके समझायबा काचे निवेदन करूआत। यीशु बोलला, "अच्छा बीज बोयबा बीती माने मसीहर जिकर करूआय। बेड़ा संसारर जिकर करूआय। अच्छा बीज मापरुर राज्यर लोग मनर जिकर करूआय।"

झार बूटा हाय दुष्ट लोग, शैतानर लोगर जिकर करूआय। हाय मानेर दुसमन शैतानर जिकर करूआय, जोन झार बूटा के बोई दी रेला। कटाई ए संसारर आखरी के जिकर करूआय, आउरी काटबा बिता मापरुर सरगदूत मनर जिकर करूआय।

जेबे संसारर आखरी होयसी तेबे सरगदूत मन सबू लोग मनके गोटक संगे रुंडा करबाय जोन मन शैतानर आत। हाय सरगदूत मन हाय मनके खुबे गरम बीती जोय ने पोकाय देबाय। हाय थाने हाय मन भयंकर सताव ने कान्दबाय आउरी खुदर दांत पिसबाय। मांतर जोन लोग मन धर्मी आत, जोन मन यीशु के अनुसरण करला आत, हाय मन हातार मापरु पितार राज्य ने बेर जसन बोरबाय।

यीशु ए बले बोलला की हाय संसारर आखरी होयबार पोयलेपृथ्वी ने लेवटसी। हाय हाई तरीका ले वापिस आयसी जसन हाय गला आचे। मतलब, हातार लगे वास्तविक शरीर होयसी, आउरी हाय बादरी ने चेगी करी आयसी। जेबे यीशु लेवटसी, तो सबू मसीह लोग मन जोन मन मोरला आत मोरला थानले जी उठबाय आउरी हातार ले बादरी ने मिलबाय।

तेबे जोन मसीह मन एबे बले जिन्दा आचेत हाय मन बादरी ने उठाया जिबाय आउरी हाय दूसरा मसीह मन संगे शामिल होई जिबाय जोन मन मोरला थानले जी उठुआत। हाय सबू हाय थाने यीशु संगे होयबाय। हातार पाचे, यीशु खुदर लोग मन संगे रेबाय। जेबे हाय मन गोटक संगे रेबाय तो हाय मन लगे सबू हार काचे पूरा शांति होयसी।

यीशु हातार उपरे विश्वास करबा सबू लोग के गोटक मुकुट देबार प्रतिज्ञा करला आचे। हाय मन सबु हार काचे मापरुर संगे सबु चीज ने शासन करबाय। तिकर लगे सिद्ध शांति होयसी।

मांतर मापरु हाय सबुर न्याय करसी जोन मन यीशु उपरे विश्वास ना करूआत। हाय तीके नरक ने डाली देयसी। हाय हाय थाने कान्दबाय आउरी खुदर दांत पिसबाय, आउरी हाय मन हमेशा पीड़ित होयते रेबाय। केबे बले ना लिबबा बीती जोय हाय मनके लगातार पोड़ायते रेयसी, आउरी कीड़ा मन तीके खायबाने केबे बले ना ठेब बाय।

जेबे यीशु लेवटसी, तो हाय पूरा रीती ले शैतान के आउरी हातार राज्य के नास करी देयसी। हाय शैतान के नरक ने डाली देयसी। हाय थाने शैतान सबू हार काचे पोड़ते रेयसी, हाय सबु लोग मन संगे जोन मन मापरुर गोट मनके मानबार पालटा शैतानर पीटी बाटे हिंडबार चुनाव करी रेलाय।

कायकाचे की आदम आउरी हव्वा मापरुर आज्ञा के ना मानी रेलाय आउरी पाप के ए संसार ने धरी करी आई रेलाय, मापरु हाय मनके श्राप देला आउरी हाके नास करबार निर्णय करला। मांतर कोनी दिना बले मापरु गोटक नुआ सरग आउरी पृथ्वी के बनायसी जोन सिद्ध होयसी।

यीशु आउरी हातार लोग मन हाय नुआ पृथ्वी ने रेबाय, आउरी हाय साबू हार काचे सबु चीज थाने शासन करसी। हाय लोग मनर आंखी थानले सबु आंसू के फुछि देयसी। अबर कोनी बाले पीड़ित आउरी दुखी ना होयबाय। हाय मन ना कान्दबाय। हाय मन बीमार ना होयबाय या ना मोरबाय। आउरी हाय थाने काई बले बुराई ना होयसी। यीशु खुदर राज्य ने न्यायपूर्वक, आउरी शांति संगे शासन करसी। हाय सबू दाय काचे खुदर लोग मन संगे रेयसी।