1. सृष्टि

शुरु च परमेश्वरे इस तरीके ने सारियां चीजां जो बणाया। उनी छे दिना च संसारे दी कने जड़ा कुछ उदे च है उना सारियां चीजां जो बणाया। परमेश्वरे जालू पृथ्वी दी रचना किती उदे बाद पृथ्वी खाली थी कने ओथु नेहेरा था, क्योंकि हले दीकर परमेश्वरे ओथु कुसी भी चिजा जो नी बणाया था। पर परमेश्वरे दी आत्मा पाणिऐ उपर मंडरांदी थी।

फिरी परमेश्वरे बोलया, " लौ हो!" कने लौ होई गेई। परमेश्वरे दिखया कि लौ छेल है कने उसयो परमेश्वरे "दिन" बोलया। कने उनी उसयो नेहरे ला लग किता जिसयो परमेश्वरे "रात" बोलया। परमेश्वरे सृष्टि करणे दे पेहले दिने च लौई जो बणाया।

सृष्टि करणे दे दुऐ दिने च परमेश्वरे बोलया, "पाणिऐ दे ऊपर इक खाली जगा होई जाए।" कने इक खाली जगा होई गेई। परमेश्वरे उसा जगा जो "अम्बर" बोलया।

तीजे दिने च परमेश्वरे बोलया, "पाणी इकी जगा पर गिठा होई जाऐ कने सुकी जमीन अलग होई जाऐ।" परमेश्वरे सुकिया जमिना जो "पृथ्वी" बोलया कने पाणिऐ जो "समुद्र" बोलया। परमेश्वरे दिखया कि जड़ा कुछ उनी बणाया था सै छेल था।

फिरी परमेश्वरे बोलया, "धरतिया पर हर तरा दे रुख कने बूटे उगन।" कने इयां ही होया। परमेश्वरे दिखया कि जड़ा उनी बणाया था सै छेल था।

सृष्टि करणे दे चौथे दिने च परमेश्वरे बोलया, "अम्बरे च ज्योतियाँ होन।" कने सूरज, चंद्रमा कने तारे बणी गे। परमेश्वरे उना जो धरती पर लौ देणे तांई कने दिन कने रात, मौसम कने सालां च भेद करणे तांई बणाया।

पजमे दिने परमेश्वरे बोलया, "जिन्दे जिव जंतुआ ने पाणी भरुई जाऐ कने अम्बरे च पंछी उड़न।" इयां परमेशवरे पाणिऐ च रेणे बाले सारे जिव जंतुआ जो कने पंछिया जो बणाया। परमेश्वरे दिखया कि ऐ छेल था कने उना जो आशीष दिती।

सृष्टि दे छेमे दिने च परमेश्वरे बोलया, "जमिना पर रेणे वाले सारे जानवर पैदा होन।" कने इयां ही होई गिया। कुछ जानवर पालतू थे, कुछ जमिना पर रेंगणे बाले, कने कुछ जंगली जानवर थे। कने परमेश्वरे दिखया कि ऐ छेल था।

फिरी परमेश्वरे बोलया, "आओ असां माणुआं जो अपणे स्वरूप च कने अपणे सांई बणान। उना पृथ्वी पर कने सारे जानवरां पर अधिकार रखणा।"

परमेश्वरे मिट्टी लेईकरी उसला माणु बणाया कने उदे च जिन्दगी दा सा फूँकी दिता। इस माणुऐ दा ना आदम था। परमेश्वरे इक बडे बगीचे जो बणाया कने उदी देखभाल करणे तांई आदम जो ओथु रखी दिता।

उस बगीचे दे बिच परमेश्वरे दो ख़ास रुख लाऐ, इक जिन्दगी दा रूख कने दुज्जा भले कने बुरे दे ज्ञान दा रुख। परमेश्वरे आदम जो बोलया कि सै उस बगीचे दे भले कने बुरे दे ज्ञान दे रूखे जो छडी करी होर कुसी भी रूखे दे फले जो खाई सकदा है। अगर उनी उस रूखे दा फल खादा तां उनी मरी जाणा।

फिरी परमेश्वरे बोलया, "माणुऐ दा किल्ला रेणा खरा नी है।" पर कोई भी जानवर आदमे दा जोड़ी दार नी बणी सकदा।

इस तांई परमेश्वरे आदम जो गेहरी निंद्रा च सुआई दिता। फिरी परमेश्वरे आदम दी इक पसली लेई करी उसने इक जनानी बणाई कने उसा जो आदम बाल लेई करी आया।

जालू आदमे उसा जो दिखया तां उनी बोलया, "कम से कम ऐ तां मेरे सांई है! इसा जो 'जनानी' बोलणा, क्योंकि ऐ मर्दे ला बणियो है।" इसा बजा ला मर्द अपणे माता-पिता जो छडी दिंदा है कने अपणिया घरे बालिया सोगी इक होई जांदा है।

परमेश्वरे मर्द कने जनानिया जो अपणे स्वरूप च बणाया। उनी उना जो आशीष दिती कने उनी बोलया, "मतियां सारियां ओलादी कने पोते-परपोते पैदा करा कने धरती जो भरी दिया!" कने परमेश्वरे दिखया कि जड़ा कुछ भी उनी बणाया था सै बड़ा छेल था, कने सै उना सारयां ला बड़ा खुश था। ऐ सारा कुछ सृष्टि करणे दे छेमे दिने होया था।

जालू सतमा दिन आया तां जड़ा कुछ परमेश्वर करा दा था उनी उस सारे कम्मे जो मुकाया। उनी सतमे दिने जो आशीष दिती कने उसयो पवित्र बोलया, क्योंकि उस दिन उनी सारियां चीजां दी सृष्टि करणे दे कम्मे जो मुकाया था। इयां परमेश्वरे संसार दी कने जड़ा कुछ उदे च है उना सारयां दी सृष्टि किती।