22. यूहन्नारु ज़र्म

असलीती मं, परमेशरे अपने भविषयवाणी करने बलान सिं गलां कियोरी थी एैल्हेरेलेंईं तैनेंई लोकन सिं गलां केरी बेटोरी थी, पन तैस वक्ते करां फिरि 400 साल बीतने तैनी तैन सिं गल न की| तैखन परमेशरे जकर्याह नावेंरो अक्की भविषयवाणी करने बाले का अपनो स्वर्ग दूत भेज़ो| जकर्याह ते तैसेरी लाडी एलीशिबा परमेशरेरे आदर केरतं थियं, तैना बड़ां बूढां भेवरां थियं, ते तैन कोई बच्चो न थियो भेवरो|

तैनी स्वर्गदुते जकर्याह सिं ज़ोवं, "तेरे लैड़ अक्क बच्चो भोलो| तू तैसेरू नवं यूहन्ना रेख्खां| परमेशर तैस पवित्र आत्मा सिं भरेलो, ते यूहन्ना लोकन मसीहा कुबूल केरनेरे लेंईं तियार केरेलो|" जकर्याहे जूवाब दितो , " अवं ते मेरी लाड़ी बच्चो पैदा केरनेररे लेंई बढम! अवं कैन्च़रे मेनी की तुस सच़ लगोरेथ ज़ोने?"

तैनी स्वर्ग्दुते जकर्याहे जूवाब दितो, "तीं का इ रोड़ो बिस्तार पज़ानेरे लेंई अवं परमेशरे भेज़ोरोंई| किजोकी तीं मेरो विश्वास न कियो, एैल्हेरेलेंई बच्चेरे ज़र्म घिन्न्ने तगर तू गल न केरी बाटेलो |" ते तैखने जकर्याह गलां न लगो केरी बाटने| तैखने तै स्वर्ग्दुत तैस करां च़ालो जेव| ते एैसेरे बाद, जकर्याह घरे वपस आव ते तैसेरी लाड़ी दोज़िन्ती भोई|

ज़ैखन एलीशिबा दोज़िन्ती भेवेरे 6 महीने भेवरे थिए, त तै स्वर्गदूत अचानक एलीशरी रिश्तेदारी पुड़ बंदो भोव ज़ैसारु नवं मरियम थियुं।मरियम कुँआरी थी,ते ड्ला भोनेरे लेंई युसफ नावेंरे एक्की मैनू तैसरी कुड़माई भेवरी थी| स्वर्गदूते ज़ोवं, "तू दोज़िन्ती भोनीस ते अक्क मठु ज़ाली| तीं तैसेरू नवं यीशु रखनुए| तैन सर्व-शक्तिमान परमेशरेरू मठु भोलू ते हमेशारे लेंईं राज़ केरेलू|"

मरियमं जूवाब दितो , "की एैन कैन्च़रे भोलू, किजोकी अवं त कुँआरी?" तैनी स्वर्गदुते तैस समझ़वं, "पवित्र आत्मा तीं पूड़ एजेलो, ते परमेशरेरी शक्ति तीं पुड़ी सायो केरेली| एैल्हेरेलेंईं तै बच्चो पवित्र भोलो, ते तैन परमेशरेरू मठु भोलू|" ते ज़ैन स्वर्ग्दुते ज़ोवं मरियमं तैस पुड़ विश्वास कियो|

एैन भोनेरां बाद, मरियम गेइतं एलीशिबा सिं मिली। ते ज़ेरू मरियामं तैस जो नमसकार कियूं, त एलीशिबरु मठु तैसरे पेटे मं उछ़ड़ू| तैनकेरे लेंईं परमेशरे ज़ैन किययोरू थियुं तैसेरे वजाई सिं तैना दूइए खुश भोई| ते एलीशिबा सिं साथी ट्लाई महीन रांनेरां बाद, मरियम वपस घरे जेई|

बाइबलरी कहानी लूका अध्याए 1