18. राज़ बेन्टोनू

दाऊद राज़े 40.सालन तगर राज़ कियूं| ते फिरी तै मेरी जेव, ते तैसेरे मठ्ठे सुलैमाने इस्राएले पुड़ राज़ केरनू शुरू कियूं| परमेशरे सुलैमाने सिं गल की ते तैस पुछ़ू की तू सेभना ज़ैदां कुन चातस की परमेशर तैसेरे लेंईं तैन केरे| ते सुलैमाने परमेशरे करां इन मगु की तैस बड़ो बुद्धिमान बनाए| ते एैसां गलां परमेशर खुश कियो, ते एल्हेरेलेंईं परमेशरे सुलैमान संसरेरो सेभना बुद्धिमान मैनू बनाव| सुलैमाने बेड़ी गलां शिखी ते तै अक बुद्धिमान राज़ो थियो| परमेशरे तै बड़ो धनवान भी बनेवरो थियो|

यरूशलेमे मां सुलैमाने तैन मांदिर बानावं ज़ैसेरे लेंई तैसेरे बाजे योजना थी ते हुनी लोक मिलापे बाले तेम्बेरे बजाए सुलैमानेरे बनेवरे मां दिरे मां परमेशरेरी आराधना केरते थिए, ते तैसेरेलेंईं बाली च़ाड़ते थिए| परमेशर एइतं मां दिरे मां मजूद रातो थियो, ते तैड़ी तै अपने लोकन सिं साथी रातो थियो|

पन सुलैमाने होरी देशं केरी कोंन्शन सिं प्यार कियो| तैनी बेड़ी कोंशन सिं, त लगभग 1,000 कोंन्शन सिं ड्ला बनेइतं परमेशरेरे हुक्म ट्लोड़े| ऐन्न मरां बेड़ी कोंन्शं होरी देशेरी एवरी थी ते तैनेंईं अपने-अपने देबते भी आनोरे थिए ते तैनकेरी भागती केरनी जारी रख्खी| ते ज़ैखन सुलैमान बुढो भोई जेव त तैनी भी तैनकेरे देबतां केरी भागती की|

ते ऐस वजाई सिं परमेशर सुलैमाने पुड़ सेरकोरो थियो| ते तैनी ज़ोवं की तै इस्राएल देशे दुई हिसन मां केरेतं दण्ड देलो| ते तै सुलैमानेरे मरनेरां बाद ऐन केरलो|

सुलेमानेरे मरनेरे बाद, रहबाम राज़ो बनो| ते इस्राएल देशेरे सारे लोक तैस अपनो राज़ो कुबूल करनेरे लेंईं इक्की जिगाई अकोठे भोए| तैनेंई रहबामे सिं शिकैइत की कि सुलैमाने तैन करां बड़ी सखत मेंहनत करेवारी थी ते बड़े किस्मं केरी धाड़त वसूल कियोरी थी| तैनेंई रहबामे सिं गुज़ारिश की तैन करां घट कम करावाए|

पन रहबामें तैन बेड़ी बेवकूफी सिं जुवाब दितो, "तुस ज़ोत्थ की मेरे बाजे सुलैमाने तुसन करां काठन मेहनात करावेवरी थी| पन अवं तुस्न करां तैस करां भी ज़ैदां मेंहनात करावलो तुस्न तैस करां भी ज़ैदां पीड़ देलो|"

ज़ैखन लोकेंईं तैस करां ऐन जोंतू शुनू त तैन मारां कई लोक तैसेरे खिलाफ भोए| 10 गोट्लेंईं तै छ़ाडो; ते तैसेंईं साथी सिर्फ दुई गोट्लां बंच़ां| ते एैना दुई गोट्लेंईं अपने-आपे जो यहुदरू राज़ ज़ोवं|

बाकी 10. गोट्लेंईं यारोबाम नंवेंरो अक माड़द अपनो राज़ो बनाव| एैना गोट्लां देशेरे उत्तर-पूर्वी हिसे मां थियां| ते तैनेंईं अपने-आपे जो इस्रएलेरु राज़ ज़ोवं|

पन यारोबाम परमेशरेरे खिलाफ च़ालो ते लोकन करां पाप करावाव| तैनी अपने लोकं केरे ज़िरिहे पुज़नेरे लेंई दुई मूर्ती बनाएई| ते हुनी तैना यहुदारे राज़े मां यरूशलेममे मां परमेशरेरे मांदिरे मां तैसेरी आराधना केरनेरे लेंईं न जे|

यहूदा ते इस्राएलेरु राज़ एक-एकेरू दुशमून बेनी जेवं ते हमेशा एक्की होरी सिं लाड़ने लगे|

इस्रयालेरे नवें राज़े मां, सारे राज़े दुष्ट थिए| ऐन्न मरां कई राज़े एन्केरे जिगाई पुड़ राज़ो बन्नेरी इच्छा रखने बाले थिए| ते होरे इस्राएली केरे ज़िरिहे मारे जेवरे थिए|

इस्राएलेरे सारे राज़ेंईं ते पर्धनेंईं मूर्ती केरी भागती की| ज़ैखन तैनेंईं ऐन कियूं त तैना हमेशा बदमाश कोंन्शन का झ़ूले ते इड़ी तगर कि कई बार मूरतन का बच्चे बली भी किये|

बाइबलरी कहानी1 राज़ां केरी किताब आध्याए 1-6; 11-12