49. परमेशरेरो नावों करार

एक्की स्वर्गदुते एक्की जुवान कोंशी मर्यमी सिं ज़ोवं की तै परमेशरेरे मठे ज़र्म डेली| तै हेजू कुवारी थी, पन पवित्र आत्मा तैस पुड़ सायो कियो ते तै दोज़िन्ती भोई| तैसां एक्की मठे ज़ेम दीतु ज़ैसेरु नव्वं तैसान यीशु रख्खू| एैल्हेरेलेंई, यीशु परमेशर भी आए ते मैनू भी आए

यिशुए बड़े चमताकार किये ज़ैना हीरातन की तै परमेशरे| तै पैनी पुड़ च़लो ते तैनी अंधी-तोफान शांत कियो| तैनी बड़े बीमार लोक बाझ़ाए ते बड़े मैनू बाझ़ाए ज़ैन पुड़ भूतां केरो सायो थियो। तैनी मरोरे लोक ज़िन्ताए, ते तैनी पाँच़ रोटी ते दूई मछली 5000 मैन्न देइतां चमत्कारे सिं तैना सब मैनू खेइतं राज़े|

यीशू अक शिक्षा देने मं भी अक महान गुरु थियो| ज़ैन किछ भी तैनी शीखालू, तैन तैनी सिधता सिं सिखाया| ज़ैन तै लोकन केरनेरे लेंईं जोते त तैनें कियोरू लोड़े किजोकी तैन परमेशरेरू मठुए| मासलारे लेंई, तैनी शिखालू की तुसेंई होरी लोकन सिं तैन्च़रे प्यार केरनोए ज़ेरो प्यार तुस अपने जानी सिं रख्खतथ।

तैनी शिखालू की तुसेंई सेभी चीज़न करां भी ज़ैदां एपनी परैपटी करां भी ज़ैदां परमेशरे सिं प्यार रखोरो लोड़े|

यीशुए ज़ोवं की केंन्ची भी चिज़ी हासिल केरने करां ज़ैदां रोड़ू इने की मैनू परमेशरेरे राज़े मं भोए| तुस्न तैसेरे राज़े मं गंनेरी ज़रुरते की परमेशर तुस्न तुसे पापन करां बंचाए|

यीशुए ज़ोवं की किछ लोकन ज़ैनां तैस कुबूल केरेले| परमेशर तैना लोकन ज़ोलो| पन होरे लोक तैस कुबूल न केरेले| तैनी इन भी ज़ोवं की किछ लोक रोड़ी ज़ामिनारे ज़ेरेन, किजोकी तैना यीशुएरे बारे मं रोड़ी खाबर कुबूल केरतन, ते परमेशर तैन बंच़ाते| पन किछ लोक बत्ती बैली सख्त ज़मीनारे ज़ेरेन| परमेशरेरू वचन बीज़ेरू ज़ेरुए बत्ती मं बीछ़ड़त, पन तैड़ी किछ भी न लगे| एैना लोक यीशुएरे बारे मं रोड़ी खबर कुबूल केरतन| पन तैना तैसेरे राज़े मं शामिल भोने करां इन्कार केरतन|

यीशुए ज़ोवं, की परमेशर पैपन सिं प्यार केरते| तै तैन माफ़ केरने चाते| तै तैन अपने बच्चे बन्नने चाते|

यीशुए भी ज़ोवं की परमेशर पापे सिं नफ़रत केरते| किजोकी आदम ते हव्वां पाप कियो, एैल्हेरेलेंई तैनकेरे सारे अवलधारे लोकेंई भी पाप कियो| इस संसारे मं राने बालो हर कोई मैनू पाप केरते| ते परमेशरे करां दुरे| है कोई मैनू पापेरे वजाई सिं परमेशरेरो दुश्मने|

पन परमेशरे इस दुनियाई मं राने बाले हर एक्की मैनू सिं एरो प्यार कियो : तैनी अपनू एक्के मठु दीतु ताकि ज़ै कोई भी तैस पुड़ विश्वास केरे तै नाश न भोए पन हमेशारी ज़िन्दगी हासिल केरइ| इलहेरे बाजाए, तै तैन्न सिं साथी हमेशा राले|

तुस मरनेरे काबील आथ, किजोकी तुसेंई पाप कियोरेन| तुसन पुड़ परमेशरेरी सरक भोनी जैइजे, ते एैलहेरी बाजाए, तै यीशु पुड़ सेरकोव| तैनी यीशु क्रूसेरी मवत देइतं तैस सज़ा दिती|

