1. सृष्टि

एन्च़रे सेइं सारे ब्रह्मांडेरी शुरुआत भोई। परमेशरे शेई दिहाड़न मां इन ब्रह्मांड ते ज़ैन किछ अस मां आए तैसेरी रच़ना की। परमेशरेरे धरती बनानेरां बाद धरती आंधरे सेइं भेरतां ते बेरान थी, ते तैस मां किछ भी बनेवरू न थियूं। पन परमेशरेरी आत्मा पैनी पुड़ फिरती थी।

तैखन परमेशरे ज़ोवं, “लौ भोए!”, त लौ भौइ जेइ। परमेशरे लौ हेरी कि रोड़ी आए; ते परमेशरे लौई जो “दीस” ज़ोवं। परमेशरे लौ आंधरे करां अलग की, ते आंधरे जो परमेशरे “रात” ज़ोवं। परमेशरे रच़नेरे पेइले दिहाड़े लौअरी रच़ना की।

रच़नेरे दुइयोवं दिहाड़े, परमेशरे ज़ोवं पैनी पुड़ एरी दरमीयानी भोए ते अक दरमीयानी भोई जेई ते परमेश्वरे तैस दरमीयनी जो अम्बार ज़ोवं

ट्लेइयोवं दिहाड़े, परमेशरे ज़ोवं ते पानी शुनोरी ज़मीनी करां अलग कियूं। परमेशरे ज़मीनी जो “धरती” ज़ोवं; ते कने ज़ैन पानी अकोट्ठू भोवं तैस जो तैने “समुन्दर” ज़ोवं।

फिरी परमेशरे ज़ोवं, “ ज़मीनी पुड़ हर किसमेरे बुट ते पौदे लग्गन। “ते तेन्च़रे भोइ जेवं। परमेशरे हेरू कि ज़ै रच़ना तैने कियोरीए तै रोड़ी आए।

रच़ानरे च़ेवरोवं दिहाड़े, परमेशरे ज़ोवं ते दिहाड़ो, चाँदनी, ते तारे बनाए। परमेशरे ज़मीनी पुड़ लौ देनेरे लेइ दीसां ते रात, मौसम ते सालां केरि पिशानरे लेइ तैना बना

पंच़ोवं दिहाड़े, परमेशरे ज़ोवं ते पैनी मां तारी देने बाले ते सब च़ड़ोल्लू बनां। परमेशरे हेरू कि रोड़ू आए, ते तैन बरकत दित्ती।

रच़नेरेशेइयोवं दिहाड़े, परमेशरे ज़ोवं “हर किसमेरे ज़मीनरे जानवर भोइ गान!” ते इन ज़ेन्च़रे परमेशरे ज़ोवं तेन्च़रे भोवम। किछ ज़मीनी पुड़ पेटेरे भारे च़लनेबाले, किछ उडारे बाले, ते किछ जंगली जानवर थि। ते परमेशरे हेरू कि इन रोड़ू आए।

फिरी परमेशरे ज़ोवं। “अस मैन्हु अपने रूपेरो ज़ेरो अपनो ज़ेरो बनामेले। तैन कां धेरतरो ते सब जानवरां केरो अधिकार भोलो।”

फिरी परमेशरे किछ मित्ती नेही, ते तैस सेइं अक मैन्हु बनव, ते तैस मां ज़िन्दगरी साँस छ़ड्डी इस मैन्हेरू नवं आदम थियूं। परमेशरे आदमेरे रानेरे लेइ अक बाग बनाई, ते बागरी हेर गेश केरनेरे लेइ तै तैड़ी रख्खो।

बागरे मझ़ाटे मां, परमेशरे दुई खास बुट ज़िन्दगरो बुट ते भले ते बुरेरे ज्ञानेरो बुट लाव। परमेशरे आदमे सेइं ज़ोवं कि तै भले ते बुरेरे ज्ञानेरे बुटेरे फलेरे अलावा बागरे कोन्ची भी बुटे करां खेइ सकते। अगर तै इस बुटेरो फले खाए, त तै मेरि गालो।

फिरी परमेशरे ज़ोवं, “मड़देरू अकैल्लू रानू रोड़ू नईं।” पन जानवरन मरां कोई भी मड़देरो मद्दत केरनो बालो न थू बेनी सकतो थू।

एल्हेरेलेइ परमेशरे आदमे पुड़ भारी निड्ला छ़ड्डी। तैखन परमेशरे आदमेरे देलोड़लन मरां एक्की सेइं कौन्श बनाई ते तै आदमे कां आनी।

ज़ैखन आदमे तै लाई, तैने ज़ोवं, आखरी मां! ई मेरि ज़ेरि आए! तै मड़दे मरां बनाई जेइ एल्हेरेलेइ तै “कौन्श” नंव्वें सेइं ज़ानी जेइ।” ई वजा आए कि अक मड़द अपने अम्मा-बाजी शैरतां अपनि कौन्शी सेइं अक भोइ गाते।

परमेशरे अपने रूपे मां मड़द ते कौन्श बनाई। ते परमेशरे हेरू कि इन रोड़ू आए। तैने तैन बरकत दित्ती ते तैन सेइं ज़ोवं, “बड़े बच्चे ते पोट्लड़ां पैदा केरा ते धेरती मां भेरोईं गाथ!” इन सब किछ रच़नेरे छ़ेइयोवं दिहाड़े भोई जेवं।

ई बाइबलरी कहानी: उत्पति 1-2