3. बाढ़ दी कहाणी

मते सालां बाद, संसारे च मते लोक रेंदे थे। सै लोक बड़े बुरे कने पापी होई गियो थे। लोक इतणे बुरे कने पापी होई गियो थे कि परमेश्वरे इक बड़ी बडी बाढ़ ने इस पूरे संसारे जो खत्म करणे दा फेसला लेई लिया।

पर परमेश्वर नूह ला खुश था। सै बुरे लोकां बीच रेणे वाला इक धर्मी आदमी था। परमेश्वरे नूह जो दसया कि इक बड़ी बडी बाढ़ ओणी है। इसा बजा ला, उनी नूह जो इक बड़ा बडा पांणिऐ बाला जहाज बणाणे तांई बोलया।

परमेश्वरे नूह जो लगभग 140 मीटर लम्बा, 23 मीटर चौड़ा कने 13.5 मीटर उचा जहाज बणाणे तांई बोलया। नूह जो उसयो लकड़ी ने बणाणा था कने उदे च तिन तले, मते भरी कमरे, इक छत कने इक खिड़की बणाणी थी। उनी जहाजे नूह, उदे परिवारे, कने धरती दे हर तरा दे जानवरां जो उसा बाढ़ा ला बचाई रखणा।

नूहे परमेश्वरे दी गल्ल मन्नी। उनी कने उदे पुत्रां सियुदा ही पांणिऐ बाला जहाज बणाया जदिया परमेश्वरे दसया था। क्योंकि सै जहाज बड़ा बडा था, इस तांई उसयो बणाणे तांई केई साल लग्गे। नूहे लोकां जो ओणे बालिया बाढ़ा दे बारे च चेतावनी दिती कने उना जो परमेश्वरे पासे फिरणे तांई बोलया, पर उना उस पर भरोसा नी किता।

परमेश्वरे नूह कने उदे परिवारे जो अपणे तांई कने जानवरां तांई पूरा खांणे दा समान गठेरणे दा भी हुकम दिता। जालू सब कुछ तैयार था, तां परमेश्वरे नूह जो बोलया ऐ बकत उदे कने उदिया घरे बालिया कने उदे तिन्न पुत्रां दे, कने उना दियां घरे बालियां दे – कुल मिलाई करी अठ जणयां दे जहाजे च जाणे दा बकत था।

परमेश्वरे हर जानवर कने पक्षी दे नर कने मादा जो नूह दे बाल भेजया ताकि सै जहाचे च जाई सकन कने जालू बाढ़ ओऐ तां बची सकन। परमेश्वरे ऐसे हर तरा दे जानवरां दे सत नर कने सत मादां जो भेजया जिना जो बलि चढ़ाणे तांई इस्तेमाल करी सकन। जालू सै सारे जहाजे च पुज्जी गे तां परमेश्वरे अप्पू ही जहाजे दे दरबाजे जो बंद करी दिता।

तालू बरखा होणा शुरू होई, कने बिना रुकयो चालियां दिना कने चालियां रातां दीकर बरखा होंदी रेई। सारे संसारे दी हर इक चीज, एथू दीकर कि उच्चे ला उच्चे पहाड़ भी पाणिऐ च डूबी गे।

सूकिया धरतिया पर रेणे वाली हर इक चीज मरी गेई, उना लोकां कने जानवरां जो छडी करी जड़े जहाजे पर थे।

बरखा रुकणे दे पंज महीने दीकर सै जहाज पाणिऐ पर तैरदा रिया, कने तालू दीकर पांणी घटणा लगी पिया था। तालू इक दिन सै जहाज इक पहाड़े दिया चोटिया पर जाई टिकया, पर संसार हले दीकर भी पाणिऐ ने भरुया था। तिन महीने बाद, पहाड़ां दियां चोटियां मिलणा लगी पियां थियां।

फिरी होर चालियां दिना बाद, नूहे इक कौवे जो ऐ दिखणे तांई बाहर भेजया कि क्या पांणी सूकी गिया था। सै कौआ सुकिया धरतिया दिया तोप च रुआं-प्रां उड़दा रिया, पर उसयो एसी कोई जगा नी मिल्ली।

फिरी बादे च नूहे इक कबूतरी बाहर भेजी। पर उसयो भी कोई सुकी धरती नी मिल्ली, इस तांई सै नूह बाल मुड़ी आई। इक हफ्ते बाद उनी उस कबूतरी जो फिरी भेजया, कने सै अपणिया चुंजा च इक जैतून दा पत्ता लेई आई। पांणी घटा दा था, कने बूटे फिरी ला उगणा लगी पियो थे।

नूहे इक हफ्ता होर इन्तजार किता कने तीजी बरी उसा कबूतरी जो बाहर भेजया। इस बरी, उसा जो रुकणे जो जगा मिली गेई कने वापिस नी आई। पांणी सुका दा था।

दो महीने बाद परमेश्वरे नूह ने बोलया, "हुण तू कने तेरा परिवार कने सारे जानवर जहाजे ला निकली ओआ। मतियाँ सारियां संताना कने पोते-पड़पोते पैदा करा कने धरतिया जो भरी दिया।" फिरी नूह कने उदा परिवार जहाजे ला बाहर निकली आया।

नूह दे जहाजे ला बाहर आणे बाद, उनी इक वेदी बणाई कने बलि देणे बाले हर तरा दे जानवरां चे कुछ-कुछ जो लेई करी बलि चढ़ाई। परमेश्वर उसा बलिया ला खुश होया कने उनी नूह कने उदे परिवारे जो आशीष दिती।

परमेश्वरे बोलया, "मैं प्रतिज्ञा करदा है कि माणुआं दे कितयो बुरे कमा दिया बजा ला मैं फिरी कदी धरती जो श्राप नी दिंगा या बाढ़ ने संसार जो खत्म नी करगा, हालाँकि माणु अपणे बचपने ला ही पापी है।

फिरी परमेश्वरे अपणी वाचा दी निशानी दे तौर च पेहले सतरंगी धनुष जो बणाया। जालू कदी भी अम्बरे च सतरंगी धनुष मिलदा है, तां परमेश्वर याद करदा है कि उनी क्या प्रतिज्ञा कितियो है कने तियां उदे लोकां भी याद करणा।