2. पाप दा संसारे च ओंणा

आदम कने उदी घरे बाली उस सुंदर बागे च रेंदे थे, जड़ा परमेश्वरे उना तांई बणाया था कने बड़े खुश थे। उना चे कोई भी कपड़े नी पेहनदा था, फिरी भी इना जो इसा गल्ला दी कोई शरम नी ओंदी थी, क्योंकि तालू संसारे च पाप नी था। सै हमेशा उस बगीचे च गुमदे थे कने परमेश्वरे ने गल्लां करदे थे।

पर उस बागे च इक सप्प था। सै बड़ा भरी चलाक था। उनी उसा जनानिया ला पूछया, "क्या सच्ची परमेश्वरे तुहांजो इस बागे दे कुसी भी रूखे दे फले जो खाणे ला मना कितया है?"

उना जनानिया जबाब दिता, "परमेश्वरे सांझो ने बोलया है कि असां उस भले कने बुरे दे ज्ञान दे रूखे दे अलावा कुसी भी रूखे दे फले जो खाई सकदे न। परमेश्वरे सांझो ने बोलया है कि अगर तुसां उस फले जो खादा या उसयो छूता भी, तां तुसां मरी जाणा।"

उनी सप्पे जनानिया जो जवाब दिता, "ऐ सच नी है! तुसां नी मरणा। परमेश्वर जाणदा है कि जियां ही तुसां उस फले जो खांगे, तां तुसां परमेश्वरे सांई होई जाणा कने उदे सांई भले कने बुरे जो समझणा लगी पोणा।"

उना जनानिया दिखया कि सै फल दिखणे च बड़ा छेल कने स्वाद लग्गा दा था। सै भी समझदार बणना चांदी थी, इस तांई उना फले जो तोड़ी करी खाई लिया। फिरी उना अपणे घरे बाले जो जड़ा उसा सोगी था सै फल दिता कने उनी भी खाई लिया।

अचानक ही, उना दियां हखी खुली गियां, कने उना जो पता लगी गिया की सै नंगे थे। उना पत्तयां जो जोड़ी करी उना दे कपड़े बणाई करी उना ने अपणे शरीरां जो ढकणे दी कोशिश किती।

तालू आदमे कने उदिया घरे बालिया उस बागे च गुमदे होए परमेश्वरे दी आवाज सुणी। सै दोनों परमेश्वरे ला लुकी बैठे। तालू परमेश्वरे आदमे जो आवाज लाई, "तू कुथू है?" आदमे जवाब दिता, "मैं तुहांजो बागे च गुमदे होए सुणया, कने मैं डरी गिया था, क्योंकि मैं नंगा था। इस तांई मैं लुकी बैठा।"

फिरी परमेश्वरे पूछया, "तिजो कुनी दसया कि तू नंगा है? क्या तू सै फल खादा है जिसयो खाणे तांई मैं तिजो मना कितया था?" आदमे जवाब दिता, "तुसां मिंझो जड़ी ऐ जनानी दितियो है इना ही मिंजो सै फल खाणे जो दिता।" तालू परमेश्वरे जनानिया ला पूछया, "तू ऐ क्या किता है?" उना जनानिया बोलया, "सप्पे मिंजो धोखा दिता है।"

परमेश्वरे सप्पे जो बोलया, "तू शापित है! तू अपणे पेटे भार रेंगणा है कने मिट्टी चटणी। तू कने इना जनानिया इक दुज्जे ने नफरत करणी, कने तेरिया ओलादी कने उना दियां ओलादी भी इक दुज्जे ने नफरत करणी। इसा जनानिया दे वंशजे तेरे सिरे जो गरेचणा, कने तू उदिया खुरिया जो डसणा।"

तालू परमेश्वरे जनानिया जो बोलया, "मैं तेरे बच्चा जमणे जो बड़िया पीड़ा बाला करणा। तू अपणे घरे बाले ला लालसा करणी, कने उनी तीजो पर प्रभुता करणी।"

परमेश्वरे आदमे जो बोलया, "तू अपणिया घरे बालिया दी सुणियो है कने मेरा हुकम नी मनया है। इस तांई धरती शापित होई है, कने तिजो अनाज उगाणे तांई बड़ी मेहनत करणा पोणी। हुण तू मरी जाणा, कने तेरा शरीर मिट्टी च मिली जाणा।" आदमे अपणिया घरे बालिया दा ना हव्वा रखया, जिदा मतलब है "जिन्दगी देणे वाली", क्योंकि उना सारियां जातियां दी माता होणा। कने परमेश्वरे आदम कने हव्वा जो जानवरां दी खली दे बणयो कपड़े पेहनाए।

फिरी परमेश्वरे बोलया, "हुण माणु भले कने बुरे दा ज्ञान पाई करी साड़े सांई होई गिया है, इस तांई हुण ऐसा ना हो की सै जिन्दगी दे रूखे दा फल तोड़ी करी खाई ले कने हमेशा जिन्दा रे।" इस तांई परमेश्वरे आदम कने हव्वा जो उस बागे ला बाहर कडी दिता। कने परमेश्वरे उस जिन्दगी दे रूखे दे फले जो कुसी जो भी खाणे ला रोकणे तांई उस बागे दे अंदर जाणे बाले रस्ते पर शक्तिशाली स्वर्गदूतां जो बैठाई दिता।