यीशुए कधी पाप न कियो, पन तैनी पमेशरेरी तै सज़ा कुबूल की।तैनी मरनू कुबूल कियूं। एैस तरीके सिं, तुशे पापन ते इस सांसरे मं राने बाले हर मैनेरे पाप तैनी एप्पू पुड़ नीये ते तैसेरू तैन सिद्ध बालीदान थियुं| यीशुए अपनो आप परमेशरे का बालीदान कियो, एैल्हेरेलेंई परमेशर कोई भी पाप इड़ी तगर की बड़े करां बडो पाप यीशुएरे नव्वें सिं माफ केरते

भले ही तुस रोडां कमां केरतथ, त एैल्हेरे ज़िरिहे परमेशर तुस्न न बंच़ालो| तैसेरो दोस्त बन्नेरेलेंई यरू किछ भी नई ज़ैन तुस केरी बटतथ| इसेरे बजाए, तुसेंई विशवास केरनोए की यीशु परमेशरेरू मठुए, ते तै तुशे बदले क्रूसे पुड़ मरारोए, अगर तुस इस गली पुड़ विशवास केरथ, त परमेशर तुस्न तुसे पापं केरी माफी देलो|

परमेशर हर एक्की तैस मैनू बंचालो ज़ै यीशु पुड़ विशवास केरते ते तैस अपनो प्रभु कुबूल केरते| पन तै तैन न बंचालो ज़ैना तैस पुड़ विशवास न केरन| इन किछ भी बड़ी गल न रख्खे की तुस बड़े अमीर या गरीब आथ, माड़द भोए या कोंश, बुढो भोए या बुढी या जुवान, या तुस कोड़ी रातथ| तुस कोस देशेरेथ| परमेशर तुस्न सिं प्यार केरते ते चाते की तुस यीशु पुड़ विशवास केरथ ते परमेशर तुशो दोस्त बेनी गाए।

यीशु तुस्न कुजाने लगोरोए की तुस तैस पुड़ विशवास केरतथ ते बपतिस्मो नेथ। कुन तुस विशवास केरतथ की परमेशरेरू अक्के मठु, यीशु ही मसीहाए? कुन तुस विश्वास केरतथ की तुस पापीथ ते इन की तुस इस कबलथ की तुस्न परमेशरे करां सज़ा मैल्नेरे काबलथ? कुन तुस विश्वास केरतथ की यीशु तुसे पापन मीटानेरे लेंई यीशु क्रूसे पुड़ मरो?

अगर तू यीशु पुड़ ते ज़ैन किछ तैनी तुशे लेंई कियूं तैस पुड़ विशवास केरतथ, त तुस अक मसीह मैनूथ! शैता हुनी अपने अंधरेरे राज़े मं तुस्न पुड़ राज़ न केरे| हुनी परमेशर अपने लोआरे राज़े मं तुस्न पुड़ राज़ केरते| तैनी हुनी तुस पाप केरेने करां रोकनेथ, ज़ैन तुस केरते थिए| तैनी तुस्न अक नव्वीं जिंदगी दितोरीए।

अगर तुस अक मसही मैनूथ त ज़ैन यीशु मसिहे कीयोरूए तैसेरे वाजी सिं परमेशरे तुशे पाप माफ़ कियोरेन| हुनी, परमेशर तुस्न एक्की दुशमुनेरां इलावा अक अच्छो दोस्त मन्नते।

यदि तुम परमेश्वर के मित्र हो और प्रभु यीशु के सेवक हो तो तुम उन अगर तुस परमेशरेरे दोस्तथ ते प्रभु यीशुएरे सेवकथ त तुस तैना गलां मन्नेरी इच्छा केरेले ज़ैना यीशु तुस्न शिखालते| भले ही तुस अक मसीह आथ, शैतान हेजु भी पाप केरनेरे लेंई तुस्न खीचेलो| पन परमेशर हमेशा तैन केरते तै इन केरते| तै ज़ोते की अगर तुस अपने पापन मन्थ त, तै तुस्न माफ़ केरेलो| तै तुस्न पापां केरे खिलाक लाड़नेरी शक्ति देलो।

बाइबलरी कहानी रोमियों 3:21-26, 5:1-11; यूहन्ना 3:16; मरकुस 16:16; कुलुस्सियों 1:13-14; 2 कुरिन्थियों 5:17-21; 1 यूहन्ना 1:5-10