21. परमेशर मसीहेरो वधो केरते है

ज़ैख प्रमेशरे इस संसारेरी सृष्टि कीयोरी थी, त तै ज़ान्तो थियो की मीं बादे मं कैखन मसीहा भेनोए पेनोए| तैनी आदम ते हाव्वी सिं वधो कियो की कि तै यरू केरेलो| तैनी ज़ोवं की हाव्वी करां एक्क एरो बच्चो ज़र्मेलो ज़ै सापेरी करोड़ी ढैल्न्च़ेलो| ज़ैनी सापे हव्वी धोखो दितोरो थियो तै शैतान थियो| परमेशरेरो मतलब थियो की मसीहा पुरे तरीके सिं शैताने हारालो|

परमेशरे अबराहामे सिं वधो कियोरो थियो की तीसरे ज़िरिहे संसाररेरी सैरी ज़तां बरगत हासिल केरेली| ते परमेशर बादे मं केंची वक्ते मं मसीहा भेज़ेनेरे ज़िरिहे एैस वधे पुरे केरेलो| तै मसीहा संसारेरे हर ज़ाती मारां लोकन तैनकेरे पापन करां छुटालो|

परमेशरे मूसा सिं वधो कियोरो थियो कि एजने बाले वक्ते मं तै मुसेरो ज़ेरो अक्क होरो भविषयवाणी करने बालो भेज़ेलो| ते एै भविषयवाणी करने बालो मसीह भोलो| इस तरीके सिं, परेमेशरे फिरि वधो कियो कि तै मसीह भेज़ेलो|

परमेशरे राज़े दाऊददे सिं वधो कियोरो थियो कि तैसेरे अवलाधी मरां मसीहा भोलो| तै राज़ो भोलो ते परमेशरेरे लोकन पुड़सदा राज़ केरेलो|

परमेशरे यिर्मयाह भविषयवाणी करने बाले सिं गल की ते ज़ोवं कि एक्की दिहाड़े तै अक्क नावों करार केरेलो| इस्रयाले सिं कियोरो परानो करारेरो ज़ेरो न भोलो|ज़ैखन लोकन सिं तै अपनो करार केरेलो| त तै पुड़ अपने-आपे बंदो केरेलो| ते हर कोई मैनू तैसेंईं प्यार रख्खेलो ते तैसेरे कनुन मन्नेरी इच्छया रख्खेलो| परमेशरे ज़ोवं की एैन तैसेरे कानून तैनकेरे दिलन पुड़ लिखनेरु ज़ेरु भोलू| तैना तैसेरे लोक भोले, ते परमेशर तैनकेरे पाप माफ़ केरेलो| तै मसीह भोलो ज़ै तैन्न सिं नावों करार केरेलो|

परमेशरेरे भविषयवाणी केरनेबालेंई इन भी ज़ोवं की मसीहा अक भविषयवाणी केरनेबालो भोलो| भविषयवाणी केरनेबालो मैनू ज़ैपरमेशरेरु वचन शुनाते ते फिरि लोकन पुड़ परमेशरेरे वचनेरी घोषणा केरते| ज़ैस भेज़नेरो परमेशरे वधो कियोरो थियो तै मसीह अक मुशुर भविषयवाणी केरनेबालो भोलो| मतलब तै परमेशरेरो बिस्तार रोड़े च़ारे शुनालो, ते तै लोकन तैना बिस्तर रोड़े­-च़ारे शिखालेलो|

इस्रयाली याजकेंई लोकं केरेलेंई परमेशरे का बालीदान च़ाड़नु जारी रख्खू| एैन बालीदांन लोकन केरे पापं केरेलेंईं तैना परमेशरेरे तरफां सज़ा दिते गंनेरे जिगाई च़ाड़े गाते थिए| याजकेंई लोकं केरे लेंई परथाना की| पन तै मसीहा सिद्ध महायाजक भोलो ज़ै परमेशरे जो देनेरे लेंईं इक्की सिद्ध बेलारे रुपे मं अपने-आपे च़ाड़ेलो| मतलब, तै कधी पाप न केरेलो, ते ज़ैखन तै अपने-अपे बली भोनेरे लेंई देलो, त संसारे होरी केंन्ची भी बेलारी ज़रूरत न भोली|

