45. स्तिफनुस ते फिलिप्पुस

किलसियारे पेइले अगुव्वंन मं स्तिफनुस नव्वेंरो अक चेलो थियो। सब लोक तैसेरी आदर केरते थिए। पवित्र आत्मा तैस बड़ी शक्ति ते बुधी दितोरी थी। स्तिफनुसे बड़े से चमत्कार कियोरे थिए। ज़ैखन यीशु पुड़ भोरोसो केरनेरे लेंई तैनी शिक्षा दिती त बड़े लोकेंई तैस यीशु पुड़ विश्वास कियो।

एक्की दिहाड़े, स्तिफनुस यीशुएरे बारे में शिक्षा देइ राहोरो थियो, ते किछ एरे यहूदी आए ज़ैनेंई यीशु पुड़ विशवास न थियो कियोरो ते तैसेंई बेंस बाज़ी करनी शुरू की। तैना बड़े सेरकोए ते एैल्हेरेलेंई तैना यहूदी अगुव्वंन का जे ते तैसेरे बारे मं झूठ ज़ोवं। तैनेंई ज़ोवं, "असेंई स्तिफनुसे करां मूसा ते परमेशरेरे बारे मं बुरी गलां जोंती शुनोरीन !" एैल्हेरेलेंई धार्मिक अगुववेंई स्तिफनुस गिरफदार कियो ते महायाजक ते यहूदि केरे होरी अगुववंन का घिन्तां आए। ते तैनेंई स्तिफनुसेरे बारे मं झूठ ज़ोवं।

महायाजके ने स्तिफनुसे करां पुछ़ू, "कुन एैना लोक तेरे बारे में सच़ लागोरेन ज़ोने ?" स्तिफनुसे ने महायाजके को जूवाब देने लेंई बेड़ी गलां ज़ोनी शुरू की। तैनी ज़ोवं, की अबराहमेरे वक्ते करां त यीशुएरे वक्ते तगर परमेशरे इस्रयाली लोकं केरे लेंई बड़े चामतकरेरां कामां कियोरां थियां पन मैनेंई हमेसा तिसरे हुक्म न थिए मानोरे। स्तिफनुसे ज़ोवं , "तुस लोक परमेशरेरे किलाफ तुशे दिल साखतन ते तुस परमेशरे सिं झैकड़ो केरेनेबलेथ। तुसेंई हमेशा पवित्र आत्मा कुबूल न कियो, ज़ैन्च़रे कि तुशे पूर्वजों हमेशा पवित्र आत्मा कुबूल न थिए केरते हमेशा तैसेरे भविष्यदवाणी केरने बाले मारोरे थिए। पन ज़ैन तैनेंई कियोरू थियुं तैसेरे बरैबरी मं तुसेंई होरु भी बुरु कियोरुए! तुसेंई मसीहा मरोरोए!"

ज़ैखन तैना धार्मिक अगुव्वेंई एैन शुनू, त तैना एैत्रे सेरकोए की तैनेंई अपने कन बंद किये ते चिन्डां मारने लगे। ते तैनेंई स्तिफनुस घसीटतं नगरे करां बेइर नियो ते तैस मरनेरे लेंई तैस घोड़ेंईं दिती।

ज़ैखन स्तिफनुस प्राण लागोरो थियो देने त प्रथना की, "हे यीशु, मेरी आत्मा किबुल केर!" तैखन तै ज़ैन्धू केरे भारेरां बीछ़ड़ो ते तैनी फिरि ज़ोवं, "हे प्रभु, इस पपेरो दोष एैन्न न लेंईयं।" !" तैखन तै मेरी जेव।

तैस दिहैड़ी, यरूशलेमें मं राने बाले बड़े लोकेंई यीशुएरे चेले सताने शुरू किये,एैल्हेरेलेंई विश्वासी लोक होरी-होरी जिगांन जो नशे। पन एैल्हेरे बावजूद भी, ज़ैड़ी भी तैना जे तैनेंई यीशुएरे बारे मं परचार कियो।

फिलिप्पुस नाव्वेंरो यीशुएरो अक विश्वासी थियो। ज़ैन्च़रे की होरी बड़े विषवैसेंई कियोरू थियुं तै यरूशलेमें मारां नाशो। तै सामरियरे इलाके मं जेव। तैड़ी तैनी लोकन यीशुएरे बारे मं परचार कियो। बड़े लोकेंई यीशु पुड़ विश्वास कियो ते मुक्ति हासिल की। एक्की दिहाड़े, फिलिप्पुसे का परमेशरेरे तरफां अक स्वर्गदूत आव ते तैस जंगले मं ते एक्की साड़की मं गानेरे लेंई ज़ोवं। फिलिप्पुस तैड़ी जेव। ज़ैखन तै तैस साड़ की मं च़ालोरो थियो, त तैनी अक मैनू रथे पुड़ अक मैनू गंतो लाव। तै मैनू कुश देशेरो अक खास आधीकारी थियो। पवित्र आत्मां फिलिप्पुसे सिं ज़ोवं गेइतं उस मैनू सिं साथी-साथी च़ल।

एैल्हेरेलेंई फिलिप्पुस रथे का नेड़े जेव। तैनी शुनू की तै किशी परमेशरेरू वचन पड़ने लगोरो थियो। ज़ैन यशायाह भविष्यवाणी केरने बाले लिखोरू थियुं तै तैन पड़ने लगोरो थियो, "तैनी तै तैस भड्डरो ज़ेरो नीयो ज़ै मरनेरे लेंई भोचे, ते ज़ैन्च़रे अक निकड़ू गबड़ू शान्त भोते, तैनी भी अक लब्स न ज़ोव। तैनेंई तैसेरे प्राण काढे।"

फिलिप्पुसे तैस कूशी पुछ़ू, "ज़ैन तू पाड़ने लगोरोस कुन तू तैस समझ़तस भी?" तैनी कुशी मैंने जुवाब दितो,"नई। ज़ां तगर कोई मीं न समझ़़ाए, तं तगर अवं न सेमझ़ी बेटी। मेंरभनी केरतं एइतं बिष। यशायाह इन अपने बारे मं लिखने लगोरो थियो या केंन्ची होरेरे?"

फिलिप्पुस रथे पुड़ च़ड़ोढ ते बीशो। तैखन तैनी तैस किशी मैनू ज़ोवं ज़ैन यशायाए यीशुएरे बारे मं लिखोरु थियुं। । फिलिप्पुसे परमेशरेरे वचनेरे होरी कई हिसां केरे बारे मं भी ज़ोवं। एैस तरीके सिं तैनी तैस मैनू यीशुएरे बारे मं रोड़ी खबर शुनाई ।

फिलिप्पुस ते किशी च़लते- च़लते पैनी का आए। तैनी कुशी मैंने ज़ोवं, "हेर! इड़ी पानीए! कुन अवं बपतिस्मो नेइ साखतंईं?" ते तैनी रथ च़लाने बाले सिं रथ रोकानेरे लेंई ज़ोवं।

ते तैना पैनी का जे ते फिलिप्पुसे तैसबपतिस्मो दितो। ज़ैखन तैना पैनी करां बेइर आए, त पवित्र आत्मा अचानके फिलिप्पुस तैठां गैइबी केरतं होरी जिगाई नीयो। ते तैड़ी फिलिप्पुसे तैनां लोकन यीशुएरे बारे मं ज़ोनू जारी रख्खू।

बाइबलरी कहानी प्रेरितं केरां कामां 6:8-8:5; 8:26-40