50. यीशु वापिस एइते

लगभग 2,000 साल, पेइले संसारे मं सेभी जिगान ज़ैदां करां ज़ैदां लोक यीशु मसीहेरे बारे मं रोड़ी खबार शुनेई राहोरेन| कलीसिया बधाने लगोरीए| यिशु मसीहे वधो कियोरोए की तै सांसरेरे आखीरी वपस एज्नोए| हालाकि हुना तगर यीशु मसीह वपस नई एवरे, तं भी तै अपने वधे पुरे केरे लो|

हालाकी अस यीशुएरे वपस एजने बल्गने लगोरेम, ते परमेशवर चाते की अस पवित्र ज़िन्दगी ज़ीम ते ज़ै तैसेरी आदर केरते| अगर यीशु मसीह एजी रहोरेन त तैनेंई ज़ोवं, " मेरे चेल पुरे संसारे मं सैरी जिगां केरे लोकन परमेशरेरे राज़ेरे बारे मं पारचार केरेले, ते तैखन अंत एजेलो|"

बेड़ी ज़ातेंई हेजू तगर परमेशरेरे बारे मं नई शुनोरू| स्वर्गे जो वपस गंने करां पेइले, यिशुए मसीह लोकन तैना लोकन यीशुएरे बारे मं ज़ोनेरे लेंई ज़ेवरुए ज़ैनेंई तैसेरे बारे मं कधी नई शुनोरू| तैनी ज़ोवं, "गाथ ते सेभी ज़तां केरे लोकन चेले बनत!" ते "कटाइ केरनेरे लेंई उड़ारन मं फसल पकोरीए!"

यीशुए इन भी ज़ोवं, "कोई भी सेवक अपने मालिके करां बड्डो न भोए| इस सांसरेरे खास लोकेंई मीं सिं नफ़रत की, ते मेरे वजाई सिं तैना तुस्न भी सताले ते मारेले| इस संसारे मं तुस्न कष्ट भोलो, पन मज़बूत बना, किजोकी मीं शैतान हराव ज़ै इस सांसरे पुड़ राज़ केरते| अगर तुस आखरी तगर मीं पुड़ विशवास केरेले त बंच़ेले!"

यीशुए अपने चेलन एैन समझ़ानेरे लेंई अक कहानी शुनी की ज़ैखन संसरेरो अंत भोते त लोकन सिं कुन भोलू| तैनी ज़ोवं, "केंन्ची मैने अपने उडारे मं रोडू बीज़ बेवं| ते ज़ैखन तै झ़ूलोरो थोइयो त तैसेरू मठु आवं ते गेवंन सिं साथी तैसे उडारे मं जंगीली बूटां केरू बीज़ बेवं, ते फिरि तै च़लो जेव|"

"ज़ैखन नीके-नाइके बूट लगे त सेवकेंई तैस मैनू सिं ज़ोवं, 'हे मालीक तीं अपने उडारे मं रोड़ू बीज़ बेवरु थियुं| त फिरी तैस मं जंगली बूत कीजोअन?' तैनी मैंने जुवाब दितो, 'सिर्फ मेरे दुशमुने तैन्न बेनू चलो| एै मेरो कोई दुशमुने ज़ैनी एैन कियोरूए|"

"तैना सेवकेंई अपने मालिके जूवाब दितो, 'कुन असेंई जंगली डाल पुटी छ़ाडम?' तैनी मालिके ज़ोवं, 'नई| अगर तुस एरु केरेले त तुसेंई किछ गेंवं भी पुटनेंन| कटैइ यारे वक्ते तगर बलगा तैखन जंगली डालां केरी कमड़ी बनेइतं तैन्न अकोठे केरा ताकि तुस तैन्न फुकी साखथ| पन गेंवन मेरे उडारे मं अकोठे केरा|"

चेलेंई एैस कहैनारो मतलब न समझ़ो, एैल्हेरेलेंई तैनेंई यीशु सिं तैन्न समझ़ानेरी की| यीशुए ज़ोवं, "रोड़ू बीज़ बेने बालो यीशु मसीहेरे चेलेन| हीराते उडार सांसरे हीरेते| ते रोड़ू बीज़ परमेशरेरे राज़ेरे लोकन हीराते|"