लोकन पूड़ राज़े ते परधान राज़ केरतन, ते कधी-कधी तैना गलती भी केरतन| राज़े दाऊदे सिर्फ इस्रयलन पुड़ राज़ कियूं, पन राज़ेरे दाऊदेरे अवलाधी मरां एजने बालो मसीह पुरे संसारे पुड़ राज़ केरेलो, ते तै सदरे लेंईं राज़ केरेलो| ते एैल्हेरे इलावा तै हमेशा निय्ये सिं राज़ केरेलो, ते साईं फेसले केरेलो|

परमेशरेरे भविषयवाणी केरनेबालेंमसीहेरे बारे मं बेड़ी गलां ज़ोइ| म्सालरे लेंइ, मालकी ज़ोते मसीहेरे एजनेरे पेइले अक भविषयवाणी केरनेबालो एजनोए| तै भविषयवाणी केरनेबालो अक्क बड़ो खास भविषयवाणी केरनेबालो भोनोए| एैल्हेरे इलावा, यशायाह भविषयवाणी केरनेबाले लिखू की मसीहा इक्की कुवैरी करां ज़ार्म घिन्नेलो| ते मिका भविषयवाणी केरनेबाले ज़ोवं कि मसीह बैतलहम नगर मं जर्म घिन्नेलो|

यशायाह भविषयवाणी केरनेबाले ज़ोवं की मसीह गलील इलाके मं रालो| ते ज़ैना लोक बड़े दुखीन मसीहा तैन शांति देलो| तै कैदन भी आज़ाद केरेलो| मसीह बीमारन ते टावन्न, ते कान्न,ते गुणगंन , टोंन्टन ठीक केरेलो|

यशायाह भविषयवाणी केरनेबाले इन भी ज़ोवं की लोक मसीह सिं नफरत केरेले ते तैस कुबूल न केरेले पन तैसेरू इनकार केरेले| ते होरी भविषयवाणी केरनेबालेंईं ज़ोवं कि तैसेरो अक साथी तैस ट्लुव्वानेरे लेंईं चैन्दरे 30 सीक्के नेलो| ते एैल्हेरे इलावा, किछ भविषयवाणी केरनेबालेंईं ज़ोवं कि लोक मसीह मैरी छ़ाडेले, ते इन भी कि तैसेरे लिकड़ां केरे लेंई जुवो खैढे्ले|

भविषयवाणी केरनेबालेंईं इन भी ज़ोवं कि मसीहा कैन्च़रे मरेल| यशायाह भविषयवाणी केरनेबाले भविषयवाणी की कि मसीहा पुड़ थुकेले, तैसेरो मज़ाक उड़ाले, ते तैस मारेले-पीटेल| तैना तैस कोशेले ते तै कष्टे मं मरेलो, हलाकि तैनी किछ भी गलत नी कियोरू भोंनू|

भविषयवाणी केरनेबालेंईं इन भी ज़ोवं की मसीह पाप न केरेलो। तै सिद्ध भोलो| पन तै एैल्हेरेलेंई मरेलो किजोकी परमेशर तैस होरी लोकं केरे पापं केरेलेंई दण्ड देलो| तैसेरे मरने सिं लोक परमेशरे सिं मेल केरेनेरे लेंई कबल भोले| एैल्हेरेलेंई परमेशर चाते की मसीह मरे।

भविषयवाणी केरनेबालेंईं इन भी ज़ोवं की परमेशर मसीह मुड़दांन मरां ज़िन्तो केरेलो| ते एैन इन साबित केरते एैन नावों करारे केरनेरी परमेशरेरी योजना थी, ताकि तै तैना बंच़ेई बटे ज़ैनेंई तैसेरे खिलाफ पाप कियोरोए|

बाइबलरी कहानी उत्पत्ति अध्याए 3:15; 12:1-3; व्यवस्थाविवरण अध्याए 18:15; 2 शमूएल अध्याए 7; यिर्मयाह अध्याए 31; यशायाह अध्याए 59:16; दानिय्येल अध्याए 7; मलाकी अध्याए 4:5; यशायाह अध्याए 7:14; मीका अध्याए 5:2; यशायाह अध्याए 9:1-7; 35:3-5; 61; 53; भजन संहिता अध्याए 22:18; 35:19; 69:4; 41:9; जकर्याह अध्याए 11:12-13; यशायाह अध्याए 50:6; भजन संहिता अध्याए 16:10-11