28. अक अमीर ते नव जुवान अधाकरी

एक्की बार, अक अमीर जुवान यीशु का अव तै अक अधीकारो थियो तैनी यीशु का एइतं पुछ़ू, "हे रोड़े गुरु, हमेशारी ज़िन्दगी हासिल केरनेरे ललेंइ मीं कुन कियोरू लोड़े?" यीशुए तैसेंई ज़ोवं, "तू मीं जो रोड़ो कीजो ज़ोतस? रोड़ो सिर्फ आके ते तै परमेशरे| पन अगर तू हमेशरी ज़िन्दगी हासिल केरनी चातस त परमेशरेरे हुक्म मन्ना|"

"मीं कोना -कोना हुल्म म्न्नेरी ज़रूरते?" तैनी पुछ़ू| ते यिशुए जुवाब दितो, "खून नई केरनो| बदमाशी नई केरनी| चोरी नई केरनी| झूठ न ज़ोथ| अपने बाजी ते अम्न री आदर केरनी, ते अपने पड़ोसी सिं अपने जनारो ज़ेरो प्यार केरा|"

पन तैनी जुवाने सिं ज़ोवं, "अवं अपने बचपाने करां एैना हुक्म मन्नतो एवरोंई| ते मीं हमेशरी ज़िन्ते रानेरे लेंई अवं कुन केरनेरी ज़रुते?" यिशुए तैसेरां तकु ते तैसेंई प्यार कियो|

यीशुए तैस जुवाब दीतो," अगर तू सिद्ध भोंनू चतस त गेइतं अपनु सब किछ बेच ते गरीबन मं बाँट, ते तीं स्वर्गे मं धन मैलनुए| ते फिरि एइतं मीं पती एइ|"

ज़ैन यिशुए ज़ोवं ज़ैखन तैनी जुवाने शुन्नु त तै बड़ो उदास भोई जेव, किजोकी तै बड़ो अमीर थियो ते तैस अपनी सारी प्रपटी देनी न थियो चातो| ते तै यीशु करां चलो जेव|

तैखन यिशुए अपने चेलन सिं ज़ोवं, "परमेशरेरे राज़े मं अमीर लोकं केर दखल भोंनू बड़ू कठने! हां, परमेशरेरे राज़े मं एक्की अमीर मैनेरू दखल भोंनू एक्की ऊँटेरू सूयारे पाए मं मेंईं निस्नू असाने|"

ज़ैन यीशुए ज़ोवं, ज़ैखन तैन चेलेंई शुनू त तैना हेरान थिए| तैनेंई ज़ोवं,अगर एैन एैच़रे सिंए त परमेशर लोकन कैन्च़रे बंच़ालो?"

यिशुए चेलां केरे ताकू ते ज़ोवं, " लोकं केरे लेंईं अपनी मुक्ति एपू हासिल केरनी नमुम्किने| पन परमेशरेरे लेंईं किछ भी केरनु नमुम्किन नई|"

पतरस यीशु पुछ़ू, "अस तेरे चेले अपनू सब किछ छ़ेडतं तीं पती च़लोरेम| त असन कुन इनाम मैलनुए?"

बाइबलरी कहानी मत्ती अध्याए 19:16-30; मरकुस अध्याए 0:17-31; लूका अध्याए 8:18-30