47. फिलिप्पी मां पौलुस ते सीलास

ज़ैखन शाउले पुरे रोमी राज़े मं जेव तैनी अपने रोमी नव्वें पोलुसेरो इसतमाल केरनो शुरू कियो। एक्की दिहाड़े पोलुस ते सिलास फिलिप्पी नगरे मं यिशुएरी खुश खबरी शुन्ने जे। तैना नगरे करां बेइर एक्की दरियाए का जे ज़ैड़ी लोक प्राथना केरनेरे लेंई अकोठे थिए। तैड़ी तैना लुदिया नव्वेंरी एक्की कोंशी सिं मिले तै अक बुपारी थी। तै परमेश रे सिं प्यार केरती थी ते तैसेरी आराधना केरती थी।

परमेशरे लुदिया यीशुएरे खुश खेबरी पुड़ वोश्वास केरनेरे लेंई काबिल बनाई। पौलुस ते सीलासे तैस ते तैसारे परिवारे बपतिस्मो दितो। तैसां पौलुस ते सीलास अपने का बिशनेरे लेंई ज़ोवं, तैल्हेरेलेंई तैना तैड़ी बिशे।

पौलुस ते सीलासे हमेशा तैस जिगई लोकन सिं मिलते थिए ज़ैड़ी यहूदी लोक प्राथना केरते थिए। हर रोज़ ज़ैखन तैना तैड़ी गाते थिए त अक कुई ज़ै दासी थी तै पुड़ भूतेरो सायो थियो ते तै तैन्न पतपती एइती थी। तैस भुतेरे मदती सिं तै लोकं केरे एजनेवाले वक्तेरे बारे मं ज़ोती थी, ते एैल्हेरेलेंई एजनेबाले वक्तेरे बारे मं ज़ोने बाली बेनतं तै अपने मलकां केरे लेंईं बड़ो पेंइसो कमाती थी।

तैनकेरे गंते बार तै कुई चीनडां मरती थी,बी "इना मैनू परम प्रधान परमेशरेरे सेवकन। एैना तुस्न मुक्ति हासिल केरनेरी बत्तरे बारे मं लागोरेन ज़ोने!" तै हर दिहाड़ी एरु केरती थी ज़ैसेंई की पोलुस नाराज़ भोव।

अखारी, एक्की दिहैड़ी ज़ैखन तैसां दैसी कुइयं चीनडां मैरनी शुरूकी, त पोलुसे तैसारे पासे मुड़तं तैसमां ज़ैन भुत थियुं तैसेंई ज़ोवं, "यीशुएरे नव्वें सिं एैस मरां निसी गा।" ते तैसे वक्त्र तैन भुत तैस छ़ेडतं जेंवं।

तै दैसी कुइयारे मालिक बड़े सेरकोए। तैन पतो लगो की तै भुतेरे बगैर हुनी एै दासी कुइ एजनेबाले व्कतेरे बारे मं ज़ोई बटे। ते एैल्हेरो मतलब थियो की लोक हनी तैआरे माल्कन पेंइसे न देले की तै तैन ज़ोए की एजने बाले वक्ते मं कुन भोनूए।

एैल्हेरेलेंई तैस दैसी कुइयारे मलिक पोलुस ते सिलास रोमी अधिकैरन का नीए। तैनेंई पोलुस ते सिलासे मार दिती, ते फिरि तैना जेली मं छ़डे।

तैनेंई पोलुस ते सिलासएरे हिसे मं राख्खे ज़ैड़ी ज़ैदां पेरदार थिए। इड़ी तगर की तैनेंई तैनकेरे पावन लेकड़ारी बेड़ल मं छ़डे। पोलुस ते सिलास एधी रती परमेशरेरां भाजनां लगोरे थिए ज़ोने।

ते अचानक अक बड्डो भून्ज़ल आव! जेल्रां सारां दारां खुली जेंआं, ते सैरी कैदी केरे शानग्लां खुलतं बीछ़डी जेई।

तैखन बींझ़ो। तैनी हेरू की जेलारां दारां खुलोरांन। तैनी सोचु की सरे कैदी नाशोरेन। तै डरो की तैन केरे नशाने सिं रोमी अधकारी तै मारले, एैल्हेरेलेंइ तै आपने-आपे मरनेरे लेंई तियार भोव! पन पोलुसे तैस लेइतं ज़ोरे सिं हक़ दिती, "रुक ! अपने अपे नुगासन न पज़ा। अस सब इड़ी आम।"

तैनी दरोगा थरकतो एइतं पोलुस ते सिलासे करां पुछ़ू, "मुक्ति हासिल केरनेरे लेंई अवं कुन केरी?" पोलुसे जुवाब दितो, "प्रभु यीशु पुड़ विश्वास केर, त तू ते तेरो घरानो मुक्ति हासिल केरेलो।" तैखन तै दरोगा पोलुस ते सिलासे अपने घरे नेते ते तैनी तैनकेरे पाव धोए। पोलुसे तैसेरे सारे घरेरे लोकन यीशुएरी खुशखाबरी शुनाई।

दरोगा ते तैसेरे पुरे परिवारे यीशु पुड़ विशवास कियो, एैल्हेरेलेंई पोलुस ते सिलासे तैन्न बतीस्मो दितो। तैखन दरोगा तैन्न रोटी खुवाई, ते तैना बड़े खुश भोए।

ते होरी दिहाड़े नगरेरे लोकेंई पोलुस ते सिलास जेली मारां आज़ाद किये ते फिलिप्पी मरां च़ले गंनेरे लेंई ज़ोवं। पोलुस ते सिलास लुदिया ते होरी किछ दोस्तन सिं मिले ते तैलां बाद नगर छ़ेडतं च़ले जे। ते यिशुएरे बारे मं खुश खबरी शुनांते जे, ते कलीसिया बाधती जेई।

बाइबलरी कहानी प्रेरितं केरां कामां 16:11-40 बाइबल की कहानी