"जंगली बूट तैनी दुष्ट मैंने, येनी की शैतानेरे मैन्न हीराते| तैस जंगली बीज़ बेनेबालो शैताने, ज़ैनी जंगली बीज़ बेव्वं| ते फसलारी कटाई इस संसारेरो अन्त हीराचे, ते कटाई केरने बाले परमेशरेरे स्वर्गदूतन|"

"ज़ैखन संसरेरो अंत भोलो तैखन स्वर्गदूत तैना सेभन साथी अकोठे केरेले ज़ैना शैतानेरेन| तैनां स्वर्गदूत तैन्न एक्की बेड़ी गर्म जिगाई शारेले| ज़ैना मैनू शैतानेरेन| तैड़ तैना लोकन बड़ो ज़ैदां कष्ट भोलो ते अपने दन्त काटेले| पन ज़ैना लोक धर्मीन, तैनेंई यीशु मसीह एरी गलां मेनी, तैना बाजी परमेशरेरे राज़े मं सुरजेरे ज़ेरे चामकेले|"

यीशुए इन भी ज़ोवं, की तैस संसारेरो अन्त भोनेरे पेइले धेरती पुड़ एजेलो तै तैसे ट्रिक सिं वपस एजनोए ज़ैन्च़रे तै जेवरो थियो| मतलब, तैसका आली शरीर भोनोए, ते तै अमबरे मं बिद्लारी पुड़ी सुवार भोईतं एजनोए| ज़ैखन वपस एजेले त अस असमाने मं तैसें मिलमेले|

ते तैखन ज़ैनां मसीह लोक ज़िन्ते भोले त तैना बिद्लारी मं उठाए गंनेंन ते तैना होरी मैन्न मं शामिल भोनेन ज़ैनां मुड़दांन मरां ज़िन्ते भेवरेन| तैना सब तैड़ी यीशु सिं साथी भोनेंन| तैसेरे बाद,यीशु अपने लोकन सिं साथी रालो| ज़ैखन तैना साथी राले त तैन्न का हमेशारे लेंई शांती भोली|

यिशु पुड़ विश्वास केरने बाले केंन्ची मुक्त देनेरो वधो कियोरोए| तैना हमेशारे लेंई हर एक्की चीजी पुड़ राज़ केरेले| तैन्न का सिद्ध शांती भोली|

पन परमेशर तैना सेभी केरो नीय्य केरेलो ज़ैनां यीशु पुड़ विशवास न केरन| तै तैन्न नरके मं छ़ाडेलो| तैड़ी तैना लेरां देले ते अपने दन्त च़ापेले, ते तैनां हमेशा तकलीफी मं राले| कधी न हीश्ने बाली आग तैन्न लगातार फुकती राली, ते कीड़े तैन्न खाने करां न रुकेले|

ज़ैखन यीशु वपस एइते, त तै पुरे तरीके सिं शैताने ते ज़ैन तैसेरू राज़े तैस नाश केरेलो, तैना सेभन ज़ैनेंई परमेशरेरी गलां मेन्नेरे बजाए शैताने पती च़लनू शुरू कियोरू थियुं।

किजोकी अदामे ते हव्वां परमेशरेरो हुक्म न थियो मन्नोरो ते इस संसारे मं पाप घीन्नतं आं, परमेशरे तैस शाप दीतो ते तै नाश केरनीरो फ़सलो कियो| पन एक्की दिहाड़ी परमेशरे अक्क नव्वों अमबर ते नव्वीं धरती बनानीए ज़ैस मं पाप ते दुःख दुश्मनी न भोली।

बाइबलरी कहानी मत्ती 24:14; 28:18; यूहन्ना 15:20, 16:33; प्रकाशितवाक्य 2:10; मत्ती 13:24-30, 36-42; 1 थिस्सलुनीकियों 4:13-5:11; याकूब 1:12; मत्ती 22:13; प्रकाशितवाक्य 20:10, 21:1-22:21